Juges 14 - Ma Zhiklè

Njked-ma Samson

¹ Samson a mdo a kokwar Thimna, a mrka dem Philistie te Thimna.

² A mshkè a deɓa a ngwai, a mʼmenda na bab na a mam na, a ngaɗa: I rka dem Philistie ngiɗè te Thimna, va-woy-koyè a ngwoz!

³ A bab na a mam na ta gaɗa na: Te va dalahi nte verzi nga, te va ndohi ngaya tèlèba, ngwoz azɓi dè, a ka dè a ka cè ngwoz a sam ndohi Philistie man ngwon ta nʼngela ɓi dè? Aman Samson a ngaɗa na bab na: Sèi ka ckay nengaʼa; aman nengaʼa staɗgenè ambahayè.

⁴ Nda bab na a mam na ta sun a ta gaɗa Ndo nzi pèc pècèk a ngau arsa ɓai. Ndo nzi pèc pècèk a woy a ngècè civèɗ a sam ndohi Philistie, aman a pa ta gèɗ a va. Te ndev nasa ndohi Philistie ta gu bi a géɗ Israel.

⁵ Samson a ndo Thimna, a verzi bab na a mam na, a ta zhè te dak Thimna. Gol marizhèlè a hakaɗi a bebrè a ta zli gèɗ.

⁶ Mèzhèɓ Ndo nzi pèc pècèk a mshkè a géɗ Samson, a Samson a ncizla marizhèlè, ara man ta cizlè ɓok, ko skwi ngiɗè a te ri ɓai. Skwi man a ngau a nʼngra na mam na a bab na ɓai.

⁷ Te deɓaʼa a mdo a ta tsi tsaval a dam. Dam ambaha Samson.

⁸ Aman a pats ngiɗè a mdo a woya a ncè a ngwoz, a mbeza a civèɗ man marizhèlè a mʼmetsa a pa, a nʼngots ndo vongwom nhayaʼa a ɗazli vongwom tʼhwaɗ marizhèlè.

⁹ A nʼndokoɗauda te pa a ri na, a nʼndau a civèɗ. Te deɓaʼa a mdo a sam bab na a mam na, a mva ta a tengaʼa ba, a ta ndau. A nʼngreda ta ɓai, ara man a ndokoɗauda tʼhwaɗ marizhèlè mʼmetsaʼa.

¹⁰ A bab na a ndo a sam dam a ta gi ngolala te gi bab dam, ara man golahi ta giaʼa.

¹¹ Aman ta gi zlau Samson, a ta baha ta golahi 30, aman ta da ndzaraha ta.

¹² Samson a ngaɗa ta: I njè kinè ma man i jkede kine a vna. Aman kin ngotso tʼhwaɗ mʼmèn ngolala 7 haha, i da va kinè maslaka 30 a dawar 30.

¹³ Aman kin da ngècè azɓai, kinè man kin vay maslaka 30 a dawar 30. A ta gaɗa na: Jkede nga a nga tsenaʼa!

¹⁴ A nengaʼa a ngaɗa ta: Skwi man a ndi skwai, ta ngots skwi nʼndi te nengaʼa. Skwi man wuɗi na zhe, ta ngots skwi man a jén te nengaʼa. Mʼmèn makar, ta ngatsa verziaʼa ɓai.

¹⁵ Te mʼmèn matsaraɗaʼa, ta gaɗa na ngwoz Samson: Para nga ma auda tʼhwaɗ baki ngaya, a da ngra ka ma na, a njked-ma na. Man ɓai nga fa kinè vogwa a kinè a ndohi gi bab ngaya. Ka baha nga a haha a ka ndede nga a ndohi ntawassaʼa ɗè?

¹⁶ A ngwoz a kuɗi a sàm Samson, a ngaɗa na: I ambaha ka ɓai, ka woyè ɓai, ka jkede ta gwoli ga, ka ngray verziaʼa a iyè ɓai! A nengaʼa a ngaɗa na: Ko bab ga a mam ga i ngra ta ɓai, a i da ngreda ka dè?

¹⁷ Aman te ngolala tèlèba a kuɗi a sam Samson. Te mʼmèn matsaraɗaʼa Samson a nʼngra na verziaʼa; nkuɗi ngwoz a ngeza na ma.

¹⁸ A ngwoz a nʼngra ta verziaʼa a gwoli na. Te mʼmèn matsaraɗaʼa, ga pats a kèlè, ndohi kokwar ta gaɗa na: Skwi ngiɗè man a jén a fena vongwom a zhi dè? Skwi ngiɗè man wuɗi na zhè a fena marizhèlè a zhi dè? A ngaɗa ta: Aman agassa kin puzo a dem zlè ga ka ɓai, ar kin sun verziaʼa ɓai.

¹⁹ A Mèzhèɓ Ndo nzi pèc pècèk a mshkè a géɗ Samson, a ndo Askalon. A mbazl ta ndohi te pa 30, a mhul maslaka tengaʼa, a mva ta a ndohi man ta ngra na verziaʼa, a ngu ndav kumba, a ndo a deɓa a gi bab na.

²⁰ A ta feda ngwoz Samson a gi slemsak na a ngwoz.