Juges 13 - Ma Zhiklè

Nyi Samson

¹ Ndohi Israel ta hüno ngi skwi man ambaha Ndo nzi pèc pècèk ɓi zaʼa, a Ndo nzi pèc pècèk a mpe ta a ri a ndohi Philistie mvi 40.

² Ndo ngiɗè a zhè, te Tsorea, te verzi Dan, nzlembaɗ na Manoach. Ngwoz nengaʼa delai, a yi kra azɓai.

³ Gol Ndo nzi pèc pècèk a mshkè a sam na, a ngaɗa na: Ani ka delai, ka yi kra azɓai. Aman a di ka da ngècè kra, ka da yi kra nguraʼa.

⁴ Antanta gu maya, ka su zom ɓai, ka su barassa ɓai, ka ndu skwi man Ndo nzi pèc pècèk a sia na nlizhèa ɓai,

⁵ a géɗ man ka da ngècè kra, ka da yi kra nguraʼa. Ta da fi pídök a gèɗ nengaʼa azɓai, te man nengaʼa skwi Zhiklè, daga man tʼhwaɗ mam na. A da hinè a mbel ta ndohi Israel auda te ri ndohi Philistie.

⁶ A ngwoz a mdo a gai, a ngaɗa na baki na: Ndo Zhiklè a nshkè a sam ga. Va nengaʼa nara gol Zhiklè, a mpay zlau a gèɗ. Ka shkè tema, i dzhada ɓai, nengaʼa ba nʼngray nzlembaɗ na ɓai.

⁷ A ngaɗayè: Ka da ngècè kra, ka da yi kra nguraʼa. Ka su zom a barassa ɓai, ka ndu skwi man Ndo nzi pèc pècèk a sla na nlizhèa ɓai, aman kra, skwi Zhiklè, daga man tʼhwaɗ mam na, ha a metsi na.

⁸ A Manoach a ntsu ri a Ndo nzi pèc pècèk, a ngaɗa: Wa bi ga! Gol Zhiklè man ka zlündkoda, da shkè a deɓa a sam nga zaʼa, a nda ngra nga skwi man nga da gi a kra man nga da yia sa.

⁹ A Bi Zhiklè a ntsena nkuɗi Manoach, a gol Bi Zhiklè a mshkè a deɓa a sam ngwoz zaʼa, aman a zhe te gi dau. Manoach, baki na, az a pa ɓai.

¹⁰ A ngwoz a mhu a mda ngra na baki na: Gol Zhiklè madatsuta za nshké deɓa a sam ga!

¹¹ A Manoach a nslambaɗa, a ndo a verzi ngwoz na, a ta shkè a sam gol Zhiklè, a ngaɗa na: Ka ndo man ka goɗ ngèɗè a ngwoz ga dè? A nengaʼa a ngaɗa: I nengaʼa!

¹² A Manoach a ngaɗa: Aman a da gi ara di man ka goɗa, nga da gi a kra sa mè, nga da grè a nkèkè?

¹³ A gol Ndo nzi pèc pècèk a ngaɗa na Manoach: Te va skwi tèlèba man i gaɗa na ngwoz, da gu maya holholaʼa.

¹⁴ Da ndau nyi wof barassa ɓai, da sau zom ɓai, da ndau skwi man Ndo nzi pèc pècèk a sla na nlizhèa bai, da gu tèlèba man i njè na.

¹⁵ Manoach a ngaɗa na gol Ndo nzi pèc pècèk: Nga woy a nga predaka ma asaɓai, séi nga zlaha ka ɓok a nga ta ka.

¹⁶ A gol Ndo nzi pèc pècèk a ngaɗa na Manoach: Ko ka preday ma azɓai, i ndi skwi ngaya azɓai. Aman ka woy a ka zlèhaʼa, ndara na Ndo nzi pèc pècèk! Manoach a sun a ngaɗa nengaʼa gol Ndo nzi pèc pècèk ɓai.

¹⁷ A ngaɗa na gol Ndo nzi pèc pècèk: Nzlembaɗ ngay wa? Aman a nda ga ara ngèɗ ngaya, nga da slebardè ka.

¹⁸ A gol Ndo nzi pèc pècèk a ngaɗa: Ka jhèdè nzlembaɗ ga èhèmè? Nzlembaɗ ga, ‘mbikaɓai’.

¹⁹ Manoach a nco ɓok a movar, a nʼndara na Ndo nzi pèc pècèk a géɗ kwa, a Ndo nzi pèc pècèk man a gi skwi man mbikaɓai. A Manoach a ngwoz na ta pu dai.

²⁰ Aman nèʼèn vogwa a zlècèdè va a sam mvi skwi a Zhiklè, a ndè a géɗèʼa; gol Ndo nzi pèc pècèk a nslambaɗa, a ndo a zhiklè te va nèʼèn vogwa. Manoach a ngwoz na ta kalahi a deɓ sak nengaʼa.

²¹ Te deɓaʼa gol Ndo nzi pèc pècèk a mshkè a deɓa a sam Manoach a ngwoz na asaɓai. A Manoach a sun a ngaɗa, nengaʼa gol Ndo nzi pèc pècèk.

²² Manoach a ngaɗa na ngwoz na: Nga metsi nga, te man nga rka Bi Zhiklè!

²³ Aman ngwoz na a ngaɗa na: Aman agassa Ndo nzi pèc pècèk a woya a mbazl nga, ar skwi man nga va na, a nga ndara na, a cè te ri nga asaɓai, ar a ngreda nga skwi haha tèlè azɓai.

²⁴ Te deɓaʼa ngwoz a myu kra, a mbaha na Samson. A kra a grè, a Ndo nzi pèc pècèk a mpshè na ma.

²⁵ Mèzhèɓ Ndo nzi pèc pècèk a nhüno ngi skwi a sam na te Machané-Dan, te ndev Tsorea a Eshthaol.