Josué 22 - Ma Zhiklè

Sam mvi skwi a Zhiklè a ma Jourdain

¹ A pats nasa Josué a mbaha ta ndohi Ruben, Gad, a Manassé rètaʼa,

² a ngaɗa ta: Kin gau skwi tèlèba man Moise, ɓèl Ndo nzi pèc pècèk a njè kinè ma a gèɗ. Kin fu gèɗ a ma ga te skwi tèlèba man i gaɗa kinè.

³ Kin nza a nda kramamhi kinè nʼnzi a zhè, kin jèke ta bai, ha patsna, a kin dzodzor ma nkwèr Ndo nzi pèc pècèk, Zhiklè kinè.

⁴ Antanta Ndo nzi pèc pècèk a mva ta nshèk va a kramamhi kinè, ara man a pasla ta rai. Gar haha, va-men kinè a deɓa, vo-do a gi kinè, a kokwar man a kinè, nengaʼa man Moise, ɓèl Ndo nzi pèc pècèk, a mva kinè te wud woyam Jourdain.

⁵ Aman sèi kin jèjèr ma nkwèrè a ma kita Zhiklè, man Moise a njè kinè a gèɗ, zuraʼa, a kin woy Ndo nzi pèc pècèk, Zhiklè kinè, a kin jèjèr civèɗ nengaʼa pèc pècèk, a kin fi gèɗ a ma nkwèr nengaʼa, a kin gsa va a Zhiklè, a kin gi mizlinè nengaʼa a ndav tèlè, a nshèffè tèlè.

⁶ Te deɓaʼa Josué a mpshè ta ma, a mpre ta, a to do a gi tengaʼa.

⁷ Moise a mva ta sam te Basan a ndohi te verzi Manassé rètaʼa ngiɗè. Aman a rèta ngiɗè, Josué a mva ta sam te ndev kramamhi tengaʼa, a sam Jourdain, te civèɗ nkèl pats. Tengaʼa ba, Josué a mpre ta, a ta dè a gi ta, a mpshè ta ma.

⁸ A nengaʼa a ngaɗa: Va-men kinè a deɓa a gi kinè, a skwi mèshèlè kumba, a rèwè skwi kumba, a gurso a guro, a verzhègenè a züdo, a maslaka a vata. Skwi man kin dumkoɗi a sam mayamhi kinè, va-kezla a nda kramamhi kinè!

⁹ A ndohi Ruben, a ndohi Gad, a rèta ndohi Manassé, ta men ta a deɓa, a ta jè-keda sam ndohi Israel te Silo, te kokwar Canaan, aman ta dè a kokwar Galaad, a kokwar man ta ngotso a kokwar ta, ara man Ndo nzi pèc pècèk a njè ta a ma Moise; a ta nza a pa.

¹⁰ A ta ndika a Geliloth, a ma woyam Jourdain, te kokwar Canaan, ndohi Ruben, a ndohi Gad, a rèta verzi ndohi Manassé, ta rom sam mvi skwi a Zhiklè, ndul ndul a sam woyam Jourdain, sam mvi skwi a Zhiklè mbiaʼa, man a rkè dra.

¹¹ Ndohi Israel ta tsenaʼa, ara man ndohi ta gaɗa: Na haha ndohi Ruben, ndohi Gad, a rèta verzi ndohi Manassé ta rom sam mvi skwi a Zhiklè, zuraʼa a ma kokwar Canaan, a sam Geliloth, a ma woyam Jourdain, te civèɗ man ndohi Israel ta te pa.

¹² Ndohi Israel ta tsenaʼa, a mpi ndohi Israel ta ɓiceda va a Silo, aman ta dè a ta gi var a nda ta.

¹³ A ndohi Israel ta zlündo Phinées, kra Eléazar, ndo mvi skwi a Zhiklè, a sam ndohi Ruben, ndohi Gad, a ndohi verzi Manassé rètaʼa,

¹⁴ wud bihi 10 a nda nengaʼa, kra bi staɗ staɗ te verzi ndohi Israel 1.000, 1.000.

¹⁵ Tengaʼa ta shkè a sam ndohi Ruben, a sam ndohi Gad, a sam verzi ndohi Manassé rètaʼa, a kokwar Galaad, a ta gaɗa ta ar haha:

¹⁶ Mpi ndohi Israel tèlèba ta gaɗa kinè: Mali mè, man kin gu a sam Zhiklè Israel, aman a patsna kin jèkeda ndè a verzi Ndo nzi pèc pècèk, a kin rom sam mvi skwi a Zhiklè man a kinè, a kin Sala na va a gèɗ a Ndo nzi pèc pècèk?

¹⁷ Mali man kin gu te Peor a slra kinè ɓi dè? Ha patsna mali haha mpra di ɓai; a gèɗ nengaʼa matakwan a ga ta mpi ndohi Ndo nzi pèc pècèk.

¹⁸ A patsna kin woy a kin jèkeda Ndo nzi pèc pècèk dè? Te deɓaʼa a gèɗ man kin Sala na va a gèɗ, Ndo nzi pèc pècèk a da gi ndav a géɗ mpi ndohi Israel tèlèba.

¹⁹ Aman kin huro, herkeda man kin ngotso, nlizhèa a sam di Zhiklè, vo-washkè auda a kokwar man a Ndo nzi pèc pècèk, man gi Zhiklè a zhè a pa, va-nza a va nga; aman kin Sala na va a gèɗ a Ndo nzi pèc pècèk ɓai, kin Sala nga va a gèɗ ɓai, a kin rom sam mvi skwi a Zhiklè ngiɗè a tsagi sam mvi skwi a Ndo nzi pèc pècèk, Zhiklè nga, ɓai!

²⁰ A pats man Acan, kra Zérach, nco skwi man Zhiklè a phomda, a metsar, Zhiklè a ngu ndav a géɗ mpi ndohi Israel tèlèba ka bi dè? Nengaʼa staɗgenè ka ɓai, man a mets na a géɗ mali na a haha.

²¹ Ndohi Ruben, a ndohi Gad, a verzi Manassé rètaʼa, ta mbeɗa ta a ma a tsuvomhi gwoli Israel:

²² Zhiklè a géɗ zhi-klèhi tèlèba. Ndo nzi pèc pècèk, Zhiklè a géɗ zhiklèhai. Ndo nzi pèc pècèk a suna, a ndohi Israel ba ta suna: Nga rom sam mvi skwi a Zhiklè a géɗ man nga Sala na va a gèɗ a nga jèkeda Ndo nzi pèc pècèk ɓai – man ɓai, da takaha nga a patsna ɓai!

²³ Aman nga gau, a nga vi skwi a pa, a nga ndèr skwi a pa, a nga va na skwi a pa te nshid gèɗ, – Ndo nzi pèc pècèk da gu kita nga!

²⁴ Nga gau, a nga hur wudahi kinè ta da gaɗa ta wudahi nga pats ngiɗè: Ndo nzi pèc pècèk, Zhiklè Israel, Zhiklè kinè dè?

²⁵ Ndo nzi pèc pècèk a mpau kuma a Jourdain, te ndev nga a kinè, ndohi Ruben a ndohi Gad. Gar haha Ndo nzi pèc pècèk, Zhiklè kinè ka ɓai. Ar haha wudahi nga ta da gi zlau Ndo nzi pèc pècèk azɓai, a géɗ wudahi kinè.

²⁶ A gèɗ nengaʼa, nga gaɗa: ngo-gokoy sam mvi skwi a Zhiklè haha, a nʼndèr skwi a nzlèh skwi a Zhiklè ka ɓai;

²⁷ aman da gu a skwi malwudai te ndev nga, te ndev kinè, te verzi wud wud nga, a nʼngra ta, ara man nga woy a nga gi mizlinè Ndo nzi pèc pècèk a skwi man nga ndara na, nga zlaha na a nga va na te nshid gèɗ. Te deɓaʼa wudahi kinè ta da gaɗa ta wudahi nga asaɓai: Ndo nzi pèc pècèk, Zhiklè kinè ka ɓai.

²⁸ Nga gaɗa: aman pats ngiɗè ta da gèdè arsa genè, nga slaha nga gaɗa ta: Va-pu dai a sam mvi skwi a Zhiklè, nlèmda a va sam mvi skwi a Ndo nzi pèc pècèk, man babhi nga ta gau, aman ta ndara na skwi ka ɓai, a ta zlaha na skwi ka ɓai, aman a géɗ man a gi malwudai te ndev nga, te ndev kine.

²⁹ Aʼai, nga woy a nga Sala na va a gèɗ a Ndo nzi pèc pècèk azɓai. Nga woy a nga jèkeda Ndo nzi pèc pècèk a patsna azɓai. Nga rèm sam mvi skwi a Zhiklè azɓai, aman nga ndara na a nga va na a nga zlaha na skwi a Zhiklè a sam ngiɗè, a tsagi sam mvi skwi a Ndo nzi pèc pècèk, Zhiklè nga, man a zhè a ma gi nengaʼa.

³⁰ Phinées, ndo mvi skwi a Zhiklè, a wud bihi ndohi mɓicaʼa, a tsuvomhi gwoli Israel, man ta zhè a sam nengaʼa, ta tsena ma man ndohi Ruben a ndohi Gad a ndohi Manassé ta gaɗa ta; ambaha ta.

³¹ A Phinées, kra Eléazar, ndo mvi skwi a Zhiklè, a ngaɗa ta ndohi Ruben, ndohi Gad a ndohi Manassé: A patsna nga suna, Ndo nzi pèc pècèk a zhè te ndev nga, kin ga mali a sam Ndo nzi pèc pècèk ɓai; aman kin mbel ta ndohi Israel te ri Ndo nzi pèc pècèk.

³² A Phinées, kra Eléazar, ndo mvi skwi a Zhiklè, a wud bihai, ta jèkeda ndohi Ruben a ndohi Gad, a ta shkè a deɓa a kokwar Galaad, te Canaan, a sam ndohi Israel, a ta menda ta maʼa.

³³ Skwi haha ambaha ta ndohi Israel, a ndohi Israel ta shüd gèɗ a Ndo nzi pèc pècèk, ta hur ngi var a ta gedassa kokwar tengaʼa asaɓai, man ndohi Ruben a ndohi Gad ta nza a pa.

³⁴ Te deɓaʼa ndohi Ruben a ndohi Gad ta baha na sam mvi skwi a Zhiklè ‘malwuɗai’, ta gaɗa: Nasa skwi malwudai te ndev nga; Ndo nzi pèc pècèk, nengaʼa Bi Zhiklè.