Josué 18 - Ma Zhiklè

Nkezli kokwar te Silo

¹ A mpi ndohi Israel ta ɓicko va a Silo. A pa, ta til gi Zhiklè nkezlaʼa. To do aman ta dumda herkeda a ma.

² Njèkè verzi ndohi Israel 7 man ta ngatsa skwi nʼndi gi tengaʼa ɓai.

³ Josué a ngaɗa ta ndohi Israel: Kin nza ɓlussaʼa èhèmè; kin dè a kin dum kokwar man Ndo nzi pèc pècèk, Zhiklè babhi kinè a mva kinè ɓi èhèmè?

⁴ Te verzi ndohi Israel staɗ staɗ tèlèba, va-por ndohi makar. I da zlinde ta a ta wèr kokwar, a ta bèzlè kuma, ga ta shkè a deɓa a sam ga.

⁵ Ta da kezliaʼa te va 7: Juda a nzi a sam nengaʼa te man a tsagai, a ndohi Joseph ta nzi a sam nengaʼa te man a géɗèʼa.

⁶ Te deɓaʼa va-bazla kuma, a kin ngela kokwar a gi sam 7, a kin windokoɗa, a kin ckoɗa a sam ga, a i woy a i ga kinè jimèr haha a sam di Ndo nzi pèc pècèk, Zhiklè nga.

⁷ Aman ndohi Lévi ta ngècè skwi a sam kinè azɓai, te man mizlinè mvi skwi a Zhiklè te ri ta, nasa nʼndi gi tengaʼa. A Gad, Ruben a ndohi Manassé rètaʼa ta ngots skwi nʼndi gi tengaʼa te wud woyam Jourdain, te civèɗ mvèng pats, man Moise, ɓèl Ndo nzi pèc pècèk, a mva ta.

⁸ A ndohi ta slambaɗa a to do. A tengaʼa man to do, Josué a njè ta ma a gèɗ, aman ta windè herkeda, a ngaɗa ta: Vo-do, va-beza a ndev kokwar, va-windokoɗa, a kin shkè a deɓa a sam ga! I da gi jimèr a haha a géɗ kinè, a sam di Ndo nzi pèc pècèk, te Silo.

⁹ A ndohi to do, a ta war kokwar, a ta windokoɗa ɗèlèwèr, kokwar kokwar nʼngelaʼa te va 7, a ta ckoɗa sam Josué, a sam man ta mana a pa te Silo.

¹⁰ A Josué a ngu jimèr tengaʼa te Silo, a sam di Ndo nzi pèc pècèk. A pa Josué a nkezla ta kokwar a ndohi Israel, staɗ staɗ a nʼngots difi na.

Man Benjamin a ngotso

¹¹ Jimèr a nkala na a gèɗ a verzi Benjamin, ndohi gi tengaʼa, a ta ngots kokwar te ndev wudahi Juda a wudahi Joseph.

¹² Kuma tengaʼa, te civèɗ man a géɗèʼa, woyam Jourdain, a ndè a beza a za a tsagi Jéricho, te man a géɗèʼa, a ndè za te civèɗ nkèl pats, ha a ndikè a hèshèkèɗ Beth-Aven.

¹³ Te pa a dè Luz, a tsagi Luz, te man a dakwaɗ (nasa Béthel), a nde Ataroth-Addar te za, te tsagi Beth-Horon te godok.

¹⁴ A kuma a dè auna, te civèɗ nkèl pats a ndè man a dakwaɗ, a hinè te za zuraʼa a ma Beth-Horon, te dakwaɗ, ha a ndikè a Kirjath-Baal (nasa Kirjath-Jearim), kokwar ndohi Juda. Nasa civèɗ nkèl pats.

¹⁵ Civèd man a dakwaɗ: ndi-kè-maʼa te Kirjath-Jearim. Te deɓaʼa kuma a dè a civèɗ nkèl pats, a ndikè a sam nlèlè iyam Nephthoach.

¹⁶ Te deɓaʼa a shkèhi a der za, zuraʼa a nkulgodok te Hinnom, a tsagi ndohi Jébus, te man a dakwaɗ: te deɓaʼa a shkèhi a En-Roguel.

¹⁷ Te deɓaʼa a ndikè a En-Shemesh, a dè a Gueliloth, zuraʼa a za Adummim, a dè hai a sam kwa Bohan, kra Ruben.

¹⁸ Te deɓaʼa a beza a Kétéph, a ma Araba, a ndè a géɗèʼa, a shkèhi a Araba.

¹⁹ A kuma a zhè a tsagi Beth-Hogla, te man a géɗèʼa, a ndikè a sam kuma a ma iyam boma, te civèɗ man a géɗèʼa, a sam man woyam Jourdain a hi a pa, te civèɗ man a dakwaɗ. Nasa kuma te man a dakwaɗ.

²⁰ Jourdain, kuma te civèɗ mvèng pats. Nasa skwi nʼndi gi ndohi Benjamin, kuma man a tèuda pa, a ndohi gi ta.

²¹ Kokwarhi ndohi te verzi Benjamin, a ndohi gi ta, ta a haha: Jéricho, Beth-Hogla, Emek-Ketsits,

²² Beth-Araba, Tsemaraim, Béthel,

²³ Avvim, Para, Ophra,

²⁴ Kephar-Ammonai, Ophni, a Guéba, kokwar mbiaʼa a kokwar tengaʼa nkèshèa 12.

²⁵ Gabaon, Rama, Béeroth,

²⁶ Mitspé. Kephira, Motsa,

²⁷ Rékem, Jirpeel, Thareala,

²⁸ Tséla, Eleph, Jébus (nengaʼa Jérusalem), Guibeath a Kirjath: kokwar mbiaʼa a kokwar tengaʼa nkèshèa 14. Nasa skwi nʼndi gi ndohi Benjamin, a ndohi gi ta.