Josué 16 - Ma Zhiklè

Man Ephraim a Manassé rétaʼa ngiɗè ta ngotso

¹ Skwi man ndohi Joseph ta ngotso a jimèr, a hinè te woyam Jourdain, te Jéricho, a ndè a ma iyam Jéricho, te civèɗ mvèng pats, a beza hèshèkèɗ te ndev Jéricho a Béthel.

² Te deɓaʼa te Béthel a ma ma a Luz, a kuma ndohi Arki te Ataroth.

³ A shkèhi te civèɗ nkèl pats, a ndè a kuma ndohi Japhléth, ha ndè Beth-Horon te godok, ha Guézer, ha ndi-kè a iyam mbiaʼa.

⁴ Manassé a Ephraim, wudahi Joseph, ta kezla skwi nʼndi gi haha a va ta.

⁵ Kuma ndohi Ephraim a ndohi gi ta, kuma skwi nʼndi gi tengaʼa, te civèɗ mvèng pats, te Ataroth-Addar, ha ndè Beth-Horon te géɗèʼa.

⁶ Te deɓaʼa kuma a dè te civèɗ nkèl pats, ha Micmethath te civèɗ man a géɗèʼa, a kuma a nbeza zlawa te civèɗ mvèng pats, a ndè Thaanath-Silo, a ndè a ma ma te civèɗ mvèng pats, a nbeza a Janoach.

⁷ Te Janoach a dè Atharoth a Naaratha, a lama na Jéricho.

⁸ Te Tappuach a dè te civèɗ nkèl pats a ma ndzurv iyam te Kana, a hi a iyam mbiaʼa. Nasa skwi nʼndi gi ndohi te verzi Ephraim a ndohi gi ta.

⁹ A vaʼa kokwarhi mbibihiaʼa man ta fedahi a géɗ wudahi Ephraim, te ndev skwi nʼndi gi ndohi Manassé, kokwarhi mbibihiaʼa a kokwarhi nkèshèa a tsagi tengaʼa.

¹⁰ Aman ta dzam ta ndohi Canaan man ta nza te Guézer ɓai, a ndohi Canaan ta nza te ndev ndohi Ephraim, ha patsna. Aman ta pe ta a mizlinè ɓèlè.