Job 40 - Ma Zhiklè

¹ A Ndo nzi pèc pècèk a mʼmbeɗa na ma a Job te va ndombozlor, a ngaɗa:

² Mana ndav ngaya ara nguraʼa! I woy a i dzhaɗ ka, a ka da sendayè.

³ Ka woy a ka gedassa ma kita ga a vava cè? Ka fay mali a gèɗ, aman ka da mbelko gèɗ ngaya auda cè?

⁴ Ri ngaya lèmèlèmè ara ri Zhiklè cè, daʼai ngaya lèmèlèmè ara ntsi iyam cè?

⁵ Tilda va ngaya a hai ara ndo mbiaʼa, feda nʼnjèlè a wuɗi a va!

⁶ Pra ndzoan ngaya, pa na hori a di a nfi va ndohi tèlèba!

⁷ Manda ta gèɗ a hai a ndohi nfi va, a ka mbatsa ta ndohi ambaɓihiaʼa a sak!

⁸ Kerɗ ta a sak, pizl ta a pa a sam nʼnghedaʼa!

⁹ Aman ri mandi ngaya a mbel ka arsa, i ba i slebarde ka.

¹⁰ Wor dè iyam man i gau lèmèlèmè ara man a ngaya. A ndi mandi ara zlè,

¹¹ wuɗi na zhè te godor na, wuɗi na zhè te verzi hwaɗ.

¹² A Sala hutor na ara wof ɗawai, mar ɗos nengaʼa a ngéslè azɓai.

¹³ Vatasl nengaʼa ara züdo, sak nengaʼa ara gada züdo.

¹⁴ Nengaʼa nshèlèkur skwi man Zhiklè a ngau, a ngu aman a kwèr gwoli na.

¹⁵ A ngècè skwi te za, a kerɗa skwi dak tèlèba a sak.

¹⁶ A mènè a va gongwai, a nghédè va na a va nzezau te draɓ.

¹⁷ Gongwai a pa na mèzhèɓ a dai, ncènjéra a tèuda a pa a ma woyam.

¹⁸ Ko woyam a grè, a hi azbai. A nza, ko iyam a dzurvkaɗai.

¹⁹ Nslaha a ngshè a sam di na wa? Nslaha a ntuma htsan na wa?

²⁰ Ka slaha ka gshè kedam a jir ɗè? A ka dzawama na nèʼèn te ma nengaʼa cè?

²¹ Ka slaha ka tuma htsan, a ka pi dzala a ma nengaʼa cè?

²² A zlècèhi a da tsa ka rai, a gada ka ma nhènèkèʼa ɗe?

²³ A cè ma ngaya a gi ɓèl ngaya a mèdèp cè?

²⁴ Ka mbèhwali a vna ara man a kda cè, ka woya dalahi ngaya ta mbèhwali a vna cè?

²⁵ Ta slaha ta zlèhaʼa a ta prè a luma cè? Ta kezliaʼa a sam ndohi gani cè?

²⁶ Ka slaha ka tizhè hutèɗ na a tsakwal dè, ka tizhè gèɗ nengaʼa a jir cè?

²⁷ Man ka da lama na sak staɗ, kalama na macecèwaʼa asaɓai. Ka slaha ka bèzl va a vna bai.

²⁸ Man ɓai a da ngwode ka; ndo man a rkaʼa, a kal na hi langa.