Job 36 - Ma Zhiklè

¹ Elihu adè a ma ma:

² Kazladai, i ngra ka a vaʼa; a géɗ Bi Zhiklè ma ga a zhè genè.

³ Skwi man i suna, i ngotsko dra, i woy a i ngreda ngi-zura Zhiklè man a ngyè auda.

⁴ Aman a vava ma ga, ma ncèkèlma ka ɓai. Ndo ngaɗa ka a sun maya tèlèba.

⁵ Na haha, wuɗi Zhiklè a zhè, a géɗ maya na; ndo man ndav nengaʼa mpana, a kwèlè azɓai.

⁶ A jèka na nshèffè a ndo ambaɓiaʼa azɓai. A nza ta a deɓa a ndohi ntawassaʼa te kita.

⁷ A cè di auda a sam ndo nzuraʼa azɓai; a pe ta bihi a géɗ sam nʼnzi bai, a nzal ta.

⁸ Aman ta kèlèhai, nlèyè a dzaw ta ara teɓa.

⁹ Zhiklè a ngra ta skwi man ta gau, a mali ta man ta gre gèɗ te pa.

¹⁰ A winè ta zlembaɗ a ma na, a guv ta, a ngatsa ta maya a vna, a gada ta, aman ta menkada deɓa.

¹¹ Aman ta fa na gèɗ a ma nengaʼa, a pats nshèffè tengaʼa tèlèba ta wèl va, a ta nzi te mwuffe genè.

¹² Aman ta fi gèɗèʼa azɓai, ta hi a ma tsakwal, a ta bazl ta a géɗ man maya ta azɓai.

¹³ Ndohi man ndav ta nsassaya, man ta gi ndav, Zhiklè a dzaw ta, ta kuɗi a sam Zhiklè azɓai.

¹⁴ Ta bèzl ta te gola, a nshèffè ta a nzi a vata azɓai.

¹⁵ Zhiklè a mbel ta ndohi ntawassaʼa a ntèwèshè, a winè ta zlembaɗ a matakwan.

¹⁶ Mwèl va ngaya a zlakede ka, a géɗ man matakwan a mwinèha ka ma ɓai, skwa a mpa ka zlau a va ɓai, zluèɗ mwuzhè a wurom.

¹⁷ Kita mbiaʼa man a kala ta gèɗ a ndohi nderɗa Zhiklè a ngats ka; kita a gs ka zuraʼa.

¹⁸ Gu maya, ndzoan Zhiklè da poko ka gèɗ auda ɓai; skwi man ka pilèʼa a slaha a mbel ka ɓai.

¹⁹ Kuɗ ngaya a mbel ka auda te matakwan ɗè? Kuɗ ngaya a takaha ka dè?

²⁰ Dara vaɗ, ka goɗ ɓai! Aman a vaɗ ta gshè ndo.

²¹ Gu maya, ka va na va ngaya a ri a mali ɓai! Aman daraha ka malai a géɗ nsi matakwan.

²² Na haha Zhiklè a gi skwi mbiaʼa a wuɗi nengaʼa. Ndo nsenda ta ndohai ngar nengaʼa tema?

²³ Gu kita kata kata, ngaɗa na wa? Ndo ngaɗa na: ka gu ambaɓai, wa?

²⁴ Huro, nzala mizlinè na, man ndohi ta slu a dimèsh a gèɗèʼa.

²⁵ Ndohi tèlèba ta rkaʼa, a ta wuffè a géɗèʼa. Ko wawa a géɗ herkeda ta rka dra.

²⁶ Na haha, Zhiklè mbiaʼa, nga sun mbi nenga ɓai. Mvi nengaʼa a shinè azɓai.

²⁷ Zhiklè a seda iyam a géɗèʼa, a mendokoɗa deɓa.

²⁸ Vanai a gokoɗai, a géɗ ndohi kumba.

²⁹ Nsun maya ngi vani wa? Nsun maya ntsi iyam te giɗfèk wa?

³⁰ Na haha a goko iyam, a ndha woyam mbiaʼa a vna,

³¹ a gi kita a vna, a va ta skwi nʼndi a ndohi a vna.

³² Ri nengaʼa a ngu aman a iyam a ndi dai, a tsi mayamhi nengaʼa a vna.

³³ A ngreda va na a ntsi iyam, a pa ta zlau a gèɗ a rèwè skwai.