Job 34 - Ma Zhiklè

Elihu a gaɗa ta mandalahi na

¹ Elihu a hüno a ngaɗa:

² Kinè ndohi maya, va-tsena ma ga, kinè ndohi man kin sun skwai, va-fu zlembaɗ!

³ Zlembaɗ a cinè ma, lèmèlèmè ara daʼai a ɗèl skwi nʼndai.

⁴ Nga-woyokoya: skwi nzuraʼa mè? nga-sunokoya: skwi mbelaʼa mè?

⁵ A géɗ man Job a gada: i ndo nzuraʼa, aman Zhiklè a ngwoday kita a gèɗ.

⁶ I gu skwi zuraʼa, a Zhiklè a gada zuraʼa ka ɓai. Skwa a dzayè, a gi dara azɓai. Aman mali ga azɓai.

⁷ Ndo ngar Job a zhi ɗè? Man a mfu nderɗai a tsaval na,

⁸ nlèmda te va ndohi malihai, a dè a verzi ndohi malihai.

⁹ Nengaʼa a gada: Aman ndo a jèjèr Bi Zhiklè, a takaha te mè?

¹⁰ Gar haha kinè man kin sun maya, va-tsena ma ga! Skwi ambaɓiaʼa dra a sam Zhiklè, mali dra a sam Zhiklè Bi-wuɗai!

¹¹ Zhiklè a pela na ndo ara skwi man a gau, a gi a sam na ara maya nshèffè na.

¹² A vava, Zhiklè, a gi skwi ambaɓiaʼa azɓai. Zhiklè Bi-wuɗai a ngwèdè kita azɓai.

¹³ Mva na herkeda na a ri wa? Mfeda a bi a géɗ herkeda wa?

¹⁴ Aman Zhiklè a cè Mèzhèɓ na a deɓa, a cè nshèffè na auda,

¹⁵ ndohi a géɗ herkeda klèng, ta ndiv ta, a ndo a minè a deɓa a va mberfenèk.

¹⁶ A ngaɗa na Job: Aman maya ngaya a zhè, tsena ma haha, fu zlembaɗ a ma ga haha!

¹⁷ A vava ndo man ma kita ambaha ɓai, a gi bi dè? Ndo man a gi skwi zuraʼa, ka woy a ka phomda dè?

¹⁸ Nengaʼa man a ngaɗa na bai: Ka ndo ambaɓiaʼa, man a gada ta mbibihiaʼa: Kinè ndohi nderɗe Zhiklè!

¹⁹ Nengaʼa man a pi a wud bihai azɓai, a ndohi mèshèlè a ndohi ntawassaʼa azbai, ta tèlèba ri nengaʼa a ngau.

²⁰ A nasa nasa ta dè vèvèɗ. A tse ta ndohi mbibihiaʼa, a ta bazl ta, a kalda ndo wuɗai auda, ko a nlama na a ri na ɓai.

²¹ Aman nengaʼa a pi ɗi a civèɗ ndo, a rka sam sak nengaʼa tèlèba.

²² Vaɗ ba, ruva ba, azbai, aman ndohi malihi ta nghédè va a pa.

²³ Ndo a sun pats, a sam, man a da zlècè a sam di Zhiklè a kita ɓai.

²⁴ A wushede ta mbibihiaʼa a hai, a ndzhaɗ ta ɓai, a mindè ndo ngiɗè a diaʼa.

²⁵ Gar haha: a sun mizlinè ta, a wushede ta a hi a vaɗ, a hasl ta a sak.

²⁶ A tse ta a géɗ mali ta, a sam di ndohi ngiɗè kumba.

²⁷ A géɗ man ta jèkeda, a ta fu gèɗ a civèɗ nengaʼa tèlèba bai.

²⁸ A tsena ndo ntawassaʼa man a kuɗi a sam na, a tsena kuɗ mbelaw ndohai.

²⁹ Aman nengaʼa a nza tètèʼa, nwoya a mphömdè wa? Aman a nghéɗè va na, nslaha a nrka wa?

³⁰ Kokwar-bihai, a ndohai, nengaʼa a war ta tèlèba, aman nderkèzhè ndo, a ndo ngiɗè man a gedèshè ndohai, a gi bi azɓai.

³¹ Aman ndo malai a gaɗa na Zhiklè: I cè mali ga, i woy a i gi mali te deɓaʼa asaɓai,

³² slebdayè, aman i gu malai, i da gia te deɓaʼa asaɓai.

³³ Zhiklè a bèzlè kita ara man ka, ka hur dè? Sei ka, ka ɗèlèʼa, iyè ka ɓai. Skwi man ka suna, goɗo!

³⁴ Ndohi maya ta tsena ma ga, ta gèɗè lèmèlèmè ara ga:

³⁵ Job a goɗ ma ambaɓai, verzi ma nengaʼa azɓai.

³⁶ Aman Zhiklè a jkeda Job a ma ma, a géɗ man nengaʼa a gèɗè ara ndohi malihai,

³⁷ a va na mali a va mali na, a tsi ri a di a Zhiklè, a ga na ma a va kumba.