Job 32 - Ma Zhiklè

Ma Elihu

¹ Te deɓaʼa ndohi makar ta nze ta, ta mbeɗa na ma a Job asaɓai, a géɗ man a hur te ndav na, a gada i ndo nzuraʼa.

² A ndav a ndza na Elihu, kra Barakeel, te Buz, te verzi Ram, worworaʼa, a ngu ndav kumba a géɗ Job, a géɗ man a gada i ndo nzuraʼa a sam di Zhiklè.

³ A ngu ndav a géɗ mandalahi na makar, a géɗ man ta ngatsa ma man ta mbeɗa na a pa ɓai, a ta sun nɗèl ndo mali te va ɓai.

⁴ Elihu a nzhoro, a mʼmbeɗa na ma a Job tsam-tsam ɓai, a géɗ man tsuvoma tengaʼa a nengaʼa.

⁵ Aman Elihu a rkaʼa, mandalahi makar ta sun mbeɗi a pa asaɓai, a ngu ndav kumba.

⁶ Elihu, kra Barakeel, ndo Buz, a hüno a ngaɗa: I wudahi dai, kinè kin gra ma! A géɗ nengaʼa i gu zlau a i nze ga, a skwi man i suna, i ngreda kinè ɓai.

⁷ I huro: Ndohi ngraʼa da goɗa, ndo man nvi na kumba da ngreda maya auda!

⁸ Aman Mèzhèɓ a ngredè maya a ndo, Mèzhèɓ Zhiklè Bi-wuɗai a senda ta ndohai.

⁹ Ndohi nhalaʼa ndohi maya tèlè ka ɓai; ndohi mogonahai ta sun skwi nzuraʼa pèc pècèk ka ɓai.

¹⁰ Gar haha i gada kinè: Va-tsena ma ga! I ba i woy a i ngra kinè skwi man i suna.

¹¹ Anai i tsena ma kinè, i fu zlembaɗ a maya man kin goɗa, man kin hosso, a kin woy a kin ngècè maʼa.

¹² I fu zlembaɗ a ma kinè ndèzlèʼa. Aman kin slaha kin wina na di a Job, aman a rka mali na ɓai, ko staɗ. Kin slaha kin ngatsa na maya ɓai.

¹³ Gar haha, nga ngots maya, kin goɗ ɓai! Sèi Zhiklè a senda nga, ndo ka ɓai.

¹⁴ Job a nju ma a géɗ ga ka ɓai. I woy a i mbeɗi a pa ara man a ka kinè ka ɓai.

¹⁵ A ta rzl ta, ta mbeɗa na ma ɓai, ta sun man ta gèɗè ɓai.

¹⁶ Ta gèɗè azɓai, ta zlècè a pa, a ta sun mbeɗi a pa ɓai, a i zhè-rè genè dè?

¹⁷ I ba i woy a i mbeɗi a pa, i ba i woy a i ngra ta skwi man i suna.

¹⁸ Ma a nʼndha te géɗ ga, ndav ga a woya a nzuvko ma auda.

¹⁹ Ndav ga ara duzlak zom man ta pizla na ma a pa, man a hubatkaɗauda.

²⁰ Gar haha sèi i gèɗèʼa, a ndav ga a nkeɗaha gèɗ a hai, a i winè ma ga, a i mbeɗi a pa.

²¹ I woy a i pèr ndo mpèrè azɓai, i pi a ndo azɓai.

²² I slaha a i gèɗ ma a i pi a ndo azɓai, man ɓai Zhiklè ngyè a da zedyè.