Job 31 - Ma Zhiklè

¹ I basla gèɗ ga i pi di a bidali azɓai.

² Bi Zhiklè a fayè a hi te géɗèʼa mè? Zhiklè Bi-wuɗai a da zlindakay te géɗèʼa mè?

³ Ndo man ambaɓai a ngècè matakwan azɓi dè? Ndohi malihai ta ngècè skwi mwuɗitpa azɓi dè?

⁴ Zhiklè a sun civèɗ ga, a ngrè sam sak ga tèlèba azɓi dè?

⁵ Aman i cèkèlma, aman i ngwèdè ndo,

⁶ Zhiklè da li vyè, a skwi nlivè ngi-zuraʼa! Bi Zhiklè a da suna, i zuraʼa.

⁷ Aman i beza zlawa a civèɗ, a di ga a peda ndav ga a wai, ri ga nlizhèʼa,

⁸ i woy a i zlekiaʼa a hai, a ndo ngiɗè da ndau, a wudahi ga da bazlka ta auda te ndev ndohi ngiɗè.

⁹ Aman ndav ga a ngwode na a verzi ngwoz ngiɗè, a i pi va a i tétékè skwi nslamagi ga,

¹⁰ ngwoz ga da ga na mizlinè a ndo ngiɗè, ndohi ngiɗè da mana a vna.

¹¹ Ar i da gu skwi horai, i gu malai, amba man ta gay kita a géɗèʼa.

¹² Nara vogwa man a ndi skwi te vèvèɗ mpèltemtemaʼa, da ndeda skwi man i ɓüco tèlè a ma.

¹³ Aman i ngwoda ndo mizlinè ga, ko ngwoz ko nguraʼa, a ta pinyè,

¹⁴ a Zhiklè a slèmbèɗè, i da gi ma kè, aman a njénjèrèʼa, i da mbeɗa na a ma ke?

¹⁵ Nengaʼa man a ngiyè, ngau nengaʼa ka ɓi ɗè? A gaka nga tʼhwaɗ mam ga cèw ba ka bi dè?

¹⁶ Man ndohi ntawassaʼa ta jhèɗè skwi te ri ga, i va ɓi ɗè? i jèkeda ngwoz mazai man a pakay di hèlèslè ɗè,

¹⁷ i hèdè skwi nʼndi a ndo, i vi skwi a kra diki azɓi, ɗè?

¹⁸ Az arsa ɓai! Nengaʼa a ngiyè a bab na, a fiyè a mam na daga gol ga.

¹⁹ I rka mbelaw ndo adai, ndo ntawassaʼa, maslaka na azɓai,

²⁰ a shid gèɗ a géɗ ga azɓi ɗè, a ngècè maslaka man ta tsu a gwots tambak ga, a tsi mtasl a vna.

²¹ I cè ri a zhiklè a géɗ mbelaw ndo, a géɗ man i rka ndo nʼnzay a deɓa a zhè a sam ncèmma,

²² dzegelau daʼai ga da pasl na, ri ga da ɓerzl na auda!

²³ Zlau Zhiklè a ngsyè, i slaha a i zlècè a sam wuɗi-bi na ɓai.

²⁴ I fi gèɗ a guro ga dè, i gaɗa na guro ndaɓalaʼa: Ka man i ce ka a ndav dè?

²⁵ I wuffa a géɗ skwi mèshèlè ga kumba dè? A géɗ skwi kumba man ri ga a ngotso dè?

²⁶ Aman i rka pats a si dai, a kia a sam,

²⁷ a mpay ndav ga a wai a i kalahi a deb sak tengaʼa –

²⁸ ko skwi haha, ar skwi ambaɓiaʼa man ta gi kita a géɗèʼa; ar i gu ri a sam Zhiklè te géɗèʼa.

²⁹ I wuffè aman ndo mayam ga a zi na, a i tsi wagèsh aman skwi mwuɗitpa a ga na dè?

³⁰ A mèdèp i pra ma ga aman a gèɗ ma mali azbai, a i derɗa nshèffè na ɓai.

³¹ A vava ndohi gi ga ta gaɗa: Ndo man zluèɗ te gi na nʼngeza bi wa?

³² Ndo mbrok a mʼmana auda ɓai, ko staɗ. I winè na ntamagai a ndo nsawalkaɗai.

³³ I ngheda mali ga a sam ndo dè, i ngheda mali ga te ndav ga ɗe,

³⁴ a géɗ man i gi zlau ndohi rèdèdèʼa, a gwoli ndohi tsaɗ tsaɗ ta pray zlau a va, a i nza tètèʼa, a i shkè auda a ntamagi azɓi – ɗè?

³⁵ A woy i ngots ndo man a fi zlembaɗ a ma ga! Na haha ntsi ri ga. Zhiklè da mbeɗkay a ma! Aman agassa i ngots ma man ndo mayam ga a pinyè te pa,

³⁶ a vava i woy a i fi a ba, a i vi a skwi mpèɗè gèɗ ga.

³⁷ I woy a i ngra na civèɗ tèlè man i do a pa. I woy a i herda na va ara bai.

³⁸ Aman dak ga a tsay derngsal, aman wurihi nengaʼa tèlèba ta kuɗai,

³⁹ aman i ɓicko skwi auda te pa genè, i va na di man a nengaʼa ɓai, aman ndo ngiɗè a pezay gi dau, a i ndu vazaza nengaʼa,

⁴⁰ nkuɗdzarai da ftskaɗa pa te di man a dau, kuza ambalai te di man a morarai. Nta njè ma Job klèng.