Job 30 - Ma Zhiklè

¹ Aman antanta ndohi ngrekaɗ a deɓa ta ngwossahayè, ko babhi tengaʼa, dara kda a ntamagi a géɗ tengaʼa.

² Ri tenga ba a slaha a ngi skwi ɓai, ko kèshkata.

³ Ta tiɗè a mai, ta hezhèk ta, ta ri zluzlor wof tʼhèshèkèd.

⁴ Ta pèr nyi boss, ta ri bezlam a ta peɗiaʼa.

⁵ Ta dzam ta auda te va mpi ndohai, ta tsi lalau a verzi tengaʼa ara man a verzi ndo metsar.

⁶ Ta nzi a nkuzlor iyam, te vèvèɗ, te slrats za,

⁷ ta kuɗi tʼhwaɗ wof ntustusaʼa, ta ndeɗatseda va a va bolmbolo.

⁸ Tsokoɗof ndohai man ta sun verzi ta ɓai, man ta dzam ta auda te kokwar.

⁹ Antanta ta gècè a géɗ ga, ta njè njè-kènè a iyè.

¹⁰ Ta de ta auda a sam ga, i ndara ta, ta njfedyè.

¹¹ A géɗ man Zhiklè a nkwolyè, a mʼmanday gèɗ a hai, ta preda ma ta a hi a sam ga.

¹² Tsokoɗof ndohai ta zlatskay a gèɗ, ta te civèɗ ri mandai, ta helamay sak a civèɗ.

¹³ Ta gedassa civèɗ a ma ga, ta woy a ta zedyè, ndo ngiɗè a gaɗa ta: kin gu ɓai, a gaɗa ta azɓai.

¹⁴ Ta shkè a ta bizhè a zlazlar man mʼmbeɗ na ma, ta mèmiɗko va ta auda tʼhwaɗ nkulama.

¹⁵ Skwi mwuɗitpa a nʼngwoday va a gèɗ, ta cèmay nɗaɗav ga ara man kozlar a mco; skwi mʼmbelyè a woss na ara vanai.

¹⁶ A ndav ga a mbeɗ na, pats nlèyè nkeɗyè a hai.

¹⁷ A vaɗ a dzahay te vatasl, i shèk va a dia azɓai.

¹⁸ Ta terɗay maslaka a va a wuɗai, a mitèmay daʼai.

¹⁹ A Zhiklè a nkaldyè a va draɓ, iyè ara mberfenèk, ara mèrwèc.

²⁰ I kuɗi a sam ngaya, a ka mbeɗkay a pa azɓai. I zlatsa a sam ngaya, ka pay di azɓai.

²¹ Ka ga a ndo mayam ga mwuɗitpa, ka gu shèwa a iyè a ri ngaya man wuɗi na zhè.

²² Ka fiyè a va kozlar, a nciyè, a i zi ga a va ndombozlor.

²³ I suna, ka diyè a sam mʼmetsai, a sam man ndohi tèlèba ta da ɓicè va a pa.

²⁴ Aman ndo man a zi na a hwaɗ iyam, a gedè ri auda az ɗè? A gi wobau, ga a zi azɓi dè?

²⁵ Ndo man skwi mwuɗitpa a ga na a kuɗi azɓi dè? Ndo ntawassaʼa a kuɗi te ndav na azɓi dè?

²⁶ I zhor skwi man amba – a skwi man ambaɓi a shkè. I zhor skwi nhel sam – a ruva a shkè.

²⁷ Vayats tʼhwaɗ ga a ngwèdè va tsulvoɗ-tsulvoɗaʼa. Pats nlèyè a nkalkay a gèɗ.

²⁸ I gwora, pats a ngworyè ka ɓai. I slambaɗa te va mpi ndohai a i gi wobau.

²⁹ I ndaʼa a kramam nvalaval, a mandal zhèrèuhai.

³⁰ Hutèɗ va ga mɓüt na, vogwa a va a ruɓamay vatasl.

³¹ I tsi ganzavar a i gi wobau a deɓaʼa. I vèɗè shingelèk a i kuɗi a deɓaʼa.