Job 29 - Ma Zhiklè

Job a goɗ a géɗ va na

¹ A Job a hüno ngèɗ ma nengaʼa zaʼa, a ngaɗa:

² Aman agassa i nza ara nhalaʼa, te va man Bi Zhiklè a ɓeryè!

³ Aman skwi nhél sam nengaʼa a zhè a géɗ ga, a i beza a ndev ruva a vna.

⁴ Ara man a pats man wuɗi ga a zhè dai, man Bi Zhiklè a ɓer gi ga,

⁵ man Zhiklè Bi-wuɗai a zhè a nda iyè, a wudahi ga ta a tsagi ga!

⁶ Te va man i pèn va te mokoyom, a mbar a hakaɗauda te za a tsagi ga ara iyam.

⁷ A pats man i do auda a ntamagi kokwar, a i feda sam nʼnzi ga a pa,

⁸ a golahi ta rkayè a ta hu ta a iyè. Ndohi nhalaʼa ta slambaɗa a ta zlatsa.

⁹ Bigolahi bai ta nza tètè, a ta pizlè ma ta.

¹⁰ Ndohi mbibihiaʼa ta gada skwa ɓai, nèʼèn tengaʼa a ntkots na a ngerɗak.

¹¹ Ndo man a tsena ma ga a zlembaɗ, a shid gèɗ a géɗèʼa; ndo man a rkayè a di na, a ngu malwuɗi a géɗ ga.

¹² Aman i mbel ndo ntawassaʼa man a kuɗai, a kra dikai man a ngatsa ndo ntakaha ngiɗè ɓai.

¹³ Mbelaw ndo a pshèy ma, a i wuffedè ndav ngwoz mazai.

¹⁴ Ngi-zura ga nara maslaka man i feda a va; ma kita ga ara dawar ga, a skwi mpèɗè gèɗ.

¹⁵ Ndo mandazlai a fiyè a di na; ndo vedal a fiyè a sak na.

¹⁶ I bab ndohi ntawassaʼa, i nza na a deɓa a ndo mbrok te kita.

¹⁷ I paslama na mahazau a ndo malai, i ngezlama na skwi auda te ma.

¹⁸ I hur i gaɗa: i da metsi ara mpasla torok, a patshi nshèffè ga ta ngrè azɓai ara wyak.

¹⁹ Zluzlor ga a tèr ri a va iyam, a minmèn a nzi a géɗ ri wof ga.

²⁰ Nʼnjèlè ga a zhè a sam ga pèc pècèk, lèkèɗ ga a kèlè te ri ga azɓai.

²¹ Ta fu zlembaɗ a ma ga, ta zhor ma ga. I ngra ta maya, a ta nza tètè.

²² Man i goɗa, ta nza tètè, i dizh ma ga a géɗ nengaʼa.

²³ Ta zhor ma ga ara man ta zhèr iyam, ta winè ma ta ara man ta zhèr iyam mbelèkwai.

²⁴ Aman ta gu zlau, i pre ta hai. Ta slaha ta cèmay pombi auda a di ɓai.

²⁵ I gaɗa ta skwi man ta giaʼa, i tsuvom ta. I nza ara bai te va ndohi nhayaʼa, ara ndo man a bid ta ndohi man ta lèyè.