Job 27 - Ma Zhiklè

Job a ndeva ma nengaʼa man a gaɗa ta mandalahi na

¹ A Job a hüno ngèɗè ma nengaʼa zaʼa, a ngaɗa:

² Zhiklè, man a ngay kita a géɗ; Zhiklè Bi-wuɗai, man a ɗawaramay ndav, a zhè a nshèffè.

³ A vava man i shèffè dai, a nshèffè a zhè te iyè dai,

⁴ ma nzura ka ɓai, a da shkè auda te ma ga azɓai, nèʼèn ga a da cèkèlma azɓai.

⁵ I woy a i gada: Kin goɗ zuraʼa, i gèɗè azɓai. Ko i metsi ga, i minde ma ga a deɓa azɓai: i ga mali ɓai, i gèɗè genè.

⁶ I gshè va a ngi-zuraʼa ga, i jèkè azɓai. Mèzhèɓ ndav ga a ngay ndzoan ɓai, ko pats staɗ.

⁷ Da gu a sam ndo mayam ga ara man a gi a ndo nderɗe Zhiklè; a sam ndo shè-wa ga ara man a gi a ndo ambaɓiaʼa.

⁸ Aman ndo ambaɓiaʼa a zhèr mè, aman Zhiklè a jhèɗè nshèffè na a deɓa?

⁹ Aman matakwan a kala na va, Zhiklè a da tsena kuɗa nengaʼa dè?

¹⁰ Ada wuf-fè a géɗ Zhiklè Bi-wuɗi dè? A da tsi ri a Zhiklè pèc pècèk dè?

¹¹ I woy a i slebda kinè skwi man ri Zhiklè a giaʼa. Skwi man Zhiklè Bi-wuɗai a hérèʼa, i nghédè a sam kinè azɓai.

¹² Aman kin tèlèba kin rkaʼa a di kinè. Kos kin gèɗè ma ambali haha èhèmè?

¹³ Skwi haha ndohi ambaɓihiaʼa a ndohi ngi wuɗai ta ngècè a sam Bi Zhiklè:

¹⁴ Aman wudahi tengaʼa kumba, tsakwal a da ndev ta ma. Wudahi tengaʼa ta da ngézhè a movar azɓai.

¹⁵ Njèkèɗiaʼa, gidiɓèr a da hel ta ma, a ngwozi mazihai ta tsa ta lalau a gèɗ azɓai.

¹⁶ Ko a mɓüco Suli ara wyak, a cèm maslaka a gi ara ksof,

¹⁷ a wèl va ma ba, aman ndo nzuraʼa a nda pia a va, a ndo man a woy Zhiklè, a da gi mizlinè a sulai.

¹⁸ A kalawa gi na ara mbèzlkuɗèc, ara gèjèk dak man ndo mɓer dak a giaʼa.

¹⁹ Aman a mènè-hai, ndo mèshèlè dai; aman a piɗèkwe ma, skwi na asaɓai.

²⁰ Zlau a gshèʼa ara iyam mbiaʼa. A vaɗ ndombozlor a cedama.

²¹ Kozlar te civèɗ mvéng pats a gai, a cedama, a cè na auda a sam nʼnzi na.

²² Zhiklè a tsiaʼa, a sia te va azɓai. Aman a tsiaʼa, ndo ambaɓiaʼa a woya a hi na a pa.

²³ Ndohi ta tsi ri pèsl-pèslèʼa a géɗ nengaʼa, a ta ngwossaha.