Job 24 - Ma Zhiklè

¹ Zhiklè Bi-wuɗai a ngreda pats man a gi kita azɓi èhèmè? A ngreda ta pats nasa a ndohi nengaʼa ɓi èhèmè?

² Ndohi ambaɓihiaʼa ta herdaha kumba, ta gi metsar skwai a ta ndeda a skwi ta.

³ Kɗèh kra dikai, ta cedama. Mari ngwoz mazai, ta cèma na a ta da pil dua ta a vna.

⁴ Ndo ntawassaʼa ta dzamaʼa, mbelaw ndohai ta hi ta a ta ngheda va te ri ta.

⁵ Ta wurrè hèshèkèɗ a prèk te gai, a ta da hèsh skwi nʼndai. Wudahi ta ta ngatsa skwi nʼndi ɓai.

⁶ Ta tsi dau a vaɗ, ta ri vanda.

⁷ Ta manahi adai, maslaka az a va ɓai; man mtasl a keɗ ta, borkwa azɓai.

⁸ Iyam te Zhiklè a pan ta; gi ta azɓai, ta nghede va a der kwa.

⁹ Kra dikai, ta ngezlama na auda a wa mam na, ta preda kra ndo ntawassaʼa a ma.

¹⁰ Ta shèwèlè, maslaka az a va ɓai, ta co nkèl dau, mi a keɗ ta.

¹¹ Ta ɗècè mbar tʼhwaɗ gi ndohi ambaɓihiaʼa. Ta dècè nyi wof, a iyam a dza ta.

¹² Ta dzam ta auda te kokwar, te gai; wudahi tengaʼa ta kuɗai, aman Bi Zhiklè a nde zlembaɗ na a kuɗ tengaʼa.

¹³ Ta woy skwi nhel sam bai, ta woy civèɗ nengaʼa ɓai, ta bizhè a civèɗ nengaʼa azɓai.

¹⁴ Ga sam nciɗè, ndo nkeɗe ndo a nslambaɗa na, aman a hèsh mbelaw ndo, ndo ntawassaʼa. Ndo metsar a gi metsar a vaɗ.

¹⁵ Ndo mphömè a zhèr sam nkezawaʼa, a hur: ndo da rkay ɓai! A paɗa di na.

¹⁶ A vaɗ a zlin gai, man a zeɓdahi a pats.

¹⁷ Ta fu ruva a pats ta, zlau man a dzi a ndo a vaɗ ta fu a mandal ta.

¹⁸ Ndo ambaɓiaʼa a hi tsam-tsam a géɗ iyam, nʼndi-gi nengaʼa mphomda tʼherkeda, a gshè civèɗ gi lak asaɓai.

¹⁹ Pats a vazaza ta gwora iyam. Sam mʼmetsai a gerɗe ta ndohi malihi a ma.

²⁰ Ko mam na a sun nengaʼa ɓai, ta hér nengaʼa azɓai, a jenaha ta maturdihai; ndo nzura ka ɓai mpasl na ara wof.

²¹ A ga na matakwan a deli ngwoz, a ga na skwi mwuɗitpa a ngwoz mazai.

²² Zhiklè a va ta wuɗai a ndohi ngi wuɗai. Ko nshèffè a ngezla ta a gèɗ, ta slèmbèɗè zaʼa.

²³ Zhiklè a va ta wuɗai aman a ta thè va a vna. A pi di a civèɗ ta.

²⁴ Ta nzi a mbiaʼa kèshkata genè; aman te deɓaʼa ta ndev ta. Zhiklè a manda ta gèɗ a hai, a ngelama ta nshèffè ta, ara nda ndohi herkeda ngiɗè tèlèba, ara man ta tsi dau.

²⁵ Ar haha ka ɓi dè? Nda gaɗayè ka tsokol ma wa? Nda wossay ma ga aussa wa?