Job 23 - Ma Zhiklè

Job a mbeɗa na ma a Eliphaz

¹ Job a hüno a ngaɗa:

² Ko a patsna ba, aman i kuɗai, i virslè. Ri Zhiklè a nzalay va a gèɗ te va wobau ga.

³ Aman agassa i sun sam man i ngècèʼa a pa, a i slaha a i ndikè a sam nʼnzi bi nengaʼa!

⁴ Ar i tsa na matakwan ga, i ngra na malwuɗi ga,

⁵ i tsena ma man a nda mbeɗkay a pa, a i fi zlembaɗ a ma na man a gaɗkayè.

⁶ Ar nga da virslè a vna a wuɗi dè? Aʼai, sèi da fu zlembaɗ genè!

⁷ A da suna, a virslè a ndo nzuraʼa, a i pra auda te ri ndo kita ga a mèdèp.

⁸ Aman i dè a civèɗ mvéng pats – na te pa ɓai. Aman i dè a civèɗ nkél pats – i rka ɓai.

⁹ I hoss a civèɗ man a ndè a géɗèʼa – i ngatsa ɓai. I ngwodko ma ga a deɓa a civèɗ dukwaɗ – i rka ɓi genè.

¹⁰ Nengaʼa a sun civèɗ man i bizhè a pa. Aman a jkedyè, a ngatskayè ara guro ndaɓaiaʼa, mwosla a vogwa.

¹¹ Sak ga a jèjèr sam sak na, i dzodzor civèɗ na, i beza zlawa ɓai.

¹² Ma nkwèr man a gaɗayè, i jèkeda ɓai. I bür ma nengaʼa te ndav ga.

¹³ A skwi man a hérèʼa a nda giaʼa, a gedassa civèɗ nengaʼa wa? Skwi man ndav nengaʼa a woyaʼa – a giaʼa.

¹⁴ Nengaʼa a da rufa skwi man a hérè a géɗ ga, skwi tsaɗ tsaɗ.

¹⁵ Gar haha i gi zlau a sam di na. Aman i rkaʼa, i gudzi a pa.

¹⁶ Zhiklè a mbeɗamay ndav, i gi zlauaʼa. Zhiklè Bi-wuɗai a mpay zlau a gèɗ.

¹⁷ I gi zlau nengaʼa, ruva ka ɓai.