Job 20 - Ma Zhiklè

Ma Tsophar macecèwaʼa

¹ Tsophar te Naama a hüno a ngaɗa:

² Gar haha, gèɗ ga a ngray maya, a i mbeɗa ka a ma tsam-tsam.

³ Aman ka ngatsay maya, ka derdyè, ka mbeɗkay a ma ambalai.

⁴ Ka sun zlèzlèa bi dè? Daga man ndohi ta zhè a géɗ herkeda:

⁵ Mwuffè ndohi nderɗe Zhiklè a nzi kumba azbai. Mwuffè ndo malai a ndiv na tsam-tsam.

⁶ Ko a da gi a mbiaʼa, a lama na balak zhiklè, a gèɗ na a ndikè a va vanai,

⁷ a da ndiv na ara mèzhèɓ. Ndohi man ta rkaʼa ta gada: Kala ma?

⁸ A dè na ara nshunè, ta ngècè te deɓaʼa asaɓai, a hi na ara skwi man ta rka te nshunè a vaɗ.

⁹ Ndo man a rkaʼa, a rka te deɓaʼa asaɓai, a sun sam nengaʼa ɓai.

¹⁰ Wudahi nengaʼa sèi ta pel ta ndohi ntawassaʼa man a mco skwi a metsar a sam ta.

¹¹ Va nengaʼa ndaɓaraʼa ara gola, aman kala vèvèɗ a vna.

¹² Aman skwi ambaɓiaʼa a jènaha, a nʼngheda te ma na,

¹³ a ɓerè te ndav na, a jèkè azɓai, a nzi te gèɗ na,

¹⁴ a nde na dèrè te va.

¹⁵ Skwi mèshèlè man a ndau, a da vinèhèdaussa; Zhiklè a ckoɗauda tʼhwaɗ na.

¹⁶ A nsusɓa dèrè zhüzhok, mtümsho a nkeɗaʼa.

¹⁷ A slaha a mwuffe azɓai a sam mbar man a hai, a sam vongwom a mbar wa.

¹⁸ Skwi man a ɓüco, a slaha a mwuffè a géɗ nengaʼa azɓai, sèi a mindè a deɓa. Skwi man a gu ri te pa, a va na mwuffè azɓai.

¹⁹ A mbazl ta ndohi ntawassaʼa, a njèkè ta a pa, a nduma gai, aman a rèmè a pa azɓai.

²⁰ A nʼngeza te ntétèkè nenga ɓai. Skwi mèshèlè nengaʼa a mbelaʼa azɓai.

²¹ Golahwaɗ nengaʼa man a giaʼa, skwaʼa a nʼngeza na ɓai. Gar haha skwi nengaʼa a nzi azɓai.

²² Te mwèl va nengaʼa kumba, mi a da kéɗèʼa; matakwan tèlèba a kala na va.

²³ A da gi ar haha: te va man a ndi skwi nʼndai, Zhiklè a ga na ndzoan a va, a nkalda na ndzoan a gèɗ.

²⁴ Aman a hi na te ri tsakwal, ta ɓèrèʼa a sulom,

²⁵ a tsi gèɗ auda a deɓa, a ndza na menaɗ. Zlau a dza na.

²⁶ Ruva tèlèba a ngalda pa, vogwa man ndo a mvotso ka ɓai, a nʼndedama. A ndi njèkèɗi skwi te gi nengaʼa a ma.

²⁷ Giɗfèk a ngreda mali na auda; herkeda a slambaɗka na va;

²⁸ iyam mbiaʼa a ceda gi nengaʼa a ma, a pats ndzoan nengaʼa.

²⁹ Nasa man ndo ambaɓiaʼa a ngècè te ri Bi Zhiklè, Nasa skwi ntul ndo malai a sam Zhiklè.