Job 18 - Ma Zhiklè

Ma Bildad macecèwaʼa

¹ Bildad te Shuach a hüno a ngaɗa:

² Ka da ndivè njè-ma ngaya a ngèmè? Fu zlembaɗ, aman nga, nga gèɗè dai!

³ Ka rka nga ara skwi dak ambali èhèmè? Ka rka nga ara fali ndohai èhèmè?

⁴ Ka kuɗi va ngaya a ri ngaya. A géɗ shèwa man ka giaʼa, herkeda a ndi na hèshèkèd a géɗ ngaya dè? Za a jèkè sam nengaʼa, a dè a sam ngiɗè, a géɗ ngaya dè?

⁵ Halau, skwi nhél sam ndohi shèwa a mbèc na, a vogwa tengaʼa a hél sam azɓai.

⁶ Skwi nhél sam te gi ta a mbèc na, vogwa te pitirla tengaʼa a mbèc na.

⁷ Zhiklè a kedaha sak ndo mwoslaʼa; maya man a ngotso a ri na a slafadama na sak.

⁸ Sak nengaʼa a da a gaɗda, a mbècè a géɗ ɓalai.

⁹ Laci a ngsko ndudok sak na, votok a ngso.

¹⁰ Teɓa man a gshèʼa, mpa tʼhai; gaɗda man a gshèʼa a zhè a civèɗ.

¹¹ A sam tèlèba a pa na zlau a va, a ta jèjèr sam sak na.

¹² Tiɗè mi a di a shke ma, matakwan a zhè a tsagi na.

¹³ Matakwan nengaʼa a ndi hutèɗ va na, bi mʼmetsai a ndi zluèɗ va na.

¹⁴ Ta ngozlkoɗauda te gi na mana nza te pa a gumai, a ta daʼa a sam bi wuɗai.

¹⁵ Skwi ngédèshè te gi na, skwi mvècè vogwa nksara te gi na.

¹⁶ Te vèvèɗ, zluzlor ngwora ma, a géɗèʼa, ri wof a ɓüt na.

¹⁷ Ta hér nengaʼa tʼherkeda azɓai; nzlembaɗ nengaʼa a zi na a géɗ herkeda.

¹⁸ Zhiklè a zukdkoɗauda a sam nhelaʼa, a zukda a va ruva, a dzomkoɗauda tʼherkeda.

¹⁹ Tser nengaʼa, verzi nengaʼa, a zi na auda te va ndohai; njèkèɗi ndohi a te gi na ɓai.

²⁰ Ndohi herkeda te civèɗ nkèl pats ta rzl ta a géɗ ndikè-ma nengaʼa. Ndohi herkeda te civèɗ mvèng pats, a ndara ta.

²¹ Nasa gi ndo nzuraʼa ka ɓai, nasa sam ndo man a sun Zhiklè ɓai.