Jérémie 44 - Ma Zhiklè

¹ Ma Zhiklè a sam Jérémie, a géɗ ndohi Juda tèlèba, man ta nza te kokwar Egypte, tengaʼa man ta nza te Migdol, te Tachpanès, te Noph, te Pathros:

² Zhiklè bi mbiaʼa, Zhiklè Israel, a goɗ ar haha: Kin rka skwi ambaɓia tèlèba man i ga na Jérusalem, a kokwarhi Juda tèlèba. A patsna diki tèlèba, ndo a nzi a pa azɓai.

³ A géɗ skwi man ambaɓai man ta gau, a ta pokoy gèɗ ndav auda a vna, a to do a ta vi skwi a ta gi mizlinè zhiklè ngiɗè, man ta sen ta ɓai. Kinè a babhi kinè kin gau arsa.

⁴ I zlinde ta ɓèlèlihi ga tèlèba, ndohi nhadka ma, i zlinde ta a ta wurra na va a ngèɗè a prèk te gai, a i gaɗa ta: Kin gu skwi hori man a ndarayè ɓai!

⁵ Aman ta tsena ɓai, ta fa zlembaɗ ɓai, ta jèkeda mali ta ɓai, ta jèkeda mʼmbèh skwi ɓai.

⁶ Te deɓaʼa ndzoan ga mwuɗitpa a ngau, a nfa na vogwa a kokwarhi Juda tèlèba, a civèɗ Jérusalem, ta mbeɗ ta, ta ga a dikai, ara man a zhè a patsna.

⁷ Anai, Zhiklè bi mbiaʼa, Zhiklè Israel, a goɗ ar haha: Kin ga na skwi ambaɓiaʼa a vata a va kinè èhèmè? Kin zede nguraʼa a ngwoz a kra a kra wa te ndev Juda, a kin jèkaha ta ɓai.

⁸ Kin pokoy gèɗ ndav auda a skwi man ri kinè a giaʼa, a kin va ta skwi a zhiklèhi ngiɗè te kokwar Egypte, man kin do a pa, a kin da nzi a pa, a kin zede nshèffè kinè; kin phomda, a kin gi a skwi horai a sam ndohi herkeda tèlèba.

⁹ Mali babhi kinè a mali bihi Juda, a mali wud bihi na, mali kinè a mali ngwozi kinè, man ta gu te kokwar Juda, a civèɗ Jérusalem, ta pca kinè a gèɗ ma dè?

¹⁰ Kin hur mali ɓai, ha patsna, kin ga zlau ɓai, kin dzadzara ma kita a ma nkwèr ga man i va kinè, a i va ta babhi kinè, ɓai.

¹¹ Gar haha, Zhiklè bi mbiaʼa, Zhiklè Israel, a gaɗa: Na haha, i ngwoda kinè dai, a i ga kinè matakwan, a i zeda Juda tèlèba.

¹² I hil njèkèdi Juda, tengaʼa man ta pu di a kokwar Egypte, aman ta dè a pa, a ta nzi a pa, a ta da zi ta tèlèba. Ta da zi ta te kokwar Egypte, a tsakwal, a mai, nkèshèa a mbiaʼa, ta da bazl ta a tsakwal, a mai, ta gedas ta, ta lèyè, ta ga a skwi mphomdaʼa, a skwi horai.

¹³ I ga ta kita a tengaʼa man ta nzi te kokwar Egypte, ara man i gu kita a géɗ Jérusalem, a tsakwal, a mai, a gidiɓèr.

¹⁴ Ndo man a hi azɓai; ndo man a mʼmbelda va na ɓai te va njèkèdi ndohi Juda, te va ndohi man ta dè a kokwar Egypte, a ta nzi a pa. Ta dè deɓa a kokwar Juda, man ta woy a ta dè deɓa, azɓai. A vava ta da shkè a deɓa asaɓai; man ndohi man ta wuc ta kètè genè kla!

Mʼmbèh skwi a pats

¹⁵ Ngurhi tèlèba man ta suna, ngwozi ta, ta vu skwi a zhiklè ngiɗè, ngwozi tèlèba man ta ɓica va kumba, a ndohi tèlèba man ta nza te kokwar Egypte, te Pathros, ta gaɗa na Jérémie:

¹⁶ Ma man ka menda nga a nzlembaɗ Ndo nzi pèc pècèk, nga fi gèɗèʼa azɓai.

¹⁷ Nga woy a nga gi skwi tèlèba man a shkè auda te ma nga, nga gaɗa: nga vi skwi a pats te giɗfèk, a nga va na skwi nga, ara man nga gau, nga a babhi nga, bihi nga, wud bihi nga te kokwar Juda, a civèɗ Jérusalem, te va man movar a ngeza nga, nga wuffè, a nga sun matakwan ɓai.

¹⁸ Aman te deɓ man nga jèkeda mvi skwi a pats te giɗfèk, nga va na skwi ɓai, nga tèkwèn skwi tèlèba, nga zi nga a tsakwal a mai.

¹⁹ Te va man nga va na skwi a pats te giɗfèk, a nga va na skwi nga man nga tau mɓelaslasla, baki nga a nsenaha ɓi dè? Nga gau a nga va na.

²⁰ Te deɓaʼa Jérémie a ngaɗa ta ndohi tèlèba, ngurhi, ngwozi, a ndohi tèlèba man ta gaɗa na:

²¹ Skwi man kin vau te kokwarhi Juda a civèɗ Jérusalem, kinè a babhi kinè, bihi kinè, wud bihi kinè, a ndohi kokwar, Ndo nzi pèc pècèk a sun ɓi ɗè? Nhera skwi haha ɓi ɗè?

²² Anai, Ndo nzi pèc pècèk a woya a nrka maya kinè man ambaɓai, a skwi hori man kin giaʼa, asaɓai. A géɗ nengaʼa kokwar nga ngedas na, a lèyè, mphomda, ndo a nzi a pa azɓai, ara man a zhè a patsna.

²³ A géɗ man kin vau skwi a kin gau malai a sam Ndo nzi pèc pècèk, kin tsena ma nengaʼa ɓai, a kin dzadzara ma kita nengaʼa ɓai, ma nkwèr nengaʼa, ma malwuɗi nengaʼa, a géɗ nengaʼa kin kala a matakwan, ara man kinè te pa, a patsna.

²⁴ Te deɓaʼa Jérémie a ngaɗa ta ndohi tèlèba, a ngwozi tèlèba: Va-tsena ma Ndo nzi pèc pècèk, kin tèlèba, ndohi Juda man kinè a zhè te Egypte!

²⁵ Zhiklè bi mbiaʼa, Zhiklè Israel, a goɗ ar haha: Kinè a ngwozi kinè, kin goɗ te ma kinè, a kin ngreda a ri kinè, a kin gaɗa: Nga da gi ara man nga gaɗdahai. Nga da vi skwi a pats te giɗfèk, a nga va na skwi nga! Anai, va-gu skwi man kin gaɗdahai!

²⁶ Aman va-tsena ma Ndo nzi pèc pècèk, kinè ndohi Juda tèlèba, man kin nza te kokwar Egypte: lyè i mbaɗa a nzlembaɗ ga, Ndo nzi pèc pècèk a gaɗa: Ndo Juda ani da tsu ri a ma ma a nzlembaɗ ga asaɓai, a ngaɗa: Bi Zhiklè Ndo nzi pèc pècèk da zhè a nshèffè, te kokwar Egypte tèlèba, da goɗ ɓai!

²⁷ lyè i da war ta; i da ga ta matakwan, skwi mbelaʼa ka ɓai. Ta da zi ta, ndohi Juda tèlèba, man ta zhè te kokwar Egypte, a tsakwal, a mai, ha ta ndiv ta.

²⁸ Ndohi man ta hu ta te ri tsakwal, ta da shkè ta a deɓa te kokwar Egypte, a ta shkè a kokwar Juda; njèkè ndohi kètè genè; A njèkèdi ndohi Juda man ta do a kokwar Egypte, aman ta nzi a pa, ta da shinèʼa: ma ngè man nzuraʼa: ma ga ɗè, ɗè ma tenga ɗè?

²⁹ Na haha skwi man i ngreda kinè, Ndo nzi pèc pècèk a gaɗa: i da ga kinè kita a sam haha, a kin da shinèʼa, ma ga a vava a géɗ kinè, nrufaʼa a matakwan.

³⁰ Gar haha Ndo nzi pèc pècèk a gaɗa: Na haha i da va na Pharaon Hophra, bi Egypte, a ri a ndohi mayamhi na, a ri a ndohi man ta woy a ta zede nshèffè na, lèmèlèmè ara man i vau Sédécias, bi Juda, a ri a Nebucadnetsar, bi Babylone, ndo mayam na, man a woya a nkeɗaʼa.