Jean 7 - Ma Zhiklè

Kramamhi Yèsu ta ca a ndav ɓai

¹ Te deɓaʼa Yèsu a nsawala, a nsawala te kokwar Galilee, a woya a nshè-wèlè te kokwar Judée ɓai. A gèɗ man ndohi Juif ta woy a ta keɗaʼa.

² Ndul ndul ar ngolala ndohi Juif, ngolala man ta gia te godzovok.

³ A kramamhi nengaʼa ta gaɗa na: Slambaɗa, a ko do a kokwar Judée, a golahi ngaya ba ta rka mizlinè man ka giaʼa.

⁴ Ndo a nghédè skwi na azɓai man a woy ndohi ta shinèʼa. Aman ka gu ar haha, ngreda va ngaya auda a sam ndohi herkeda!

⁵ Aman kramamhi nengaʼa ba, ta ca a ndav ɓai.

⁶ A Yèsu a ngaɗa ta: Tiɗè sam man a ga di ka ɓai; aman a kinè tiɗè sama ma.

⁷ Herkeda a slaha a ngi shèwa a kinè ɓai, aman nengaʼa a gi shèwa a iyè, te man i ngreda mizlinè nengaʼa man ambaɓai, auda.

⁸ Vo-do ngolala sa ar kinè! Iyè, i woy a i dè ɓai; tiɗè sam man a ga di ka ɓai.

⁹ Aman a ngaɗa ta ma haha, a nʼnze na a deɓa a kokwar Galilèe.

Yèsu te ngolala ndohi Juif

¹⁰ Aman kramamhi nengaʼa to do a pa ma, nengaʼa ba a mdo. Aman a sam di ndohi ka ɓai, a mdo a metsar.

¹¹ A ndohi Juif ta woyaʼa a sam ngolala, a ta gaɗa: Na tema?

¹² A ta goɗ ma a metsar ruɓ-ruɓ-ruɓaʼa te ndev nhèyè ndo. Matrhiaʼa ta gaɗa: Nengaʼa ndo man amba; ndohi ngiɗè ta gaɗa: Azɓai, nengaʼa ndo nzlèkèdè ndo.

¹³ Aman ko staɗ a ngaɗka ma a géɗ nengaʼa auda zura bai. Ta gu zlau ndohi Juif.

¹⁴ Te ndev ngolala, Yèsu a mdo a gi Zhiklè, a nsenda ta.

¹⁵ A ndohi Juif ta rzl ta, a ta gaɗa: Nengaʼa a sunko ɗèlèwèr Zhiklè tema? Ta jènga na ɓai.

¹⁶ A Yèsu a mʼmbeɗa ta a ma: Njè-ma haha, a ga ka ɓai, aman a nengaʼa man a zlindekayè.

¹⁷ Ndo man a woya a ngi skwi ara man nengaʼa a woyaʼa, a slaha a ndèlèʼa: Njè-ma haha a shkè te Zhiklè dè, dè i goɗ te ma ga dè?

¹⁸ Ndo man a gèɗ ma a gèɗ va na, a woya a njégèr va na. Aman ndo man a woya nʼnjèl nengaʼa man a zlindekayè, nengaʼa ndo nzuraʼa, ncèkèlma a te nengaʼa ɓai.

¹⁹ Moise a mva kinè ma kita Zhiklè ɓi ɗè? Aman ko staɗ te ndev kinè a gi ara man ma kita Zhiklè a goɗo ɓai. Kin woy a kin kedyè èhèmè?

²⁰ A ndohi ta gaɗa: Madzagi a ga ka. A woya a nked ka wa?

²¹ A Yèsu a mʼmbeɗa ta a ma: I gu nrkedi staɗ, a kin rzl kinè a géɗèʼa tèlèba.

²² Gar haha Moise a mva kinè ma nʼngél ngwon. Ma nʼngél ngwon a shkè te Moise ka ɓai, aman te bababhai. A kin ngel ngwon ndo a pats nshèk va.

²³ Aman ndo a cè nʼngél ngwon a pats nshèk va, a gi a géɗ man a jèjèr ma kita Moise—kin gi ndav a géɗ ga, aman i mbela ndo dzafdzafaʼa a pats nshèk va èhèmè?

²⁴ Va-gu kita, a ndèl ndo te di ka ɓai; aman va-gu kita zuraʼa!

Nengaʼa Kristi ɗè?

²⁵ Ndohi tsaɗ tsaɗ te kokwar Jérusalem ta gaɗa: Ndo haha ndo man ta woy a ta keɗaʼa ka ɓi dè?

²⁶ Na haha, a njè ma a sam di ndohai, a ta gaɗa na ɓai. Ndohi nga mbibihiaʼa ta sun antanta a vava, nengaʼa Kristi dè?

²⁷ Aman nga sun sam man nengaʼa a shkè te pa. Aman Kristi a shkè, ndo a sun sam man a shkè te pa ɓai.

²⁸ A Yèsu a mboho a wuɗai te gi Zhiklè, a njè ta, a ngaɗa: A vava, kin senyè, a kin sun sam man i shkè te pa. I shkè a ri ga ka ɓai. Nengaʼa man a zlindekayè, nengaʼa nzuraʼa; aman kin sun nengaʼa ɓai.

²⁹ Aman iyè, i sun nengaʼa, te man i shkè te nengaʼa. Nengaʼa a nzlindekayè.

³⁰ A ta woy a ta gshèʼa. Aman ndo a nlama na ɓai. Tiɗè sam man a nengaʼa di ka ɓai.

³¹ Aman ndohi te va nhèyè ndo kumba ta co a ndav, a ta gaɗa: Aman Kristi a shkè, a slaha a ngi skwi malwuɗihi a fena na haha dè?

Sojèhi ta dè a ta woy a ta gshè Yèsu

³² A ndohi pharisie ta tsenaʼa, aman ndohi ta goɗ ruɓ-ruɓ-ruɓaʼa a géɗ nengaʼa. A ndohi pharisie a ndohi mvi skwi a Zhiklè mbibihiaʼa ta zlinde ta golahi tengaʼa, aman ta gshèʼa.

³³ A Yèsu a ngaɗa ta: I nzi a sam kinè kètè dai; te deɓaʼa i dè a sam nengaʼa man a zlindekayè.

³⁴ Kin da woyè, aman kin da ngatsyè azɓai. A sam man iyè, i zhè a pa, kin slaha kin dè a pa ɓai.

³⁵ A ndohi Juif ta goɗ a va ta: Nengaʼa a da dè ma, a nga ngècè azɓai? A woya man a dè a sam ndohi man ta venda gèɗ ta, a sam ndohi Grec, a njè ta ndohi Grec dè?

³⁶ Naha ma mè, aman a gaɗa: Kin da woyè, a kin da ngatsyè azɓai, a sam man iye, i zhè a pa, kinè, kin slaha kin dè a pa ɓai?

Woyam a iyam nshèffè

³⁷ A pats ndiv ngolala nʼnɗuzoʼa, Yèsu a nzlatsa, a mboho, a ngaɗa: Ko wawa man iyam a dza na, da shke a sam ga, a nsiaʼa!

³⁸ Ko wawa man a cyè a ndav na, ara ɗèlèwèr Zhiklè a gaɗa, te va nengaʼa Woyamhi a iyam nshèffè a ta hai.

³⁹ Ma haha a goɗ a géɗ Mèzhèɓ Zhiklè, man ndohi man ta co a ndav, a di ta ngècèʼa. Aman Mèzhèɓ Zhiklè nkezlaʼa a nshkè di ɓai, te man nʼnjèl Yèsu nʼngreda auda di ɓai.

Ndohi ta kezlaʼa

⁴⁰ Ta kumba te ndev ndohai, aman ta tsena ma haha, ta gaɗa: Nengaʼa ndo nhadka ma a vava.

⁴¹ Ndohi ngiɗè ta gaɗa: Nengaʼa Kristi. Ndohi ngiɗè ta gaɗa: Kristi a shkè te kokwar Galilée dè?

⁴² Ɗèlèwèr Zhiklè a ngaɗa ɓi dè, Kristi a shkè te tser David, te Bethléhem, kokwar man David a nza a pa?

⁴³ Gar haha ndohi ta kezlaʼa, a géɗ nengaʼa.

⁴⁴ Aman ndohi tsaɗ tsaɗ ta woy a ta gshèʼa. Aman ndo a nlama na ɓai.

Ndohi mbibihia ʼa ta ca a ndav ɓai

⁴⁵ A golahi ndohi mvi skwi a Zhiklè mbibihiaʼa a ndohi pharisie ta shkè, a tengaʼa ta gaɗa ta: Kin ckoɗa azbi èhèmè?

⁴⁶ A golahi ta gaɗa: Ndo ngiɗè a ngoɗ ma ara nengaʼa ɓai, ko halaʼa.

⁴⁷ A ndohi pharisie ta gaɗa ta: Kinè ba kin zlak kinè dè?

⁴⁸ Ndo mbiaʼa te va ndohi pharisie, man a nco a ndav, ngiɗè a zhi dè?

⁴⁹ Sèi ndohi man ta sun ma kita Zhiklè ɓai, ta phoma.

⁵⁰ A Nicodème, man a shkè a sam Yèsu a vaɗ, staɗ te va tengaʼa, a ngaɗa ta:

⁵¹ Ma kita nga a ga na kita a gèɗ ndo ɗè, man ta tsena ma nengaʼa, a ta rka mizlinè nengaʼa ɓai.

⁵² A ta mbeɗa na a ma: Ka ba, ka ndo Galilée dè? Ndo nhadka ma a mshkè auda te kokwar Galilée ɓai, ko staɗ.

⁵³ Te deɓaʼa ndo staɗ staɗ a ndo na ngwai.