Jacques 3 - Ma Zhiklè

Nèʼèn

¹ Dalahimam ga, ndo staɗ staɗ tèlè da gu a ndo njèngè ɓai. Aman va-suno, ndo man ndo njèngè ma, a da ngècè kita mwuɗitpa holholaʼa.

² Aman nga tèlèba nga kèlè a maharam tsaɗ tsaɗ kumba. Aman ndo man a gèɗ ma ambaɓiaʼa azɓi fèt, nengaʼa nʼngaʼa a ndo nshfaʼa ma, a slaha a ngshè va na tèléba.

³ Nga fa ta dzala a ma plèshihai, aman ta dè ara man nga woyaʼa, nga de ta a va ta tèlèba.

⁴ Na haha wuromhi a géɗ iyam, ko mbibihiaʼa; kozlar a erɗeka ta a wuɗai, ndo man a wurr wurom, ko man skwi nwurr wurom kèshkata genè, a dèʼa a sam man a woya a ndè a pa.

⁵ Lèmèlèmè nèʼèn ba, nfèfènva nkèshèa, a gèɗè skwi kumba; vogwa nkèshèa, a dè a ma ma a ndi skwi kumba.

⁶ Nèʼèn ba nara vogwa. Skwi ambaɓiaʼa tèlèba a zhè te nengaʼa. Te va nfèfènvahi nga, a lizhè va nga tèlèba, a pi vogwa a nshèffè nga; vogwa kita a ri na a pa na vogwa.

⁷ Skwi dakhi a ɗiakihi a zhüzhokihai a skwi nte iyam tèlèba, ndo a slaha a ndzaw ta;

⁸ aman nèʼèn, ndo a slaha a ndzawa ɓai, skwi man ambaɓai man a nzi tètè azɓai, nʼndha a dèrè mʼmetsai.

⁹ A nengaʼa nga slébèrdè Zhiklè, Bab nga; a nengaʼa za ba nga phomde ta ndohi ngiɗè, man ta gaʼa ara mèzhèɓ Zhiklè,

¹⁰ Mpshè ma a mphömdè ndo a shkè auda te ma staɗ. Da ga arsa a sam kinè ɓai, dalahimam ga!

¹¹ Nlèlè iyam a hodko iyam nwurzekzekaʼa a iyam mbelaʼa auda a sam staɗ ɗè?

¹² Dalahimam ga, kslor a slaha a nyi tsna ɗè? Hawan a slaha a nyi wondar ɗè? Lèmèlèmè nlèlè iyam staɗ a slaha a ngwèdè iyam nwurzekzekaʼa a iyam mbelaʼa azɓai.

Maya te géɗèʼa

¹³ Te ndev kinè ndo man a ngots maya te gèɗ, a nshin skwi, wa? Da ngreda maya nshèffè man amba te skwi man amba man a giaʼa, a ndav nlüɓekwaʼa, man a shkè auda te maya.

¹⁴ Aman srak nɗu-zlekzlekaʼa a shèwa a zhè te ndav kinè, kin dzugor va ɓai, a kin tseda na ma nzuraʼa a pa ɓai!

¹⁵ Maya arsa a shkè te géɗèʼa ka ɓai, aman maya haha a shkè tʼherkeda, te ndo, te madzagai.

¹⁶ A sam srak a shèwa, sam ndzakaɓa, skwi ambaɓiaʼa tsaɗ tsaɗ a pa.

¹⁷ Aman maya te géɗèʼa, nengaʼa nzuraʼa, ma nhènèkèa, ma gumai, ma wuɗi ka ɓai, a cè ma ndo ngiɗè ba, ndo a sia te va kumba, a gi skwi man amba, a pèr ndo mpèrè azɓai, a ngwèdè ndo azɓai.

¹⁸ Ngi-zuraʼa a vava, a shkè auda te ndohi man ta tsi gumai, a shkè auda te skwi man ta zlekau te gumai.