Jacques 2 - Ma Zhiklè

Kin por ndo mpèrè ɓai!

¹ Dalahimam ga, nga co Bi Yèsu Kristi a ndav, Bi nga te nʼnjèlè, lèmèlèmè ara kinè. Anai kin por ndo mpèrè ɓai!

² Aman ndo ngiɗè a dè a gi Zhiklè kinè, a tèslri guro te rai, a maslaka mbelaʼa a va – a ndo ntawassa ngiɗè ba a dè, a kècèkèc maslaka a va,

³ a kin pi di a ndo man maslaka mbelaʼa a va, a kin gaɗa na: Nzahai a sam mbela sa! —A kin gaɗa na ndo ntawassaʼa: Zlatsa a sa! man ɓai: Nzahai a herkeda a sam mpi sak ga sa! —

⁴ Kin pèr ndo mpèrè a ri kinè aranta, a kin ɗèlè a nher skwi man ambaɓi te ndav kinè ka ɓi ɗè?

⁵ Dalahimam ga, va-tsenaʼa! Zhiklè a mpar ta ndohi ntawassaʼa a géɗ herkeda haha, aman te ncè-a-ndav, ta ndi a ndohi mèshèlè, a ndohi nʼndi kokwar-Bi Zhiklè, man a mpasla ta ri a ndohi man ta woyaʼa a ndav ta.

⁶ Aman kinè, kin pa na hori a di a ndo ntawassaʼa. Ndohi mèshèlè a nga kinè wuɗai, a ta de kinè a sam kita ka ɓi ɗè?

⁷ Ta derɗe nzlembaɗ mbelaʼa man Zhiklè a baha kinè a vna, ka ɓi ɗè?

⁸ Aman kin jèjèr ma kokwar Bi Zhiklè, ara ɗèlèwèr Zhiklè man a gaɗa: Woy ndo a ndav ngaya, ara man ka woy nshèffè ngaya, kin gi amba.

⁹ Aman kin pèr ndo mpèrè, kin gi malai, a ma kita a ngwoda kinè kita ndo mali a gèɗ.

¹⁰ Ndo man a jèjèr ma kita tèlèba, njèkè staɗ man a ndzadzara ɓai, ara man a gu malai a sam njèkèɗia ma tèlèba.

¹¹ Aman Bi Zhiklè man a gaɗa: Ka gu mphömè ɓai, a goɗ lèmèlèmè: Ka kuɗ ndo ɓai! Aman anai ka gi mphömè azɓai, aman ka kéɗ ndo, ka gu mali genè a sam ma kita Zhiklè.

¹² Te ngèdè, te ngi skwai va-gu, ara ndohi man pats ngiɗè ta da ga ta kita, ara man ta ga ta ndohi man ta pre ta auda te ma kita ma.

¹³ Ndo man ndo a sia te va azɓai, kita ndo man ndo a sia te va azɓai a gshèʼa. Aman nsi ndo te va a fena kita.

Ncè-a-ndav man a gi skwi azɓai, skwa ambalai

¹⁴ Ndo a ngècè mè, dalahimam ga, aman a gaɗa: i co a ndav, te deɓaʼa a gi skwi ara man a nca a ndav ɓai. Ncè-a-ndav arsa a slaha man a mbelaʼa ɗè?

¹⁵ Gar kramam na, man ɓai demam na ngiɗè a zhè, man maslaka na azɓai, skwi nʼndi na azɓai,

¹⁶ a ndo ngiɗè te ndev kinè a gaɗa ta: Vo-do a gumai! Va-da dzu vogwa, da ɓaza va a skwi nʼndai! A kin va ta skwi man ta woyaʼa ɓai, a takaha ta a mè?

¹⁷ Gar haha ncè-a-ndav ba, man a gi skwi azɓai, nara skwi mʼmetsaʼa.

¹⁸ Man ndo ngiɗè a gaɗa: Ka, ka co a ndav, aman iyè, i gi skwaʼa: ngray ncè-a-ndav ngaya, te nengaʼa ngi skwi a shkè auda azɓai, a i da ngra ka skwi man i giaʼa, man a shkè auda te ncè-a-ndav ga.

¹⁹ Ka co a ndav, Zhiklè staɗ a zhè; nasa ka gu amba. Madzagihi ba ta co a ndav arsa, a ta gudzai.

²⁰ Aman ka, nrzla-va! Sèi suno, ncè-a-ndav man a gi skwi te deɓaʼa azɓai, skwa ambalai.

²¹ Abraham, Bab nga, a nʼngots ngi-zuraʼa a géɗ skwi man a gau, man a nco Isaac, kra nengaʼa, a mva na a sam mvi skwi a Zhiklè.

²² Te pa ka rkaʼa, ncè-a-ndav a hümdè a skwi man a gau. Ncè-a-ndav nengaʼa nʼnga jèlèlèʼa te skwi man a gau.

²³ Ar haha a gu ara ɗèlèwèr Zhiklè man a gaɗa: Abraham a nco Zhiklè a ndav, a Zhiklè a nfu a ndo nzuraʼa a géɗ ncè-a-ndav nengaʼa. A sam ngiɗè ta baha na mandal Zhiklè.

²⁴ Te pa ka rkaʼa, ndo a ngècè ngi-zuraʼa a géɗ skwi man a giaʼa, a géɗ ncè-a-ndav genè ka ɓai.

²⁵ Lèmèlèmè Rahab, fali ngwoz, a nʼngots ngi-zuraʼa a géɗ skwi man a gau, man a pe ta golahi Juif a gai, a mwucede ta auda a civèɗ ngiɗè.

²⁶ Va ndo, man nshèffè na azɓai, mʼmetsa; lèmèlèmè ncè-a-ndav man a gi skwa azɓai, nara skwi mʼmetsaʼa.