Jacques 1 - Ma Zhiklè

Mbalai

¹ Iyè Jacques, ɓèl Zhiklè, ɓèl Bi Yèsu Kristi, a sam verzi ndohi Zhiklè 12, man ta ksar ta. I ga kinè mbalai!

Ncè-a-ndav, a mʼmèndè gèɗ a hai

² Dalahimam ga, aman skwi tsaɗ tsaɗ a pe kinè a wai, va-rka ara mwuffè genè!

³ Va-suna, ncè-a-ndav kinè, te deɓaʼa man njkeda ma, a cko nzhèr skwia dai auda.

⁴ Nzhèr skwia dai a da ndivè mizlinè na, a kin ndikè a sam man kin gaʼa a ndohi nshfaʼa, ma az a géɗ kinè ɓai, a skwi man kin ngatsa ɓi ba, azɓai.

⁵ Aman maya ndo ngiɗè te ndev kinè a hcè, da tsu ri a Zhiklè, nengaʼa man a woya a va na ko wawa, a ndav amba, a jè-kaha azɓai.

⁶ Da tsu rai, da co a ndav, da pu gèɗ cèw ɓai; aman ndo man a pi gèd cèw, nengaʼa lèmèlèmè ara ngid va iyam, man kozlar a gidèʼa.

⁷ Ndo arsa da huro, i da ngècè skwi te ri Bi Zhiklè ɓai.

⁸ Ndo mpi gèd cèw a bizhè zlawa a civèɗ nengaʼa pèc pècèk.

⁹ Kramam nkèshèa, mohova ndo, da dzugor va a géɗ man Bi Zhiklè a slambaɗda na gèɗ.

¹⁰ Ndo mèshèlè da dzugor va, a géɗ man Bi Zhiklè a manda na gèɗ a hai. Aman ndo mèshèlè a di a ndev na ara nwurzhè skwai.

¹¹ Pats a shkè auda, a tiaʼa, kuza a ɓüt na, nwurzhè a wush na, a skwi nengaʼa man ambaha nga a dai, a gédèsh na. Lèmèlèmè ndo mèshèlè a da gédèsh na a civèɗ na.

Skwi njkede nga, skwi mpe nga a wai

¹² Mwuffe a sam ndo man a nza taraʼa man ta pi a wai. Aman ndo man a tsoko gèɗ na auda a sam skwi mpeda a wi ma, a da ngècè skwi mpèɗè gèɗ nshèffè, man Zhiklè a pasla ta ri a ndohi man ta woyaʼa a ndav ta.

¹³ Ndo man skwi ngiɗè a pi a wai, da goɗ Zhiklè a mpiyè a wi ɓai. Aman skwi ambaɓiaʼa a slaha a mpi Zhiklè a wi azɓai; Zhiklè ba a pi ndo a wi azɓai.

¹⁴ Aman ndo staɗ staɗ, man skwi ngiɗè a pi a wai, ntétékè nengaʼa a mpeda a wai, ntétékè a ndaʼa.

¹⁵ Te deɓaʼa, aman ntétékè a nʼnga na, ntétékè a yi malai. Te deɓaʼa, man malai nʼngaʼa ma, a dè ma a mʼmetsai.

¹⁶ Dalahimam ga, kin zlak kinè ɓai!

¹⁷ Skwi man amba tèlèba, skwi mbelambela man nga ngotso, a shkè te géɗèʼa, te ri Bab nhél sam, te nengaʼa nhél sam a ruva ta ngwèdè va azɓai.

¹⁸ Ara ndav nengaʼa man a woyaʼa, a nge nga a ndohi nzuraʼa, te ma nzuraʼa; a nga ga a tsuvomhiaʼa te skwi man a gau.

Ncinè ma Zhiklè, a ngiaʼa

¹⁹ Dalahimam ga, va-suna, ndo staɗ staɗ tèlèba da wosla va a ncinè ma, da goɗ ngèɗè tsam tsam ɓai, da gu ndav tsam tsam ɓai.

²⁰ Aman ndo man a gi ndav, a gi skwi nzuraʼa a sam Bi Zhiklè azɓai.

²¹ Gar haha, va-suɗa skwi nlizhèa, a maya ambaɓiaʼa tèlèba auda a va. Vo-co ma mbelaʼa man ta zlekeda a ndav kinè, a ndav nlüɓekwaʼa. Aman nengaʼa a slaha a mbela nshèffe kinè.

²² Va-gu ara man ma Zhiklè a gaɗa kinè; kin tsena a zlembaɗ genè ka ɓai, man ɓai kin zlakeda va kinè a ri kinè.

²³ Aman ndo man a tsena ma Zhiklè a zlembaɗ genè, a gia te deɓaʼa azɓai, nengaʼa lèmèlèmè ara ndo man a rka di nengaʼa te koturmai.

²⁴ Te deɓaʼa, man a mpeda di a pa ma, a dè na, a nasa nasa di nengaʼa a mpca na a gèɗ.

²⁵ Aman ndo man a pi di a verzi ma kita njèlèlèʼa, man a mpra nga waɗaʼa, a nzi te pa dai, a cinè a zlembaɗ genè ka ɓai, te deɓaʼa a pca na a gèɗ azɓai, aman a giaʼa, ndo haha a wuf-fè a géɗ skwi man a giaʼa.

²⁶ Ndo man a huro a jèjèr Bi Zhiklè, aman a jèwè nèʼèn nengaʼa azɓai, a pi ndav na a wi a ri na; njèjèr Zhiklè nengaʼa, skwa ambalai.

²⁷ Njèjèr Zhiklè zuraʼa, lizhèɓiaʼa, a sam di Zhiklè, Bab nga, aranta: Nwèr di mbelawhai, a ngwozi mazihi te nlèyè tengaʼa; mɓir va aman skwi herkeda a lizhèʼa azɓai.