I Samuel 8 - Ma Zhiklè

Israel a jhèɗè bai

¹ Samuel nhala ma, a nge ta wudahi nengaʼa a ndohi kita Israel.

² Tsuvomaʼa, nzlembaɗ na Joel, mbegéɗèʼa Abija. Ta gau kita te Beer-Shéba.

³ Aman wudahi nengaʼa ta gsa civèɗ bab ta ɓai, aman ta woy sulai. Aman ndohi ta ruɓ ta, ta co, a ta ngwoda kita.

⁴ Ndohi Israel nhalaʼa ta ɓücko va a ta shkè a sam Samuel te Rama,

⁵ a ta gaɗa na: Anai, ka hala ma, wudahi ngaya ta dzodzo civèɗ ngaya ɓai. Ngatsa nga bai, da gu bi nga lèmèlèmè ara ndohi ngiɗè!

⁶ Aman ta gaɗa: Ngatsa nga bai, da ga nga kita! – ambaha Samuel ɓai. A Samuel a ntsu ri a Ndo nzi pèc pècèk.

⁷ Ndo nzi pèc pècèk a ngaɗa na Samuel: Gau tèlèba ara ma tengaʼa man ta gaɗa ka: ta kwol ka ka ɓai, aman ta kwolyè; ta woyè a bi tengaʼa ɓai.

⁸ Lèmèlèmè ara man ta gi skwi a sam ga, a hinè te pats man i helka ta auda te kokwar Egypte, ha patsna, a ta jèkyè a ta tsi ri a zhiklèhi ngiɗè, lèmèlèmè ta gi skwi a sam ngaya antanta.

⁹ Gar haha gau ara ma tengaʼa. Aman ngatsa ta maya a hai, a ka ngra ta skwi man bi a woyaʼa, nengaʼa man a da gi bi tengaʼa.

¹⁰ Samuel a mʼmenda ta ma Zhiklè a ndohai man ta dzhoɗo bai a sam na, tèlèba,

¹¹ a ngaɗa: Bai man a da gi bi a géɗ kinè, a woya aranta: A woy te va wudahi kinè, a ta gi mizlinè a sam na, a ta nzi a kiki nengaʼa, a ndohi plèsh nengaʼa, a ndohi ndzaraha bai.

¹² A ge ta a ngul ndohi gozhèm a ngul ndohi 50. Ta da pizhè gi dau nengaʼa, ta tsi dau nengaʼa, ta gi skwi var a kolongwi kikai tèlèba.

¹³ A woy te va dalahi kinè, a ta cèkèslè mbar, a ta ta na movar, a ta sula na skwai.

¹⁴ Gi dau kinè mbelaʼa, gi lak, gi wof, a hilèʼa, a nda pa ta bigolahi na.

¹⁵ A da hilè te va tser skwi kinè, te lak kinè, skwi staɗ te va kula, a nda pa ta ndohi mɓer gèɗ bai, a bigolahi na.

¹⁶ Ndohi mizlinè kinè, ngurhi a ngwozai, a zlèhi mbelaʼa, a kɗèhi kinè, a da heldama a skwi mizlinè gi na.

¹⁷ Te va tambaki kinè kula, a da cè staɗ, a kinè, kin ndi a ɓèlèlihi nengaʼa.

¹⁸ Aman te deɓaʼa kin da kuɗi a géɗ bi kinè man kin woyaʼa, Ndo nzi pèc pècèk a da fi zlembaɗ a kuɗ kinè asaɓai.

¹⁹ Aman ndohi ta cinè ma Samuel azɓai, a ta gaɗa: Aʼai! Nga woya bi nga!

²⁰ Nga woya lèmèlèmè ara ndohi ngiɗè. Bi nga da gau kita nga, do do a ma nga, da gu var a ma nga.

²¹ Aman Samuel a ntsena ma man ndohi ta goɗ tèlèba, a mʼmenda na Ndo nzi pèc pècèk.

²² Ndo nzi pèc pècèk a ngaɗa na Samuel: Gau ara ma tengaʼa. Va ta bai! A Samuel a ngaɗa ta ngurhi Israel: Vo-do ngwai, staɗ staɗ a kokwar na.