I Samuel 31 - Ma Zhiklè

Mʼmetsi Saul a wudahi na

¹ Aman ndohi Philistie ta gu var a ndohi Israel, ndohi Israel ta hu ta. Ta bazl ta kumba te za Guilboa.

² Ndohi Philistie ta kala na a va Saul a wudahi nengaʼa; ta keɗa Jonathan, Abinadab a Malkishua, wudahi Saul.

³ Ta ɗagola na va a verzi a Saul a vata, ndohi lèkèɗ ta ɓoro, a ndza na a verzi hwaɗ.

⁴ Saul a ngaɗa na gol nzuɓa na skwi var nengaʼa: Pho kafahi gwèsh a ka kedyè. I woya aman ndohi ngwon nʼngela ɓai ta kedyè ɓai, a ta da ngwossahayè. Aman gol nzuɓa na skwi var nengaʼa a woya ɓai, a gi zlau holholaʼa. A Saul a nco kafahi gwèsh, a nkalda na va a gèɗ.

⁵ Aman gol nzuɓa na skwi var na a nrka, Saul a mʼmets na ma, nengaʼa ba a nkalda na va a gèɗ a tsakwal, a mʼmets na a tsagi Saul.

⁶ Aranta Saul a wudahi nengaʼa makar, a gol nzuɓa na skwi var nengaʼa ta bazl ta a sam staɗ a pats nasa.

⁷ Aman ndohi Israel man ta zhè te kokwar a vara a ta zhè te kokwar a ma Jourdain, ta rkaʼa, ndohi Israel ta hu ta, a Saul a wudahi nengaʼa ta bazl ta ma, ta jèkeda kokwar ta, a ta hu ta. A ndohi Philistie ta shkè a ta nza a pa.

⁸ Te mangoslèmaʼa aman ndohi Philistie ta shkè, a ta suɗama ta skwi auda a va ndohi mbazlaʼa, ta ngots Saul a wudahi nengaʼa makar, mbazlaʼa te za Guilboa.

⁹ A ta ngelama na gèɗ, a ta suɗama na limbèt auda a va, a ta zlündo a kokwar ndohi Philistie tèlèba, a ta ngra ta ndohi tèlèba, a zhiklèhi tengaʼa: nga ga a ngula ma!

¹⁰ A ta feda skwi var nengaʼa a gi Astarté. Nckondo nengaʼa ta dizleda va dergi kokwar Beth-Shan.

¹¹ Aman ndohi Jabès te Galaad ta tsena skwi man ndohi Philistie ta ga na Saul,

¹² ndohi var tèlèba ta slambaɗa, to do a vaɗ tèlèba, ta ckoɗi nckondo Saul a nckondohi wudahi nengaʼa a hai a dergi kokwar Beth-Shan, a ta hulkoɗa Jabès, a ta fa na vogwa a pa.

¹³ Ta hul vatasl tengaʼa, a ta rda a vèvèɗ a verzi gètèl wof te Jabès, a ta jèkeda skwi nʼndai mʼmèn tsaraɗ.