I Samuel 26 - Ma Zhiklè

David a njèka na nshèffè a Saul zaʼa

¹ Te deɓaʼa ndohi Ziph ta shkè a sam Saul a Guibéa, a ta gaɗa: David a zhè a géɗ za Hakila, ka suna, a ma hèshèkèɗ.

² A Saul a nslambaɗa, a ndo hèshèkèɗ Ziph a ndohi 3.000 a nda nengaʼa, ndohi man a mpar ta te va ndohi Israel. A nda woy David tʼhèshèkèɗ Ziph.

³ Saul a nʼnza a géɗ za Hakila, man a zhè a ma hèshèkèɗ, a civèɗ te man a tsagai. David a zhè tʼhèshèkèɗ. Aman David a nrka, Saul a ndzadzarda a hèshèkèɗ,

⁴ a nzlinde ta ndohi nʼngél dai. A ta ngra na: a vava Saul a zhè.

⁵ A David a nslambaɗa, a nshkè a sam man nda Saul ta ɓiceda va a pa. Aman David a nrka sam man Saul a Abner, kra Ner, bi sojè nengaʼa, ta mana a pa – Saul a mʼmanahai a sam kolongwai, a ndohi nengaʼa tèlèba ta tèuda a pa.

⁶ David a nhüno a ngaɗa na Achimélec, ndo Heth, a Abishai, kra Tseruja, kramam Joab: Nwoya a ndzadzarkayè, a nga dè a sam man nda Saul ta ɓiceda va a pa, wa? Abishai a ngaɗa: Ngo do a ka.

⁷ Aman David a Abishai ta ndikè a sam ndohai a vaɗ, na haha, Saul a nzhuna a sam kolongwai, tsakwal nciɓa tʼherkeda a sam nfi gèɗ nengaʼa. Abner a ndohi nengaʼa ta mana a tsagi na.

⁸ Abishai a ngaɗa na David: Zhiklè a mva ka mayam ngaya a ri ngaya a patsna. I woy a i tizhè stadgenè, a tsi gèɗ auda a herkeda. I tizhè cèw azɓai.

⁹ David a ngaɗa na Abishai: Ka keɗa ɓai! Nslaha a nkeɗa ndo man Ndo nzi pèc pècèk a mbada na mbar a gèɗ, wa, man a ngècè kita te deɓaʼa azɓai.

¹⁰ David a ngaɗa: Ara man Ndo nzi pèc pècèk a zhè: Sèi Ndo nzi pèc pècèk a da keɗa a ri na, man ɓai a metsi na mʼmetsai, man ɓai ta keɗa nkéɗè te var.

¹¹ Zhiklè da ɓür ri ga, aman i kéɗè ndo man Zhiklè a mbada na mbar a gèɗ azɓai. Gar haha co tsakwal a sam nfi gèɗ nengaʼa, a gogula iyam. Ngo-do nga!

¹² David a nco tsakwal a gogula iyam a sam nfi gèɗ Saul, a to do ta. Ndo ngiɗè a nrka ta ɓai, ndo mpiɗèkwa ɓai. Tèlèba ta nzhuna. Ta nzhun tsektskaʼa, man Ndo nzi pèc pècèk a mpa ta nzhunè a dai.

¹³ David a mdo a der za ngiɗè, a nzlatsa dra a géɗ za, dalbara mbiaʼa te ndev tengaʼa.

¹⁴ Te deɓaʼa David a mbaha ta ndohi a Abner, kra Ner: Abner, ka mbeɗay a ma azɓi dè? Abner a mʼmbeɗa na a ma: Ka wa, man ka baha na bai?

¹⁵ David a ngaɗa na Abner: Ka ngura ka ɓi ɗè? Ngidè ngar ka te Israel wa? Ka ɓer bi ngaya ɓi èhèmè? Ndo ngiɗè a mdo, aman a mbazl kinè a bi kinè.

¹⁶ Ka gau ambaɓai. Ara man Ndo nzi pèc pècèk a zhè, kin da metsi kinè, a géɗ man kin ɓer bi kinè, ndo man Ndo nzi pèc pècèk a mbada na mbar a gèɗ, bai. Anai, do a ka wora: tsakwal bi tema? Gogula a sam nfi gèɗ nengaʼa, tema?

¹⁷ Saul a sun daʼai David, a ngaɗa: Daʼai David, kra ga, ka ɗi ɗè? David a ngaɗa: Daʼai ga, bi ga.

¹⁸ A ngaɗa: Bi ga a hi a verzi ɓèl na èhèmè? I ga mè? Skwi ambaɓia te ri ga mè?

¹⁹ Aman tsena ma ɓèi ngaya, bi ga! A man Ndo nzi pèc pècèk a mpoko ka gèɗ ngaya auda a gèɗ ga, nga va na skwi a Zhiklè, aman a tsi gumai. Aman ndohi ta poko ka gèɗ auda, ta phomda a sam Ndo nzi pèc pècèk, a gèɗ man ta kwolyè a patsna, ta woy nga mbi a skwi Ndo nzi pèc pècèk azɓai, ta gaɗa: Do, a ka tsu ri a zhiklèhi ngiɗè!

²⁰ A woy ta keɗyè a herkeda dra a sam di Ndo nzi pèc pècèk bai. Aman bi Israel a mdo, a hi a verzi ga ara a verzi nshwèk, a hi a verzi gèrwèk te za.

²¹ Saul a ngaɗa: I gau malai. Washkè a deɓa, David, kra ga, anai i da ga ka matakwan ngiɗè asaɓai, a géɗ man ka jèkay nshèffè ga a patsna. Halau, i gau ambaɓai, i gau mali kumba.

²² David a mʼmbeɗa na a ma: Na haha tsakwal bai. Ndo ngiɗè da shke, do do co!

²³ Aman Ndo nzi pèc pècèk a mpela na ndo staɗ staɗara skwi nzuraʼa a nlèɓèslèa nengaʼa. Aman Ndo nzi pèc pècèk a mva ka a ri ga a patsna; aman i woy a i lama na ndo man Ndo nzi pèc pècèk a mbada na mbar a gèɗ ɓai.

²⁴ Na haha, ara man i jèka ka nshèffè ngaya a patsna, Ndo nzi pèc pècèk da jèkay nshèffè ga, da mbelyè te ri matakwan tèlèba.

²⁵ Saul a ngaɗa na David: Pombi da zhè a sam ngaya, David, kra ga! Ka da nzi dai, a ka gi a ngulaʼa a vava. A David a mdo na, a Saul a ndo na a deɓa a ngwai.