I Samuel 15 - Ma Zhiklè

Saul a gi a ngul Amalek

¹ Samuel a ngaɗa na Saul: Te va nasa Ndo nzi pèc pècèk a nzlindekayè, a i ge ka a bi ndohi Israel nengaʼa. Gar haha sèi ka tsena ma Ndo nzi pèc pècèk.

² Ndo nzi pèc pècèk, Zhiklè bi wuɗai, a god arsa: Skwi man Amalek a ga na Israel, i woy a i pelkoɗauda, a géɗ man a mva tacivèd ɓai, man tashkè auda te kokwar Egypte.

³ Ani do, a ka keɗa Amalek, a ka bazla ndohi nengaʼa a vèvèɗ, a skwi nengaʼa tèlèba man a nʼngotso. Ka da jèke ta ɓai, bazl ta ngurhi a ngwozihai, wudahi a wudahi a wa, zlèhai a tambakihai, zlugumihai a kdèhihai.

⁴ A Saul a mbaha ta ndohai, a mɓic ta te Thelaim, ndohi sak 200.000, a ndohi Juda 10.000.

⁵ Saul a ndo a ma kokwar Amalek mbiaʼa, a mpu nzliagai a verzi za.

⁶ Saul a ngaɗa ta ndohi Kéni: Va-slambaɗa, vo-do auda te kokwar Amalek, man ɓai i da gedas kinè a nda tengaʼa; aman kin takaha ta ndohi Israel, man ta shkè auda te kokwar Egypte. A ndohi Kéni ta kezla va ta a ndohi Amalek.

⁷ A Saul a mbazl ta ndohi Amalek, te Havila, ha ndè Shur, a tsagi Egypte, te civèɗ mvèng pats.

⁸ Agag, bi Amalek, a ndzawaʼagenè, a nkeɗa ɓai. Aman ndohi ngiɗè tèlèba, a mbazl ta a vèvèɗ a tsakwal.

⁹ Saul a ndohi nengaʼa ta jèka na nshèffe a Agag, a tambaki a zlèhi mbelaʼa, a skwi ngraʼa, a wud tambakihi a skwi man amba tèlèba; ta woy a ta gedassa ɓai. Aman skwi man ambaha ta ɓai, ta gedassedaussa.

Zhiklè a kwola Saul

¹⁰ Ndo nzi pèc pècèk a ngaɗa na Samuel:

¹¹ Ndav a dzayè a gèɗ man i feda Saul a bai; aman nengaʼa a nʼngwoday deɓa, a ndzodzor ma ga ɓai. A ndav Samuel a mʼmbeɗ na, a kuɗi a sam Ndo nzi pèc pècèk tʼhwaɗ vaɗ sa tèlèba.

¹² A prèk te gai, Samuel a mdo a ta zli gèɗ a Saul. A ta ngra na Samuel: Saul a mdo Carmel, a nrom skwi nʼnjèl va nengaʼa te pa. Te deɓaʼa kal na a ma a Guilgal.

¹³ Aman Samuel a ndikè a sam Saul, Saul a ngaɗa na: Ndo nzi pèc pècèk da pshè ka ma! I gau ara man Ndo nzi pèc pècèk a gaɗayè.

¹⁴ Samuel a mʼmbeɗa na a ma: Tambakihai a zlèhi man ta kuɗi a haha, a ngè?

¹⁵ Saul a ngaɗa na: Ndohai ta hulkoɗi a sam ndohi Amalek. Tambaki a zlèhi mbelaʼa ta bazl ta ɓai, ta woy a ta zla na Ndo nzi pèc pècèk, Zhiklè ngaya. Njèkèɗi skwai, nga bazl ta a vèvèɗ.

¹⁶ Samuel a ngaɗa na Saul: Dè ma! I woya man i ngra ka skwi man Ndo nzi pèc pècèk a gadayè a vaɗ haha. Saul a ngaɗa na: Godo!

¹⁷ Samuel a ngaɗa na Saul: Ko ka hur a ka gaɗa i ndo mbia ka ɓai, ta fe ka a bi ndohi verzi Israel ka ɓi dè? Ndo nzi pèc pècèk a nʼnge ka a bi Israel, a mfaɗa ka mbar a gèɗ.

¹⁸ Ndo nzi pèc pècèk a nzlinde ka a var, a fa ka ma a gèɗ: Do, gedassa ndohi Amalek, ndohi malihi sa, gu var a tengaʼa, ha ka ndev ta.

¹⁹ Ka fu gèɗ a ma Ndo nzi pèc pècèk ɓi èhèmè, a ka kala na va a skwi gi èhèmè? A ka gau skwi man ambaha Ndo nzi pèc pècèk ɓai, èhèmè?

²⁰ Saul a mʼmbeɗa na a ma Samuel: I fu gèɗ a ma Ndo nzi pèc pècèk, a i do a civèɗ man Ndo nzi pècpè-cèk a nzlindyè a pa. I gso Agag, bi Amalek, a i bazl ta ndohi Amalek tèlèba.

²¹ Aman ndohi ta hul tambakhi a zlèhi te va skwi man nga dumaʼa, skwi mbelaʼa te va skwi man Zhiklè a woy a a ngedassaʼa, ta woy a ta va na Zhiklè te Guilgal.

²² Samuel a ngaɗa: Skwi man ta zla na Zhiklè a ta ndara na Zhiklè ambaha Ndo nzi pèc pècèk, lèmèlèmè ara nfi gèɗ a ma nengaʼa dè? Na haha, ndo man a fi gèɗ a ma nengaʼa, a fena ndo man a vi skwi a Zhiklè; njèjèr ma nengaʼa, a fena mbeza drok.

²³ Ngi mèdègèd, malai lèmèlèmè ara mʼmbèh skwai; a ka tsena gèɗ ɓai, ambaɓi lèmèlèmè ara ngi vrai. A géɗ man ka kwola ma Ndo nzi pèc pècèk, nengaʼa a cèma ka bi ngaya.

²⁴ Saul a ngaɗa na Samuel: I gu malai, a géɗ man i tawaɗaha ma Ndo nzi pèc pècèk, a i tawaɗa ma ngaya. I gu zlau ndohai, i gau ara man ambaha ta.

²⁵ Anai pray mali ga genè, ngo do a ka, a i tsi ri a Ndo nzi pèc pècèk.

²⁶ Samuel a ngaɗa na Saul: Nga dè a ka azɓai; a géɗ man ka kwola ma Ndo nzi pèc pècèk, Ndo nzi pèc pècèk a kwol ka, a ka gi bi ndohi Israel asaɓai.

²⁷ A Samuel a nʼngwoda na deɓa, a ndo na. A Saul a ngso ma maslaka nengaʼa, a maslaka a ngesla na a rai.

²⁸ Samuel a ngaɗa na: A patsna Ndo nzi pèc pècèk a nʼngela ka bi ngaya a géɗ ndohi Israel, a da va na ndo ngiɗè man a fen ka.

²⁹ Nengaʼa man nʼnjèl Israel, a cèkèlma azɓai, a ngwèdè ndav azɓai; nengaʼa ndo man a ngwèdè ndav na ka ɓai.

³⁰ Saul a ngaɗa: I gau malai, aman sèi ka slebardyè a sam di ndohi nhalaʼa ndohi ga, a sam di Israel. Ngo do a ka, a i tsi ri a Ndo jizi pèc pècèk, Zhiklè ngaya.

³¹ A Samuel a mdo, a ndzodzor Saul, a Saul a ntsu ri a sam Ndo nzi pèc pècèk.

³² Samuel a ngaɗa: Vo-cko Agag, bi Amalek, a sam ga! A Agag a mdo a sam na, a shfa dai, a gaɗa: I mbeɗi mʼmetsi azbai.

³³ Samuel a ngaɗa: Ara man tsakwal ngaya a mbazl ta wud ndohai, sèi ta keɗa kra man mam ngaya a nyokoɗi ba, lèmèlèmè ara man a ngwozi ngiɗè. A Samuel a nkeɗa Agag a sam di Ndo nzi pèc pècèk te Guilgal, a nratsaʼa.

³⁴ Te deɓaʼa Samuel a ndo Rama. Aman Saul a mdo ngwai, a Guibéa man a Saul.

³⁵ Te deɓ nengaʼa Samuel a nrka Saul asaɓai, ha a mʼmets na. Aman Samuel a lèyè Saul, te man Ndo nzi pèc pècèk a nhur a gèɗ man a nʼnga Saul a bi Israel.