I Samuel 11 - Ma Zhiklè

Saul, ngul ndohi Ammon

¹ A ki ngiɗè, Nachash, ndo Ammon, a mshkè a nʼnza na ma a kokwar Jabès te Galaad. Ndohi Jabès tèlèba ta gaɗa na Nachash: Pasla nga rai, a nga gi mizlinè ngaya.

² Aman Nachash, ndo Ammon, a mʼmbeɗa ta a ma: Nga da pèsl ri a nda kinè aranta: i da tezko kinè di staɗ auda, a i pa na hori a di a Israel tèlèba.

³ Ndohi nhalaʼa te Jabès ta gaɗa na: Jèka nga mʼmèn 7 dai, a nga zlinde ndohi sak a sam Israel tèlèba. Aman ndo ntakaha nga azɓai, nga ndi a ɓèl ngaya mènè.

⁴ Aman ndohi sak ta shkè a sam Saul a Guibéa, a ta njè ta ma haha a ndohai, ndohi tèlèba ta hinè a ta kuɗai.

⁵ Na haha, Saul a mshkè te gi dau a verzi zlèhi nengaʼa, a ndzhoɗo: Nʼnga ta ndohi man ta kuɗi a haha mè? A ta ngra na skwi man ndohi Jabès ta woyaʼa. Aman Saul a ntsena ma tengaʼa,

⁶ Mèzhèɓ Zhiklè a mshkè a géɗ nengaʼa, a ndza na a ndav worworaʼa.

⁷ A mhul zlèhi cèw, a nzlaha a ntsakaʼa, a nzlinda ta difi ngiɗè, difi ngiɗè, a ri ndohi sak a sam Israel tèlèba, a ngaɗa ta: Ndo man a dè var azɓai, a verzi Saul a Samuel, ta da kezli zlèhi nengaʼa arsa. A zlau Ndo nzi pèc pècèk a ndza ta ndohai, a to do var a ta humda va staɗ.

⁸ Saul a war ta te Bè-zek: ndohi Israel 300.000, a ndohi Juda 30.000.

⁹ A ngaɗa ta ndohi sak man ta shkè: Kin da gaɗa ta ndohi Jabès te Galaad arsa: Angoslèm man pats ngra, kin da ngècè ndohi ntakaha kinè. Aman ndohi sak ta shkè ngwai, a ta ngra ta ma haha a ndohi Jabès, ta wuffè.

¹⁰ Ndohi Jabès ta gaɗa ta ndohi Ammon: Angoslèm nga da ndi a ɓèl kinè, a kin da gi skwi a nga ara man kin woyaʼa.

¹¹ Te mangoslèmaʼa a prèk, Saul a nkezla ta ndohi a sam makar. A prèk ta kala ta va a ndohi Ammon a sam man ta ɓica va a pa, a ta bazlaha ta, a ndè a géɗ pats. Matakaʼa ta mbel ta staɗ staɗ, a ta venda gèɗ ta, ko cèw ta nza a sam staɗ ɓai.

Israel a cè Saul ara bai

¹² Ndohi ta gaɗa na Samuel: Tengahi tema, man ta gaɗa: Saul a gi bi nga èhèmè? Va-helka ta, a nga bazl ta!

¹³ Aman Saul a ngaɗa: A patsna nga kédè ndo azɓai. A patsna Ndo nzi pèc pècèk a mʼmbel ta ndohi Israel.

¹⁴ Samuel a ngaɗa ta ndohai: Ngo-dokona a Guilgal, a nga til kokwar-bi a va zaʼa!

¹⁵ A ndohi tèlèba to do Guilgal, a ta feda Saul a bai a sam Ndo nzi pèc pècèk te Guilgal, a ta zloho skwi nhumde ta a Ndo nzi pèc pècèk. Saul a ndohi Israel tèlèba ta wuffè te pa kumba.