I Rois 8 - Ma Zhiklè

Ngolala gi Zhiklè

¹ Te deɓaʼa Salomon a mɓic ta ndohi Israel nhalaʼa a tsuvomhi te verzi tèlèba, a bab ndohi Israel, a sam nengaʼa a kokwar Jérusalem, aman ta ckoɗi koti nderzlè-ma Ndo nzi pèc pècèk auda te kokwar David – nengaʼa Sion.

² A ndohi Israel tèlèba ta ɓica va a sam Salomon, a ki Etanim, ki matsaraɗaʼa, a ta gi ngolala.

³ Aman ndohi Israel nhalaʼa ta zhè tèlèba ma, ndohi mvi skwi a Zhiklè ta co koti nderzlè-ma,

⁴ a ta ckoɗauda te gi nkezlaʼa a kolongwi nkezlahiaʼa man ta zhè te gi nkezlaʼa. A ndohi mvi skwi a Zhiklè a ndohi Lévi ta zuɓa,

⁵ bi Salomon a nzlatsa a sam koti nderzlè-ma, a ndohi Israel mɓicaʼa tèlèba a sam nengaʼa, a ta zloho tambaki a zlèhi kumba, ta slaha ta livèʼa ta a ta nger ta ɓai.

⁶ Te deɓaʼa ndohi mvi skwi a Zhiklè ta ckoɗi koti nderzlèma Ndo nzi pèc pècèk a samaʼa te gi Zhiklè, a sam nkezli-nkezlaʼa, tʼhwaɗ kelpasl chérubimhai.

⁷ Chérubimhai ta pizlè sam man koti a pa a kelpasl, a ta wuzhè kelpasl a deɓ koti a gadaʼa.

⁸ Gada ngurèʼa, ma gada a rkè a sam nkezlaʼa, a ma sam nkezli-nkezlaʼa. Aman tʼuda ta rka ɓai. Ta zhè te pa ha patsna.

⁹ Skwi ngiɗè a te koti ɓai, sèi kwa cèw man Moise a mpeda pa a der za Horeb, kwa nderzlè-ma man Ndo nzi pèc pècèk a nderzla a nda ndohi Israel, man ta shkè auda te kokwar Egypte.

¹⁰ Aman ndohi mvi skwi a Zhiklè ta shkè auda te sam nkezlaʼa, vani nʼndha te gi Ndo nzi pèc pècèk tèlèba,

¹¹ a ndohi mvi skwi a Zhiklè ta slaha ta dè a pa a ta gi mizlinè tengaʼa ɓai, a géɗ vanai; aman nʼnjèl Ndo nzi pèc pècèk nʼndha gi Ndo nzi pèc pècèk.

¹² A pats nasa Salomon a ngaɗa: Ndo nzi pèc pècèk a gada i da nzi a va vanai ntéɗéɗikaʼa.

¹³ Gar haha a vava i dizla ka gai a ka nzi a pa, sam nʼnzi bi ngaya a mèdèp.

Salomon a pshè ta ma ndohai

¹⁴ A bai a nʼngwoda ta ma a ndohai, a mpshè ta ma ndohi Israel mɓicaʼa tèlèba man ta zlatsa a pa.

¹⁵ A ngaɗa: I shid gèɗ a Ndo nzi pèc pècèk, Zhiklè Israel, man a ngau a ri na, ara man a gada na David, bab ga, man a gada:

¹⁶ Daga man i helka ta ndohi Israel, ndohi ga, auda te kokwar Egypte, i dzhada man ta ramay gi te kokwar ngiɗè a sam verzi ndohi ngiɗè ɓai, a ngi a gi a nzlembaɗ ga. A i ngotsko Jérusalem auda, a nzlembaɗ ga a da nzi te pa. A i ngotsko David auda, a da gi bi a géɗ Israel, ndohi ga.

¹⁷ David, bab ga, a nhur a gada i da ga na gi a Ndo nzi pèc pècèk, Zhiklè Israel.

¹⁸ Aman Ndo nzi pèc pècèk a ngaɗa na David, bab ga: Aman ka hur a ka gada i da ga na gi a nzlembaɗ nengaʼa, ka hur amba.

¹⁹ Aman ka ka ɓai ka ngiaʼa. Sèi kra ngaya man a da shkè auda tʼhwaɗ ngaya, nengaʼa a da gi gi a nzlembaɗ ga.

²⁰ Anai Ndo nzi pèc pècèk a ngau ara man agoda. I zhè te di man a bab ga, i nza a géɗ sam nʼnzi bi Israel, ara man Ndo nzi pèc pècèk a pasla nga rai, a i gu gi a nzlembaɗ Ndo nzi pèc pècèk, Zhiklè Israel,

²¹ a i tila na sam a koti nderzlè-ma man Ndo nzi pèc pècèk a nderzla a nda babhi nga a pats man a helka ta auda te kokwar Egypte.

Salomon a tsi ri a Zhiklè

²² Te deɓaʼa Salomon a mdo a nzlatsa a sam mvi skwi a Ndo nzi pèc pècèk, a sam di mpi ndohi Israel tèlèba, a ngeda ri a zhiklè,

²³ a ngaɗa: Ndo nzi pèc pècèk, Zhiklè Israel! Zhiklè ngar ka azɓai, ko te zhiklè te géɗèʼa, ko tʼherkeda, man ka derzla ma, a ka va ta pombai a ɓèlèlihi ngaya man ta da jèjèr ka a ndav tèlèba.

²⁴ Ka gu ara man ka pasla na ri a David, bab ga, ɓèl ngaya. A vava skwi man ka goɗ te ma, ri ngaya a ngau, ara man nga rka a patsna.

²⁵ Ani haha, Ndo nzi pèc pècèk, Zhiklè Israel, gau ara man ka pasla na ri a hi a David, ɓèl ngaya, bab ga, man ka gaɗa: Aman wudahi ngaya ta gi maya a civèɗ ga, a ta fi gèɗ a ma ga, lèmèlèmè ara man ka gu a sam ga, ndohi te verzi ngaya ta shkè auda a géɗ sam nʼnzi bi Israel asaɓai.

²⁶ Anai, Ndo nzi pèc pècèk, Zhiklè Israel, gau ara man ka gada na David, ɓèl ngaya, bab ga.

²⁷ Aman a vava Zhiklè a da nzi a sam ndohi tʼherkeda dè? Ko sam te giɗfèkihai, kala a géɗèʼa, a slra ka ɓai, azɓa gi man nga rama ka haha dè?

²⁸ Aman co ntsi ri a nkuɗi ɓèl ngaya, Ndo nzi pèc pècèk, Zhiklè ga, a ka tsena man iyè, ɓèl ngaya, i baha ka te ntsi ri ga a patsna a haha, a sam ngaya.

²⁹ Ka cèma na di a gi haha ɓai, ko a pats ba, ko a vaɗ ba, a géɗ sam man ka goɗ te nengaʼa: Nzlembaɗ ga da nza a pa! A ka tsena ntsi ri man ɓèl ngaya a tsi ri a sam na haha.

³⁰ Sèi ka tsena ntsi ri ɓèl ngaya, a ndohi Israel, ndohi ngaya, man ta tsi ri a ka, a sam na haha. A vava sèi ka cèʼa, a sam nʼnzi ngaya te zhiklè te géɗèʼa. Ka da tsenaʼa a ka da pra nga mali nga.

³¹ Aman ndo ngiɗè a ngu mali a sam nslamagi na, a ta fa na ma a gèɗ a mbèdè, a shkè a mbèdè a sam mvi skwi a Zhiklè te gi haha,

³² ka da tsenaʼa te zhiklè te géɗèʼa, ka cèʼa, a ka bèzlè kita ɓèlèlihi ngaya, a ka fa na mali a gèɗ a ndo malai; a ndo man a nga mali ɓai, ka pra a gumai, a géɗ man a nga mali ɓai.

³³ Aman mayamhi ta gu a ngul ndohi Israel, ndohi ngaya, a géɗ man ta gu mali a sam ngaya, a ta ngwodko ndav ta a deɓa a sam ngaya, a ta slèbèrdè nzlembaɗ ngaya, a ta tsi ri a ta kuɗi a sam ngaya te gi haha,

³⁴ ka da tsenaʼa te zhiklè te géɗèʼa, a ka pra ta malai a ndohi Israel, ndohi ngaya, a ta nzi a kokwar man ka va ta babhi tengaʼa.

³⁵ Aman giɗfèk mɓaraʼa, a iyam a shkè azɓai, a géɗ man ta gu mali a sam ngaya, a ta da tsi rai a sam haha a ta slébèrdè nzlembaɗ ngaya, a ta menkaɗa deɓa te civèɗ mali ta, a géɗ man ka manda ta gèɗ a hai,

³⁶ ka da tsenaʼa te zhiklè te géɗèʼa, a ka pra ta mali a ɓèlèlihi ngaya, ndohi Israel, ndohi ngaya, a ka ngra ta civèɗ nzuraʼa man ta jèjèrèʼa, a ka zlindeka ta iyam a herkeda, a herkeda man ka va ta ndohi ngaya a skwi nʼndi gi ta.

³⁷ Aman mi a gi a kokwar, a gidiɓèr a zlèzlèmè te kokwar, a vovrom a cèɓè a ngedassa skwai, man dzarai a shkè, man ri ndohi mayamhi a nza ta a gèɗ a ndohi te kokwar ngiɗè, man skwi mwuɗitpa, man matakwan ngiɗè a shkè,

³⁸ skwi man ndawa ndawa a da tsi rai a géɗèʼa, a njhèɗèʼa, ko ndohi Israel, ndohi ngaya tèlèba ta tsi rai, a géɗ man staɗ staɗ tèlèba skwi man ambaɓai te ndav na a haka na gèɗ, a ta peda ri a zhiklè te gi haha,

³⁹ ka da tsenaʼa te zhiklè te géɗèʼa, a sam nʼnzi ngaya, a ka pra ta malai, a ka ga na a ndo staɗ staɗ tèlèba ara skwi nengaʼa man a gau. Aman ka staɗgenè ka sun ndav ndohi tèlèba.

⁴⁰ A ta da gi zlau ngaya a pats nshèffè tengaʼa tèlèba tʼherkeda man ka va ta a babhi nga.

⁴¹ A ndo mbrok, man verzi nengaʼa tsaɗ, man ndo Israel ka ɓai, man a shkè te kokwar dra, a shkè a géɗ nzlembaɗ ngaya,

⁴² a géɗ man a tsena labar ma nzlembaɗ ngaya mbiaʼa, ma ri ngaya man wuɗi na zhè, ri ngaya man a nzlatseda – a nengaʼa a shkè a tsi ri te gi haha,

⁴³ ka da tsenaʼa te zhiklè te géɗèʼa, a sam nʼnzi ngaya, a ka gi ara man ndo mbrok a ntsu ri a sam ngaya a géɗèʼa. A ndohi a géɗ herkeda tèlèba ta da sun nzlembaɗ ngaya, ta da slébèrdèʼa a zlau ara man ndohi Israel, ndohi ngaya, ta giaʼa. A ta suna, ta baha na nzlembaɗ ngaya te gi haha man i ga ka.

⁴⁴ Aman ndohi ngaya ta da gi var a mayamhi tengaʼa, a civèɗ man ka zlinde ta a pa, a ta ngwoda na ma a kokwar man ka ngotskoɗauda, a gi man i gu a nzlembaɗ ngaya, a ta tsi ri a Ndo nzi pèc pècèk,

⁴⁵ ka da tsena ntsi ri tengaʼa a nkuɗi tengaʼa te zhiklè te géɗèʼa, a ka helka ta auda.

⁴⁶ Man ta gu mali a sam ngaya – ndo man a gi mali azɓi ba, azɓai – a ka gi ndav a géɗ tengaʼa, a ka pa ta a ri a mayamhi tengaʼa, a ndohi ndum ta ta hel ta a ɓèlè a kokwar ta, ko dra ko ndul ndul,

⁴⁷ a ta hér mali ta te kokwar man ta gi ɓèlè te pa, a ta ngwoda ndav ta, a ta tsi ri a ka, te kokwar ndohi ndum ta, a ta gada: Nga gu malai, nga gau ambaɓai, nga gau skwi man ambaha Zhiklè ɓai!

⁴⁸ A ta ngwodko ndav ta tèlèba a sam ngaya, a nhér gèɗ ta tèlèba, te kokwar man mayamhi tengaʼa ta par ta a ɓèlè, a ta ngwoda na ma a kokwar man ka va ta babhi ta, a kokwar man ka ngotskoɗauda a gi man i gu a nzlembaɗ ngaya, a ta tsi rai a ka helka ta auda;

⁴⁹ ka da tsenaʼa te zhiklè te géɗèʼa, a sam nʼnzi ngaya, aman ta tsi rai a ta kuɗai.

⁵⁰ Ka da pra ta mali man ta gu a ndohi ngaya, a mphömè, tèlèba man ta gu a sam ngaya, a ka gi a ta si ndohi man ta par ta a ɓèlè, te va.

⁵¹ Te man ta ndohi ngaya, ndohi nʼndi gi ngaya, tengaʼa man ka helka ta auda te kokwar Egypte, man ta nza te pa ara man ta nza te ndev vogwa.

⁵² Wina zlembaɗ ngaya a ka tsena ntsi ri ɓèl ngaya, a ntsi ri ndohi Israel, ndohi ngaya, pèc pècèk man ta kuɗi a sam ngaya.

⁵³ Ka man ka parka ta auda te va ndohi a géɗ herkeda tèlèba, a ta gi a ndohi gi ngaya, ara man ka goɗ te ma Moise, ɓèl ngaya, a pats man ka helka ta babhi nga auda te kokwar Egypte, ka Bi Zhiklè, Ndo nzi pèc pècèk!

Salomon a pshè ta ma ndohi Israel zaʼa

⁵⁴ Aman Salomon a ndeva ntsi ri a nkuɗi nengaʼa tèlèba a sam Ndo nzi pèc pècèk ma, a nslambaɗa a sam mvi skwi a Ndo nzi pèc pècèk, a sam man a ngurɓahai, a ngeda ri a zhiklè.

⁵⁵ Te deɓaʼa a nzlatsa, a mpshè ta ma ndohi Israel mɓicaʼa tèlèba a daʼai mbiaʼa, a ngaɗ! a:

⁵⁶ I shid gèɗ a Ndo nzi pèc pècèk, man a va ta gumai a ndohi Israel, ndohi nengaʼa, ara ma nengaʼa man a goɗ tèlèba. Skwi man a mpasla nga rai te ma Moise, ɓèl na, tèlèba nʼnga ma, ko staɗ njèkahi ɓai.

⁵⁷ Ndo nzi pèc pècèk, Zhiklè nga, da zhè a nda nga, ara man a zhè a nda babhi nga te va nasa. Da jèk nga ɓai, da kwol nga ɓai,

⁵⁸ aman da ngalda ndav nga a sam na, aman nga dè a civèɗ nengaʼa tèlèba, a nga fi gèɗ a ma nkwèrè a ma kita a ma nengaʼa man a de nga a vna tèlèba man a njè ta a gèɗ a babhi nga.

⁵⁹ Ndo nzi pèc pècèk, Zhiklè nga, da hur ntsi ri a nkuɗi ga haha man i kuɗa na Ndo nzi pèc pècèk, a pats a vaɗ, aman a bèzlè kita a sam ɓèl nengaʼa, a sam ndohi Israel, ndohi nengaʼa, pèc pècèk.

⁶⁰ A ndohi a gèɗ herkeda tèlèba ta suna, Ndo nzi pèc pècèk, nengaʼa Zhiklè staɗgenè, Zhiklè ngiɗè azɓai.

⁶¹ A kin va na ndav kinè tèlèba a Ndo nzi pèc pècèk, Zhiklè nga, a kin jèjèr ma nkwèrè a ma kita nengaʼa lèmèlèmè ara mpatsna.

Mwin gi Zhiklè

⁶² A bi Salomon a ndohi Israel tèlèba a nda nengaʼa, ta zla na skwi a Ndo nzi pèc pècèk.

⁶³ Salomon a zla na skwi a Ndo nzi pèc pècèk a nshid gèɗ; zlèhi 22.000, a tambakihi 120.000. Aranta bai a ndohi Israel tèlèba ta gau ngolala nwin gi Ndo nzi pèc pècèk.

⁶⁴ A pats nasa sam gi nʼngalaʼa a ma gi Ndo nzi pèc pècèk, Salomon a mvau a ta gi mizlinè te pa. A pa a nʼndara na skwi a Zhiklè, a nva na skwi a Zhiklè, mbeza nshid gèɗ, te man sam mvi skwi a Zhiklè man a zhè a sam Ndo nzi pèc pècèk a slra ɓai skwi man a ndara na, a va na skwai, a mbeza nshid gèɗ, tèlè.

⁶⁵ Aranta Salomon a ngau ngolala, a ndohi Israel tèlèba. Ndo nhayaʼa kumba, a hinè te Hamath, ha ndè a ma woyam Egypte, a sam di Ndo nzi pèc pècèk, Zhiklè nga, mʼmèn tsaraɗ.

⁶⁶ A pats matsamakaɗaʼa, a mpra ta ndohai. Ta ga na mbalai a bai, a to do ngwai, ta wuffè, ta gu langlangaʼa, a gèɗ skwi man amba tèlèba man Ndo nzi pèc pècèk a nga na David, ɓèl na, a Israel, ndohi na.