I Rois 5 - Ma Zhiklè

Nderzlè-ma Salomon a nda bi Hiram

¹ A Hiram, bi Tyr, a nzlinde ta golahi nengaʼa a sam Salomon, te man a tsenaʼa, ta bada na mbar a gèɗ, a ta feda a bai te di man a bab na. Daga zlèzlèa, Hiram mandal David.

² A Salomon a nzlündo ndo a sam Hiram, da gaɗa na:

³ Ka suna, David, bab ga, a slaha a nrèm gi a nzlembaɗ Ndo nzi pèc pècèk, Zhiklè nengaʼa, ɓai, a géɗ var man a zhè te tsagi te tsagai tèlèba, ha pats man Ndo nzi pèc pècèk a mpe ta mayamhi nengaʼa a hwaɗ sak na.

⁴ Antanta Ndo nzi pèc pècèk, Zhiklè ga, a mvay gumai te tsagi te tsagai tèlèba, ndo mayam azɓai, skwi ambaɓiaʼa azɓai.

⁵ A i hur i da rèm gi a nzlembaɗ Ndo nzi pèc pècèk, Zhiklè ga, ara man Ndo nzi pèc pècèk a gaɗa na David, bab ga, man a gaɗa na: Kra ngaya man i da nzeda a gèɗ sam nʼnzi bi te di man a ngaya, nengaʼa a da rèm gi a nzlembaɗ ga.

⁶ Anai goɗ aman ta ngela wof ɗawai te Liban. Ɓèlèlihi ga ta da takaha ta ɓèlèlihi ngaya. Skwi ɓèlèlihi ngaya i da va ka, ara man ka jhèɗèʼa. Te man ka suna, ndo az te va nga ɓai man a sun nʼngél wof zuraʼa ara ndohi Sidon.

⁷ Aman bi Hiram a ntsena ma Salomon, a wuffè kumba, a gaɗa: A patsna i shid gèɗ a Ndo nzi pèc pècèk, man a va na kra a David, man maya na zhè, a ngi bai a géɗ ndohi haha mbiaʼa.

⁸ A Hiram a nzlündo ndo a sam Salomon, da gaɗa na: I tsena skwi man ka ngrayè. I da gia tèlèba ara man ka woyaʼa. Wof ɗawai a wof lakalak tèlèba man ka jhèɗèʼa, i da va ka.

⁹ Ɓèlèlihi ga ta da ngélèʼa te Liban, a ta da zuɓkodai a ma iyam mbiaʼa. A woyam a nda tawaɗa ka auda a sam man ka woyaʼa. A pa i prèʼa, a ka da hilèʼa. A ka, ka vokoy skwi man i jhèɗèʼa a ndohi gi ga, a ta da ndiaʼa.

¹⁰ Aranta Hiram a mpoko na wof ɗawai a wof lakalak a bi Salomon, tèlèba man a woyaʼa.

¹¹ A Salomon a mva na dau a Hiram bho 40.000 a skwi nʼndi gi na, a gongong mbar 20. A mvi a mvai Salomon a mva na Hiram arsa.

¹² A Ndo nzi pèc pècèk a mva na maya a Salomon, ara man a pasla na rai. Gumi a zhè te ndev Hiram a Salomon, a ta derzla ma ta.

¹³ Salomon a mparka ta ndohi mizlinè te Israel tèlèba, ndohi 30.000.

¹⁴ A nzlinde ta a Liban. A nʼngel ta 10.000, 10.000 á kia kia. Ki staɗ ta te Liban, ki cèw ta te ngwai. Adoniram, ndo mɓer ndohi mizlinè sa.

¹⁵ A Salomon a nʼngots ndohi nzuɓa na skwi 70.000, a ndohi mpèsl kwa 80.000 te za.

¹⁶ Ndohi man bihi kokwar ta par ta a ndohi ndzaraha mizlinè, ta te va ɓai, Tengaʼa 3.300, a ta ɓer ndohi man fa gu mzilinè.

¹⁷ Bai a ngoɗa aman ta pasla kwa mbimbiaʼa, nshfaʼa, ta da pi a verzi gai.

¹⁸ Te deɓaʼa ndohi nrèm gi Salomon, a ndohi nrèm gi Hiram, a ndohi Guébal, ta paslaʼa a ta tilda wof a kwa a hai, aman ta da rèm gi Zhiklè a vna.