II Samuel 4 - Ma Zhiklè

Ta keɗa Ish-Bosheth

¹ Aman Ish-Bosheth, kra Saul, a ntsenaʼa, ta keɗe Abner te Hébron, ndav nengaʼa a mʼmbeɗ na, a ndohi Israel tèlèba ta gudzai.

² Ish-Bosheth, kra Saul, a nʼngots ngul ndohi metsarhi cèw. Staɗ, nzlembaɗ na Baana, ngiɗè nzlembaɗ na Récab, wudahi Rimmon, te Beeroth, te verzi Benjamin. Ta ngra na Beeroth a va Benjamin.

³ Ndohi Beeroth ta hu ta a Guitthaim, a ta nza te pa ara mbrok, ha patsna.

⁴ Kra Jonathan, kra Saul, a zhè, ndo vedal. Aman labar ma mʼmetsi Saul a Jonathan a mshkè te Jizreel, mvi nengaʼa 5. A ngwoz nwara na dai a nco, a mhu na a vna. Aman a hi na tsam-tsam, kra a nkalahai, a sak a mpasl na. Nzlembaɗ kra, Mephibosheth.

⁵ Récab a Baana, wudahi Rimmon te Beeroth, ta slambaɗa a to do, a ta ndikè a gi Ish-Bosheth, a géɗ pats. Ish-Bosheth a nzhun te gai.

⁶ Ngwoz a ntamagai, a pèv dau, a zhingètè a nzhun na. A Récab a Baana, kramam nengaʼa, ta lohoda va a gai.

⁷ Ish-Bosheth a mʼmana a sam mʼmènè na te kalak na, a ta keɗaʼa, a ta ngela géɗèʼa. A to do a gèɗ te rai, a to do ha prèk, a ta beza a ndev dalbara Jourdain.

⁸ Ta cko na gèɗ Ish-Bosheth a David te kokwar Hébron. Ta gaɗa na bai: Nana gèɗ Ish-Bosheth, kra Saul, mayam ngaya, man a woya a nzede nshèffè ngaya. A patsna Ndo nzi pèc pècèk a pela skwi man Saul a ndohi verzi nengaʼa ta ga na bi nga.

⁹ Aman David a mʼmbeɗa na a ma Récab a Baana, kramam nengaʼa, wudahi Rimmon te Beeroth, a ngaɗa ta: Ara man Ndo nzi pèc pècèk a zhè, nengaʼa man a mbelkay auda te matakwan tèlèba:

¹⁰ Ndo man a mshkè, a ngrayè: Saul a mʼmets na, a nhur a gaɗa, i ngra na skwi mbelaʼa a nda wuffè a géɗèʼa, i gso a i keɗaʼa te Tsiklag, a i va na skwi ntul na arsa.

¹¹ Holholaʼa aman ndohi shèwa to do a ta keɗe ndo nzuraʼa te gi na, a sam mʼmènè na — i da jhèdè nshèffè nengaʼa te ri kinè, a i gedas kinè aussa tʼherkeda.

¹² David a ngaɗa ta ɓèlèlihi nengaʼa, a ta bazl ta, ta ngelama ta sak a rai, a ta zlatsede ta a ma nhèyè iyam te Hébron. Gèɗ Ish-Bosheth, ta co a ta feda a gi dzavi Abner te Hébron.