II Samuel 22 - Ma Zhiklè

Dimèsh David

¹ David a nfu dimèsh haha a nslébèrdè Ndo nzi pèc pècèk, a pats man Ndo nzi pèc pècèk a mbelkoɗauda te ri mayamhi nengaʼa tèlèba, te ri Saul ba.

² A ngaɗa: Ndo nzi pèc pècèk, sam ga gedeng-gedengaʼa, gi bi ga, bi mʼmbelyè.

³ Zhiklè, sam ga nlèaʼa, man i pi di a pa; gambar ga, a wuɗi man a mbelyè. Gi ga nʼngalaʼa man i hi a pa. Nengaʼa bi mʼmbelyè man a takahayè te ri ndohi wuɗai.

⁴ I tsi ri a Ndo nzi pèc pècèk, i shida na gèɗ, a nengaʼa a mbelyè te ri mayamhi ga.

⁵ Mʼmetsai a ntèudyè a pa; skwi ngedasyè a nʼhakaɗai ara iyam, a mʼpray zlau a va.

⁶ Teɓa mʼmetsai a ndzawyè, gadda mʼmetsai a ngsyè.

⁷ Aman i gu zlau, i tsu ri a Ndo nzi pèc pècèk, a i kuɗi a sam Zhiklè ga. A nengaʼa a ntsena daʼai ga te gi nengaʼa, kuɗa ga a ntsena na a zlembaɗ.

⁸ A herkeda a gidè va, gagagaʼa, a verzi gidfèk a gudzai, ta gidè va a gèɗ ndzoan Zhiklè.

⁹ Vodzok a shkè auda tʼhtsan nengaʼa, vogwa nʼndi skwai te ma nengaʼa; vogwa a wurtskaɗa te nengaʼa.

¹⁰ A wuzhè gidfèk, ruva tʼhwaɗ sak nengaʼa.

¹¹ A nza a deɓ chérubim, a hi ara kozlar, ara man kelpasl a va.

¹² A mpizlèda va na a pa a ruva, ara gai, ruva iyam a vani téɗéɗikdikaʼa.

¹³ Nengaʼa a si dai, a vogwa a wurcè auda te pa.

¹⁴ Ndo nzi pèc pècèk a gi a iyam a ntsai te gidfèk, a daʼai Zhiklè te géɗèʼa a slhè.

¹⁵ A mɓorko sulom nengaʼa, a ndzar ta mayamhi na, a nzlindekoɗi ndidiyam, a ndzam ta.

¹⁶ Aman Ndo nzi pèc pècèk a gi ndzoan, a vèdè htsan, tʼhwaɗ iyam mbiaʼa di a rkè a pa, verzi herkeda a rkè.

¹⁷ A ntorko ri a hi te géɗèʼa, a ngsyè, a nckay auda te va iyam mbiaʼa.

¹⁸ A ngezlkay auda te ri mayam ga man wuɗi na zhè, ndohi man ta gi shèwa a iyè a ta fenyè a wuɗai.

¹⁹ Ta kalay a va a pats matakwan ga; aman Ndo nzi pèc pècèk a nzalyè,

²⁰ a ndyè auda a dala, a mprekay auda, a géɗ man i ambaha.

²¹ Ndo nzi pèc pècèk a ngayè ara skwi nzuraʼa man i gau, a mpshèy ma, a gèɗ man ri ga mpanaʼa.

²² I dzodzor civèɗ Ndo nzi pèc pècèk, i jèkeɗa ma nkwèr nengaʼa ɓai.

²³ Halau, ma nkwèr nengaʼa tèlèba i ngots a sam di ga, i kwola ma kita nengaʼa ɓai.

²⁴ I ga mali a sam nengaʼa ɓai, i ɓir va ga te ri skwi ambaɓiaʼa.

²⁵ A géɗ nengaʼa Ndo nzi pèc pècèk a mpelayè ara skwi nzuraʼa man i gau, ara ndav ga man mpana a sam di nengaʼa.

²⁶ Ndo man ndo a sia te va, nengaʼa a da se ka te va. A sam ndo nzuraʼa, ka gi zuraʼa.

²⁷ A sam ndo ndzuwaɗaɗaʼa, ka gi skwi ndzuwaɗaɗaʼa. A sam ndo ambaɓiaʼa, ka gi skwi ambaɓiaʼa.

²⁸ Halau, ka takaha ta ndohi man ta manda gèɗ ta a hai. A ndo nfi va ka manda na gèɗ a hai.

²⁹ Ka, Ndo nzi pèc pècèk, skwi nhel sam ga! Zhiklè ga a helay sam te ruva.

³⁰ Nga a ka, i mbeɗa sam nʼngalaʼa. Nga a Zhiklè ga, i nzevi auda a géɗ zlazlar.

³¹ Civèɗ Zhiklè, amba, zuraʼa. Ma Ndo nzi pèc pècèk, nzuraʼa, man ta jkedaʼa; nengaʼa gambar ndohi tèlèba man ta woy a ta nghédè va a diaʼa.

³² Zhiklè wa, sèi Ndo nzi pèc pècèk. Pra ngiɗè azbai, sèi Zhiklè nga.

³³ Zhiklè man a dzawyè va ga a wuɗai, a lèmdè civèɗ ga saraʼa,

³⁴ man a nzalay sak ga a i hi ara mènèɗ, a nzlatsedyè a géɗèʼa,

³⁵ man a senday ri ga a i gi var, a senday ri ga a i lètè lèkèɗ züdo.

³⁶ Ka takahayè aman ka vay gambar ngaya. Pombi ngaya a giyè a ndo mbiaʼa.

³⁷ Ka tilay sam man i mbècè a pa, a sak ga a fèɗè azɓai.

³⁸ I hi a verzi mayamhi ga a i gedas ta, i minè a deɓa azɓai, sèi i ndev ta.

³⁹ I bazl ta, a ta slèmbèdè te deɓaʼa asaɓai, a ta kalahi tʼhwaɗ sak ga.

⁴⁰ Ka dzaway va ga a wuɗai a ngi var. Ka manda ta gèɗ a hai a ndohi man ta slambaɗkay a va.

⁴¹ Ka gi a mayamhi ga ta hi ta a iyè, a ndohi man ta gi shèwa a iyè, i gedas ta.

⁴² Ta tsi lalau – ndo ntakaha ta azɓai – a Ndo nzi pèc pècèk a tsena nkudi tengaʼa azɓai.

⁴³ I kerzh ta ara mberfenèk herkeda, i gats ta a pa ara wujèɗ.

⁴⁴ Ka mbelyè a sam var ndohi ga.

⁴⁵ Ndohi mbrokihai ta gi huyokokoʼa a sam ga, a ta tsena ma ga, a ta fi gèɗ a ma ga.

⁴⁶ Tukwal a te ndev wudahi mbrokihi ɓai, a ta shkè auda a sam man ta ngheda va ta a pa a ngudzai.

⁴⁷ Ndo nzi pèc pècèk a zhè a nshèffè. I shid gèɗ a nengaʼa, sam ga gedeng-gedengaʼa, Zhiklè, sam mʼmbelyè mbiaʼa.

⁴⁸ Zhiklè a pelay di man a ga, a nge ta ndohi a ɓèl ga.

⁴⁹ Ka man ka mbelyè te ri mayamhi ga, a ka slambaɗdyè a géɗ ndohi shèwa ga, ka prekay auda te ri ndohi wuɗai.

⁵⁰ A géɗ nengaʼa i woy a i shida ka gèɗ, Ndo nzi pèc pècèk, a i sli dimèsh, a i slébèrdè nzlembaɗ ngaya a sam ndohi tʼherkeda.

⁵¹ Ka man ka va na skwi mbel mbiaʼa a bi ngaya, a ka va na pombai a ndo ngaya man ka faɗa na mbar a gèɗ, a David, a ndohi gi nengaʼa, a mèdèp.