II Samuel 2 - Ma Zhiklè

David, bi Juda

¹ Te deɓaʼa David a ndzhoɗo Ndo nzi pèc pècèk, a ngaɗa: I ngatsa te va kokwar Juda staɗ a i do a pa dè? A Ndo nzi pèc pècèk a mʼmbeɗa na a ma: Do! David a ngaɗa: I do nangwa? A nengaʼa a mʼmbeɗa na a ma: Do Hébron!

² A David a ndo a pa, a nda ngwozi nengaʼa cèw: Achinoam te Jizreel, a Abigail, ngwoz Nabal te Carmel.

³ Ndohi man ta zhè a sam na, David a nde ta a pa, staɗ staɗ a ndohi gi ta, a ta nza a kokwar Hebron, a kokwar man a tsagiaʼa.

⁴ Ndohi Juda ta shkè a pa, a ta faɗa na mbar a gèɗ a David, a gi bi ndohi Juda. Aman ta ngra na David, ara man ndohi Jabès te Galaad ta ra Saul,

⁵ David a nzlinde ta ndohi sak a sam ndohi Jabès te Galaad, a ngaɗa ta: Ndo nzi pèc pècèk da pshè kinè ma, a géɗ man kin woy Saul, bi kinè, a kin gau aranta a sam na, a kin raʼa.

⁶ Gar haha Ndo nzi pèc pècèk da woy kinè, da lèɓèslè a sam kinè. I ba i woy a i ga kinè skwi man amba, a géɗ man kin gau aranta.

⁷ Gar haha va-sassaya di kinè, va-ngreda va kinè auda ara ndohi man wuɗi ta a zhè. Aman Saul, bi kinè, mʼmets na ma, a ndohi Juda ta fadayè mbar a gèɗ, a ta fyè a bai.

Abner a Joab ta bèzl va

⁸ Aman Abner, kra Ner, bi sojè Saul, a nco Ish-Bosheth, kra Saul, a nckoɗa kokwar Mahanaim.

⁹ Te pa a mfeda a bai a géɗ Galaad, a géɗ ndohi Gueshur, a géɗ Jizreel, a géɗ Ephraim, a géɗ Benjamin, a géɗ Israel tèlèba.

¹⁰ Mvi Ish-Bosheth, kra Saul, 40, aman ta feda a bi Israel, a ngu bi mvi cèw. Sèi ndohi Juda ta gso va ta a David.

¹¹ A David a ngau bi ndohi Juda te Hébron, mvi 7 a ki 6.

¹² Pats ngiɗè, Abner, kra Ner, a ɓèlèlihi Ish-Bosheth, kra Saul, ta slambaɗa te Mahanaim a to do Gabaon.

¹³ Aman Joab, kra Tseruja, a ndohi David ba, ta slambaɗa te kokwar Hébron, a to do a ta zli gèɗ a nda ta a sam nhèyè iyam te Gabaon. Ndohi ngiɗè te wud ngiɗè, ndohi ngiɗè te wud ngiɗè a sam nhèyè iyam.

¹⁴ Abner a ngaɗa na Joab: Golahi sèi ta slèmbèdè a ta zli gèɗ a sam di nga! Joab a ngaɗa: Da gu arsa!

¹⁵ A ta shkè a ta ngra ta: 12 te va ndohi Benjamin aman a Ish-Bosheth, kra Saul; 12 te va ndohi David.

¹⁶ A ndohi Benjamin staɗ staɗ ta gso ndo man ta bozl va a vna te daʼai, a ta tez ta a zlazlar, a ta bazl ta a tsakwal. A géɗ nengaʼa ta baha na samaʼa ‘dak gwèsh, man a zhè te Gabaon’.

Abner a keɗa Asael

¹⁷ A pats nasa var mbiaʼa a nhüno. Ndohi David ta dzam ta nda Abner a ndohi Israel.

¹⁸ Wudahi Tseruja makar ta zhè te vaʼa: Joab, Abishai a Asael. Asael a hi ara mènèɗ te dak.

¹⁹ A Asael a mhu a verzi Abner, ko a hi ahngwa ahngwa, na verziaʼa genè.

²⁰ Abner a ngwodko gèɗ na, a ngaɗa: Asael, ka dè? Nengaʼa a ngaɗa: Iye!

²¹ Abner a ngaɗa na: Do a ka woy te va ndohi var staɗ, ko te civèɗ nangwa nangwa; co skwi var nengaʼa! Aman Asael a woya a njèkeda Abner ɓai.

²² Abner a ngaɗa na Asael zaʼa: Jèkyè! Ka woya aman i keɗe ka èhèmè? Aman i keɗe ka, i slaha a i zlècè a sam di Joab, kramam ngaya dè?

²³ Aman nengaʼa a woya a njèkeda pa ɓai. A Abner a ngeda tsakwal a deɓa, a ntuzko hwaɗaʼa, a tsakwal a ntsoko gèɗ auda a deɓa, a nkalahi a pa, a mʼmets na a samaʼa. Ko wawa man a mshkè a sam man Asael a nkalahai a mʼmets na a pa, a nzlatsahi a pa.

²⁴ Joab a Abishai ta hu a verzi Abner; pats nkala tüp, aman ta ndikè a sam za Amma, man a zhè a civèɗ ndè hèshèkèɗ Gabaon, zuraʼa a Gulach.

Mbèzl va klèng

²⁵ Ndohi Benjamin ta ɓiceda va a sam staɗ, a verzi Abner, a ta ɗaha va a géɗ za Amma.

²⁶ Abner a mbaha na Joab, a ngaɗa: Tsakwal da bazla ndo pèc pècèk dè? Ka sun ɓi ɗè, a da gi a skwi nduzlekzlekaʼa te deɓaʼa! Ka woy a ka gaɗa ta ndohai, a ta jèke ta kramamhi ta, a ta bazl ta asaɓai, a ngèmè?

²⁷ Joab a ngaɗa: Ara man Zhiklè a zhè; aman ka da goɗ aranta ɓai, ar ndohi ta hi a verzi kramamhi ta genè. Sèi ta da jèkaʼa a prèk ma kla!

²⁸ A Joab a ntsu tolom, a ndohi tèlèba ta jèke-da nhi a verzi Israel, a ta gu var asaɓai.

²⁹ A vaɗ sa, Abner a ndohi nengaʼa ta beza a ndev hèshèkèɗ Jourdain. Ta tawaɗaha woyam Jourdain, a ta beza a slrats Bithron, a ta ndikè a kokwar Mahanaim.

³⁰ Aman Joab a njèkeda nhi a verzi Abner, a mɓic ta ndohi nengaʼa tèlèba; ɓèlèlihi David 19 ta ze ta. Asael ba azbai.

³¹ Aman ɓèlèlihi David ta bazl ta ndohi Benjamin a ndohi Abner, 360.

³² A ta co Asael, a ta feda a gi dzavi bab na te Beth-léhem. Te deɓaʼa Joab a ndohi nengaʼa to do, to do, a vaɗ tèlèba. Aman ta ndikè a kokwar Hébron, sam nciɗa.