II Samuel 1 - Ma Zhiklè

Ta ngra na mʼmetsi Saul a David

¹ Te deɓ mʼmetsi Saul, aman David a ngu a ngul ndohi Amalek ma, a mshkè a deɓa a ngwi ma, a nʼnza te Tsiklag mʼmèn cèw,

² na haha ndo staɗ a nhakaɗauda te va nhèyè ndohi Saul, a maslaka nkuratsa a va, a herkeda te gèɗ. Aman a mshkè a sam David, a nkalahai a herkeda a nslébèrdèʼa.

³ David a ngaɗa na: Ka shkè tema? A nengaʼa a ngaɗa na: I wuckaɗ ga a sam nhèyè ndohi Israel.

⁴ David a ngaɗa na: Var a gu kè? Ngredayè! A nengaʼa a ngaɗa na: Ndohi ta hu ta a ma var. Ndohi kumba ta bazl ta klèng. Saul a Jonathan, kra nengaʼa ba, ta bazlaʼa.

⁵ David a ngaɗa na ndo nʼngra na aranta: Saul a Jonathan, kra nengaʼa, ta bazlaʼa, ka sun kè, nʼngra ka wa?

⁶ A ndo nʼngra na aranta a ngaɗa: I do ga za Guilboa ambali genè, a i ngots Saul a ngu var a tsakwal, a kikai a ndohi plèsh ta herda na va.

⁷ Saul a mpeda di a deɓa, a nrkayè, a mbahayè, a i mbeɗa na a ma: Awai,

⁸ nengaʼa a ndzhadyè: Ka wa? A i mbeɗa na a ma: I ndo Amalek.

⁹ A nengaʼa a ngaɗayè: Washkè a sam ga. Keɗyè, a ka ndevdyè. Va ga tonduhnduhaʼa, aman nshèffè te iyè dai.

¹⁰ A i do a sam na, a i keɗaʼa, a i ndevda na a vaʼa, te man i suna, a dè mbelè asaɓai. A i co skwi mpèɗè gèɗ bi nengaʼa, a dasi ri nengaʼa, a i hulkoɗa haha a sam bi ga.

¹¹ David a ngso maslaka a va na, a nkuratsedaussa, a ndohi a sam nengaʼa tèlèba ta gu arsa.

¹² Ta kuɗi Saul a Jonathan, kra nengaʼa, ndohi Ndo nzi pèc pècèk, a ndohi Israel tèlèba, a gèɗ man ta bazl ta a tsakwal. Ta jèkeda skwi nʼndai ha dakwaɗ.

¹³ David a ngaɗa na ndo nʼngra na aranta: Ka shkè tema? Nengaʼa a ngaɗa: I ndo mbrok, kra Amalek.

¹⁴ David a ngaɗa na: Mè! Ka ga zlau ɓai, a ka lama na ndo man Ndo nzi pèc pècèk a bada na mbar a gèɗ, a ka zeda ɗè?

¹⁵ David a mbaha na staɗ te va ndohi nengaʼa, a ngaɗa: Washkè, keɗaʼa! A nengaʼa a nkeɗaʼa.

¹⁶ David a ngaɗa na: Nshèffè ngaya klèng, mali a géɗ ngaya! Ma ngaya a nta ka ɗaf a gèɗ, aman ka gaɗa: I keɗa ndo man Ndo nzi pèc pècèk a bada na mbar a gèɗ.

David a kuɗi Saul

¹⁷ David a ntsu nguzlah, a kuɗi Saul a Jonathan, kra nengaʼa.

¹⁸ Sèi ta slebda ta wudahi Juda. Mwinda te ɗèlèwèr ndohi slagama:

¹⁹ Woba, skwi pombi Israel, man ta keɗ ka a géɗ za ngaya!

²⁰ Kin gaɗa ta ndohi te Gath ɓai, kin njè ta ndohi a civèɗ te Askalon ɓai, aman dalahi Philistie da da wuffa ɓai, a dalahi ndohi ngwon nʼngelɓiaʼa da da wuffa a ta sli dimèsh ɓai!

²¹ Kinè, zahi Guilboa, ko minmèn, ko iyam da ga a gèɗ kinè ɓai, kinè za mʼmetsai; aman te pa, ta kalda gambar ndo ngul skwai, gambar Saul. Ta faɗa na mbar a pa ɓai, aman pombaz a mbeza ndohi man ta bazl ta.

²² Lèkèɗ Jonathan a tsakwal Saul ta kalahi ambali ɓai.

²³ Saul a Jonathan, ndohi man ta woy kinè, ndohi mbelahiaʼa, aman ko te nshèffè, ko te mʼmetsai, skwi ngiɗè a nkezla kinè ɓai. Nhi ta a fena mangayakihai, wuɗi ta a fena marizhèlèhai.

²⁴ Kinè dalahi Israel, va-kuɗau Saul man a mva kinè maslaka vèvèzh a va, a mpa kinè skwi wi guro a géɗ maslaka kinè.

²⁵ Ndohi ngul skwai ta bazl ta te ndev var aranta. Jonathan, ta keɗe ka a géɗ za ngaya.

²⁶ I kuɗai a géɗ ngaya, Jonathan, kramam ga, ka ambahayè a vata! Ara man ka woyè, ambahayè holholaʼa, a fena mwoy ngwoz.

²⁷ Ndohi ngul skwai ta bazl ta aranta. Skwi ngi var klèng, asaɓai!