II Rois 24 - Ma Zhiklè

¹ Te ndev nasa, Nebucadnetsar, bi Babylone, a mshkè a ngu var, a Jojakim a ngu ɓèl na, mvi makar. Te deɓaʼa a nslambaɗa na va.

² Ndo nzi pèc pècèk a mpra na ndohi metsarhi Chaldée a gèɗ, a ndohi Syrie, a ndohi Moab, a ndohi Ammon. A mpra ta a gèɗ a ndohi Juda, aman a nzede ta, ara man Ndo nzi pèc pècèk a goɗ te ma ndohi nhadka ma, ɓèlèlihi na.

³ Skwi haha a ngu te Juda, a géɗ ma Ndo nzi pèc pècèk, aman a dzam ta auda a sam di na, a géɗ mali Manassé, a skwi man a gu tèlèba.

⁴ A géɗ ndohi man a bazl ta, man mali ta azɓai, a Pombaz tengaʼa a ndha te Jérusalem tèlèba, a Ndo nzi pèc pècèk a woya a mpra ta mali haha ɓai.

⁵ Ma ngiɗè a géɗ mizlinè Jojakim, a géɗ skwi tèlèba man a gau, ta windeda ɗèlèwèr ma bihi Juda.

⁶ Te deɓaʼa Jojakim a mʼmets na a va babhi na, a Jojakin, kra nengaʼa, a ngu bi te di man a nengaʼa.

⁷ Te deɓaʼa bi Egypte a nʼnza te kokwar na, a nda a var asaɓai. Bi Babylone a nduma kokwar na tèlèba, a hinè te woyam Egypte, ha ndè a woyam Euphrate, kokwar man a bi Egypte tèlèba.

Nebucadnetsar a nza na ma a Jérusalem

⁸ Mvi Jojakin 18, aman ta feda a bai, a ngu bi te Jérusalem ki makar. Nzlembaɗ mam na Nehushtha, dem Elnathan, te Jérusalem.

⁹ Jojakin a nʼnga skwi man ambaha Ndo nzi pèc pècèk ɓai, tèlè lèmèlèmè ara man bab nengaʼa a gau.

¹⁰ Te ndev nasa golahi Nebucadnetsar, bi Babylone, to do a ta gu var a Jérusalem, a ta nza na ma a kokwar.

¹¹ Nebucadnetsar, bi Babylone, a ndikè a kokwar, a golahi nengaʼa ta nza na ma a kokwar.

¹² Jojakin, bi Juda, a mshkè auda a sam bi Babylone, nengaʼa a mam na, a golahi nengaʼa, a bihi nengaʼa, a ndohi mizline nengaʼa, ta pu va ta a ri ta. A bi Babylone a ndzawaʼa, man a ngu bai, te mvi 18.

¹³ A nhelda skwi mèshèlè te gi Ndo nzi pèc pècèk ba, a skwi mèshèlè te gi bi ba, tèlèba a ma, kolongwi guro man Salomon, bi Israel, a gau, te gi Ndo nzi pèc pècèk, a mbazla tèlèba, lèmèlèmè ara Ndo nzi pèc pècèk a nhodko ma.

¹⁴ Te deɓaʼa a nhel ta ndohi Jérusalem tèlèba, bihi tèlèba, ndohi var tèlèba, ndohi 10.000, a ndohi mviɗè züdo, a ndohi mvècè züdo a verziaʼa, a nhel ta a bèlè. A njèkeda ndohi nkamaʼa a pa genè.

¹⁵ Bi Jojakin, a nda a Babylone a ɓèlè, a mam bi ba, a ngwozi bai, a ndohi mizlinè bai, mbibihiaʼa te kokwar, a ndzaw ta, te Jérusalem, a nhel ta a bèlè a kokwar Babylone.

¹⁶ Ndohi var ba, 7.000, a ndohi mviɗè züdo, a ndohi mvècè züdo, 1.000, tèlèba man ta slebau var, bi Babylone a a nhel ta a bèlè, a kokwar Babylone.

¹⁷ Bi Babylone a mfeda Matthania, kük Jojakin, a bai te di man a Jojakin. A nhumbaɗa nzlembaɗ nengaʼa, a mbaha na Sédécias.

Sédécias a gi bi a géɗ Juda

¹⁸ Mvi Sédécias 21, aman ta feda a bai, a ngu bi te Jérusalem mvi 11. Nzlembaɗ mam na Hamuthai, dem Jérémie, te Libna.

¹⁹ Sédécias a nʼnga skwi man ambaha Ndo nzi pèc pècèk ɓai, lèmèlèmè ara Jojakin a ngau.

²⁰ Skwi haha tèlèba a gu a géɗ man Ndo nzi pèc pècèk a ngu ndav, a ndzam ta auda a sam di na dra. Sédécias a nslambaɗa na va a bi Babylone.