II Rois 20 - Ma Zhiklè

Matakwan Ezéchias

¹ Te ndev nasa Ezéchias mbelakaɓai holholaʼa, a woya a ndivdè va. A Esaie, kra Amots, ndo nhadka ma, a ndo a sam nengaʼa, a ngaɗa: Ndo nzi pèc pècèk a goɗ aranta: Njè ta ma a ndohi gi ngaya – ka da metsi ngaya, ka mbélè azɓai.

² Ezéchias a nʼngwoda ma na a dergai, a ntsu ri a Ndo nzi pèc pècèk, a ngaɗa:

³ Na haha Ndo nzi pèc pècèk, heryè, i do a civèɗ ngaya a nlèɓèslè, a ndav tèlèba, a i gau skwi man ambaha ka te di ngaya. Ezéchias a nkuɗau ngezler-ngezleraʼa.

⁴ Esaie a ndikè a gi nʼngalaʼa te ndevaʼa di ɓai, a Ndo nzi pèc pècèk a ngaɗa na:

⁵ Do a deɓa a ka gada na Ezéchias; bi ndohi ga: Ndo nzi pèc pècèk, Zhiklè David, bab ngaya, a goɗa ar haha: I tsena ntsi ri ngaya, a i rka kuɗa a di ngaya. I woy a i mbel ka te matakwan ngaya. Te deɓ mʼmèn makar ka dè a gi Zhiklè.

⁶ I herda ka nshèffe ngaya a ma a gi mvi 15. I da mbelka ka, kinè a kokwar haha, auda te ri bi Assyrie. I da ɓer kokwar haha a géɗ nzlembaɗ ga, a géɗ David, ɓèl ga.

⁷ Esaie a ngaɗa: Va-kerɗa kslor! A ta hulkoɗai, a ta pa na a ma mblè, a bi a mbél na.

⁸ Ezéchias a ngaɗa na Esaie: I da shinè te mè, aman Ndo nzi pèc pècèk a da mbelyè, a i dè a gi Zhiklè te deɓ mʼmèn makar?

⁹ Esaie a ngaɗa: Na haha skwi man Ndo nzi pèc pècèk a ngra ka, ara man Ndo nzi pèc pècèk a da gi skwi haha lèmèlèmè ara man a goɗa: Mèzhèɓ wof da herdaha va na a deɓa deɓa a gi 10 dè? dè da herɗaha va na a ma ma a gi 10 dè?

¹⁰ Ezéchias a ngaɗa: Wuɗi a te pa ɓai, aman mèzhèɓ wof a herdaha va na a ma ma a gi 10; aman wuɗitpa aman mèzhèɓ a herdaha va na a deɓa deɓa a gi 10.

¹¹ Esaie a ntsu ri a Ndo nzi pèc pècèk, a nengaʼa a ngu a mèzhèɓ a herdaha va na a deɓa deɓa a gi 10, a sam nɗèl pats Achaz.

¹² A pats nasa, Berodac-Baladan, kra Baladan, bi Babylone, a nzlinda na ɗèlèwèr a skwi mbalai a bi Ezéchias, a géɗ man a ntsena, nengaʼa mbelakaɓai.

¹³ Ezéchias a wuffè a géɗ ndohi sak, a nʼngra ta gi mèshèlè nengaʼa tèlèba, verzhègenè a guro, a mbar a burdi mbelaʼa, a gi kolongwi skwi var nengaʼa, a skwi tèlèba man a zhè te gi mèshèlè nengaʼa. Skwi azɓai te gi bi na, te kokwar-bi nengaʼa tèlèba, man Ezéchias a ngra ta ɓai.

¹⁴ Te deɓaʼa Esaie, ndo nhadka ma, a mshkè a sam Ezéchias, a ngaɗa na: Ndohi haha ta gaɗ kè? Ta shkè a sam ngaya, ta shkè tema? Ezéchias a mʼmbeɗa na a ma: Ta shkè a sam ga te kokwar dra, ta shkè te kokwar Babylone.

¹⁵ A nengaʼa a ngaɗa ta: Ta rka te gi ngaya mè? Ezéchias a mʼmbeɗa na a ma: Ta rka skwi tèlèba te gi ga, skwi ngiɗè azɓai te gi mèshèlè ga man i ngra ta ɓai.

¹⁶ Esaie a ngaɗa na Ezéchias: Tsun ma Ndo nzi pèc pècèk:

¹⁷ Na haha pats ngiɗè a di a shkè, skwi man bababhi ngaya ta ɓicaʼa, ndohi Babylone ta da hilèʼa a kokwar ta. Ta da jèkè skwi azɓai, Ndo nzi pèc pècèk a gada.

¹⁸ A wudahi te verzi ngaya, man ka yau, ta da hel ta, a ta ndi a ntokotasl bai te gi bi Babylone.

¹⁹ Ezéchias a ngaɗa na Esaie: Ma Ndo nzi pèc pècèk man ka mendayè, amba. A nhur te ndav na: A pats nshèffè ga tèlèba, gumi a vava a zhè genè.

²⁰ Ma ngiɗè a géɗ mizlinè Ezéchias, a géɗ maya na, ara man a ru thal, a skwi man iyam a hi te pa, a hèdè iyam a kokwar, ta windeda a ɗèlèwèr ma bihi Juda.

²¹ Ezéchias a mʼmets na a va babhi na, a Manassè, kra nengaʼa, a ngu bi te di man a nengaʼa.