II Rois 19 - Ma Zhiklè

Ezéchias a jhèɗè Esaie

¹ Aman bi Ezéchias a ntsena ma haha, a nkuratseda maslaka nengaʼa aussa, a mfeda maslaka sam kuɗa a va, a ndo a gi Zhiklè.

² A nzlündo Eliakim, ndo mɓer gèɗ bai, a Shebna, ndo mwindè ɗèlèwèr, a ndohi mvi skwi a Zhiklè nhalaʼa, a maslaka sam kuɗa a va, a sam Esaie, kra Amots, ndo nhadka ma.

³ Ta gada na: Ezéchias a goɗ arsa: A patsna, pats matakwan, a ndzoan, pats man ta derde nga. Pats nyi wuda ma, wuɗi njka asaɓai.

⁴ Wa ngiɗè ba Ndo nzi pèc pècèk, Zhiklè ngaya, a ntsena ma Rabshakè, man bi nengaʼa, bi Assyrie, a nzlündo, aman a ndurɗo Zhiklè man a zhè a nshèffè, a da ga na skwi ambaɓiaʼa, a géɗ ma man Ndo nzi pèc pècèk, Zhiklè ngaya, a tsenaʼa. Gar haha tsu rai a géɗ njèkèdihiaʼa man ta zhè a nshèffè dai.

⁵ Aman ɓèlèlihi Ezéchias ta shkè a sam Esaie,

⁶ Esaie a ngaɗa ta: Va-gaɗa na bi kinè: Ndo nzi pèc pècèk a goɗ arsa: Ka gu zlau ma man ka tsena ɓai, man golahi bi ta derɗyè a vna.

⁷ Na haha i woy a i hodko na ma a gèɗ a mèzhèɓ, a minè a deɓa a kokwar na, te pa i da keɗaʼa a tsakwal.

Ezéchias a tsi ri a Zhiklè

⁸ Aman Rabshaké a mshkè a deɓa a ngwai, a nʼngots bi Assyrie a gi var a Libna, te man a ntsena, ta da gi var a vna, a ta ɗaha va te Lakis.

⁹ Bi Assyrie a ntsena a gèɗ Tirhaka, bi Ethiopie, man ta gaɗa: A mdo a nda gi var a ka. Aman a ntsenaʼa, a nzlinde ta ndohi sak a sam Ezéchias, a ngaɗa na:

¹⁰ Sèi kin gada na Ezéchias, bi Juda, aranta: Ka zhor skwi te ri Zhiklè ngaya ɓai, nengaʼa man ka pi ndav a vna, a ka huro: Bi Assyrie a da ngècè Jérusalem azɓai.

¹¹ Ka ba ka tsena skwi man bihi Assyrie ta ga ta ndohi herkeda tèlèba, ara man ta venda ta gèɗ, ta hel ta a ɓèlè. A ka huro, ka, ka da mbel ngaya ɗè?

¹² Zhiklehi ndohi herkeda, man babhi ga ta gedas ta, ta mbela kokwar ta dè? Gozan, a Charan, Retseph, a ndohi Eden man ta te Telassar?

¹³ Bi Hamath, bi Arpad, bi Sepharvaim, kokwar mbiaʼa, Héna, Ivva, ta tema?

¹⁴ Aman Ezéchias a nʼngots ɗèlèwèr te ri ndohi sak, a nteva a gi Zhiklè a géɗèʼa, a mwine ɗèlèwèr a sam Ndo nzi pèc pècèk.

¹⁵ A Ezéchias a ntsu ri a Zhiklè: Ndo nzi pèc pècèk, Zhiklè Israel, man ka nzi a géɗ sam nʼnzi bai a géɗ chérubimhai, ka staɗ ka Zhiklè a gèɗ kokwar-bihi tʼherkeda tèlèba. Ka gau giɗfèk a herkeda.

¹⁶ Fu zlembaɗ a ka tsenaʼa! Ndo nzi pèc pècèk, pu dai a ka rkaʼa! Tsun ma man Sanchérib a nzlündo haha, a ndurɗo Zhiklè man a zhè a nshèffè a vna.

¹⁷ A vava, Ndo nzi pèc pècèk: bihi Assyrie ta gedassa ndohi herkeda a kokwar-bi tengaʼa tèlèba,

¹⁸ a ta wusheda zhiklè mʼmbèh skwi tengaʼa a vogwa. Tengaʼa Zhiklè ka ɓai, sèi skwi man ri ndo a ngau, wof a kwa. Skwi man ta slaha ta gedassaʼa.

¹⁹ Anai, Ndo nzi pèc pècèk Zhiklè nga, mbel nga te ri nengaʼa, a kokwar-bihi a géɗ herkeda tèlèba ta suna, ka staɗgenè, Ndo nzi pèc pècèk, man ka Zhiklè.

Zhiklè a mbeɗa na a ma Ezéchias

²⁰ Esaie, kra Amos, a nzlündo ndo a sam Ezéchias, a ngaɗa na: Ndo nzi pèc pècèk, Zhiklè Israel, a goɗ ar haha: Skwi man ka dzhoɗo a géɗ Sanchérib, bi Assyrie, i tsenaʼa.

²¹ Na haha ma man Ndo nzi pèc pècèk a goɗa a géɗ nengaʼa: Bidalai, dem Sion, a rka ka ara zai, a ngwossaha ka. Dem Jérusalem a geda gèɗ kwotakwotaʼa te deb ngaya.

²² Ka ngwossa wa, ka derde wa, ka gada ma nfi va a wa, ka paka di nfi va a wa? A Zhiklè Israel nkezlaʼa!

²³ Ka zlindeka ta ɓèlèlihi ngaya a ta derɗyè, ka gaɗa: A kikihi ga man a zhè kumba sa, i dè a géɗ za, a verzi Liban tèlèba. I ngela wof nengaʼa nhayaʼa a wof ɗawai, a wof lakalak nengaʼa mbelaʼa. I dè a géɗèʼa, a i tsi gèɗ auda te ndev gi lak nengaʼa.

²⁴ I ri vèvèɗ a i si iyam ndohi kokwar ngiɗè, a i gwora woyam Egypte tèlèba tʼhwaɗ sak ga.

²⁵ Ka tsena ɓi dè? Daga nʼnzi a zhè i hur arsa, a i peda saha a hi zlèzlèa. Anai i gia ma, kokwar mbiaʼa nʼnzalaʼa ta ndeda a kwazlazlam ambalai.

²⁶ A ndohi man ta nza te pa, ndohi man wuɗi ta azɓai, ta gi zlau, ta a hori a dai, ta ara kuza gi dau, ara kuza man a ftsa tok-tok, ara kuza man a ftsa a géɗ gai, ara dau man halala ngworda pa.

²⁷ I sun man ka nza tʼhai, i sun man ka slambaɗa, i sun man ka shkè. I sun man ka gay ndzoan.

²⁸ A géɗ man ka gay ndzoan, a i tsena ara man ka fi va a sam ga, i wov a i tuma ka dasi a htsan, a i va ka dzala a ma, a i da ngazl ka a civèɗ man ka bezkaɗa pa.

²⁹ Na haha skwi man a da ngra ka arsa: A vi na, ta ndi skwi mwush tʼhai. A tèra, ta ndi tsatseriaʼa. A tèrauta, va-zlekau skwai, va-ɓica skwai, va-gau gi lak, va-ndau skwi te pa!

³⁰ A ndohi njèkèɗia te Juda, man ta zhè a nshèffè dai, nara ri wof—ndzhwukaɗ na a pa—a yiè.

³¹ Aman njèkèɗia a zhè aman a da shkè te Jérusalem, a ndohi man ta hu ta a ta mbel ta a za Sion. Srak Zhiklè bi wuɗai a da gi arsa.

³² Gar haha, Ndo nzi pèc pècèk a goɗ a géɗ bi Assyrie aranta: A da shkè a kokwar haha azbai, a da ɓèr sulom te pa azɓai, a gidè gambar te pa azɓai, ta ngèlè a pa a zlazlar azɓai.

³³ A dè minè a deɓa a civèɗ man a mbezkaɗa pa, aman a kokwar haha a da shkè azɓai. Ndo nzi pèc pècèk a gada.

³⁴ I woy a i ɓer kokwar haha, a i takaha ka, a géɗ nzlembaɗ! ga, a géɗ David, ɓèl ga.

Zhiklè a bazl ta ndohi Assyrie

³⁵ Te deɓaʼa, a vaɗ nasa, gol Ndo nzi pèc pècèk a mdo, a mbazl ta ndohi var Assyrie 185.000, a sam man ta mana a pa. Te mangoslèmaʼa a prèk, tèlèba ta bazl ta, sèi nckondohi mènè.

³⁶ Sanchérib, bi Assyrie, a nslambaɗa, a ndo a deɓa, a nʼnza a kokwar Ninive.

³⁷ A pats ngiɗè, aman a ntsu ri te gi Nisroc, zhiklè na, zhiklè mʼmbèh skwai, Adrammélec a Sharetser, wudahi nengaʼa, ta keɗaʼa a tsakwal. A ta hu ta a kokwar Ararat. Esar-Haddon, kra na, a ngu bi te di man a nengaʼa.