II Rois 17 - Ma Zhiklè

Ndohi Samarie ta de Assyrie ara ɓèlè

¹ Aman Achaz a ngu bi te Juda, te mvi 12, ta feda Osée, kra Ela, a bai te Israel, te Samarie. A ngu bi mvi 9.

² Nengaʼa a nʼnga skwi man ambaha Ndo nzi pèc pècèk ɓai, aman holholaʼa ara bihi Israel zlèzlèa ka ɓai.

³ Salmanasar, bi Assyrie, a ndo a nda gi var a vna, a Osée a nʼnga va na a ɓèl bai, a mpa na mpil gèɗ.

⁴ Aman bi Assyrie a nʼngots Osée, man a vhè ma a gèɗ nengaʼa. Osée a nzlinde ta ndohi sak a sam So, bi Egypte, a mpa na mpil gèɗ a bi Assyrie a mvi a mvai asaɓai. A bi Assyrie a ndzawda a dangai.

⁵ Te deɓaʼa bi Assyrie a ndo a mbeza a ndev kokwar tèlèba, a nʼnza na a ma Samarie, mvi makar.

⁶ Te mvi bi Osée 9, bi Assyrie a nduma Samarie, a nhel ta ndohi Israel a ɓèlè a kokwar Assyrie, a mpe ta a kokwar Chalach, a za Chabor, a woyam Gozan, a kokwarhi mbimbihiaʼa te Mèdes.

Ta gu ɓèlè èhèmè?

⁷ Skwi haha a ngau, a gèɗ man ndohi Israel ta gu malai a sam Ndo nzi pèc pècèk, Zhiklè tengaʼa, nengaʼa man a nhelka ta auda te kokwar Egypte, te ri Pharaon, bi Egypte, a ta dzodzor zhiklèhi mʼmbèh skwai.

⁸ A ta gu ara ndohi herkeda, man Ndo nzi pèc pècèk a dzam ta auda a sam ndohi Israel, a ta dzodzor zhiklèhi man bihi Israel ta gau.

⁹ Ndohi Israel ta ga skwi man ambaha Ndo nzi pèc pècèk, Zhiklè tengaʼa, ɓai. Ta rom sam mʼmbèh skwai a géɗ za, a sam tèlèba man ta nza a pa, a hinè a ntamagi mɓer kokwar, ha ndè a kokwar nʼngalaʼa.

¹⁰ Ta Zlatseda kwa a mblom a géɗ za staɗ staɗ tèlèba, a verzi wof staɗ staɗ tèlèba man vahaʼa a wushè azɓai.

¹¹ A sam mʼmbèh skwai a géɗ za, ta ndor burdi, ara man ndohi herkeda ta gau, man Ndo nzi pèc pècèk a dzam ta auda a ma tengaʼa, a ta gau skwi ambaɓiaʼa holholaʼa, a ta poko na gèɗ ndav auda a Ndo nzi pèc pècèk.

¹² Ta dzodzor mbèh skwi tengaʼa, man Ndo nzi pèc pècèk a ngaɗa ta: Kin gu ɓai!

¹³ Aman Ndo nzi pèc pècèk a mbid ta ndohi Israel a Juda a deɓa a ma ndohi nhadka ma nengaʼa tèlèba, a ndohi nsun skwi tèlèba, a ngaɗa: Vo-ngwodko ndav kinè te civèɗ kinè man ambaɓiaʼa, va-dzodzor ma nkwèr ga, ma man i de kinè a vna, ara ma kita tèlèba man i njè ta a gèɗ babhi kinè, a i zlündo a sam kinè a ma ndohi nhadka ma, ɓèlèlihi ga.

¹⁴ Aman ta tsena gèɗ ɓai, ta sassaya ndav ta, lèmèlèmè ara man babhi tengaʼa ta gau, man ta fa gèɗ a ma Ndo nzi pèc pècèk, Zhiklè tengaʼa, ɓai.

¹⁵ Ta kwola ma nkwèrè a ma nderzlè-ma man a nderzla a nda babhi ta, a ma malwudai man a mbid ta a vna. Ta dzodzor zhiklè mʼmbèh skwi ambalai, ta nda a ndohi ambalai, a verzi ndohi nte deɓa man ta zhè a tsagi ta, a géɗ tengaʼa man Ndo nzi pèc pècèk a njè ta ma a gèɗ: Kin da gu lèmèlèmè ara tengaʼa ɓai!

¹⁶ Ta jèkeda ma nkwèr Ndo nzi pèc pècèk, Zhiklè tengaʼa, tèlèba, a ta vüɗo marihi cèw, a ta gu mblom, a ta tsu ri a bantihai, a kia, a pats, a ta dzodzor Baal.

¹⁷ Tazlündo wudahi a dalahi tengaʼa a ta bizhè a ndev vogwa, ta pi kwa, ta tèwèlè gèɗ, ta preda va ta a ma, a ta gi skwi man ambaha Ndo nzi pèc pècèk ɓai, a ta poko na gèɗ ndav auda a vna.

¹⁸ Ndo nzi pèc pècèk a ngu ndav holholaʼa a géɗ Israel, a ndzam ta auda a sam di na dra. Njèkè ndohi te verzi Juda staɗgenè.

¹⁹ Ko Juda ba a ndzadzara ma nkwèr Ndo nzi pèc pècèk, Zhiklè tengaʼa, ɓai, ta dzodzor ma kita man ndohi Israel ta gu a ri ta.

²⁰ A Ndo nzi pèc pècèk a nkwol ta ndohi Israel, a mʼmanda ta gèɗ a hai, a mpe ta a ri metsarhai, ha a ndzam ta auda a sam di nengaʼa dra.

²¹ Aman a ngel ta ndohi Israel auda te va ndohi David ma, tengaʼa ta feda Jéroboam, kra Nebath, a bai, a Jéroboam a mpe ta ndohi Israel a wai, a ta jèkeda Ndo nzi pèc pècèk, a mwushede ta a mali mbiaʼa.

²² Ndohi Israel ta gu mali tèlèba man Jé-roboam a gau, ta jèkeda ɓai,

²³ ha Ndo nzi pèc pècèk a ndzam ta auda a sam di na dra, ara man a nguv ta te ma ndohi nhadka ma, ɓèlèlihi nengaʼa tèlèba, a ndohi Assyrie ta hel ta ndohi Israel a ɓèlè, ha patsna.

M mbèh skwai te Samarie

²⁴ Bi Assyrie a mbaha ta ndohi te Babylone, te Cutha, te Avva, te Hamath, te Sepharvaim, a mva ta herkeda te Samarie a tengaʼa te di man a ndohi Israel, a ta co kokwar-bi Samarie a kokwar ta, a ta nza a herkeda sa ara kokwar ta.

²⁵ Tʼhinè-kaɗna ta dzodzor Ndo nzi pèc pècèk a samaʼa ɓai. A Ndo nzi pèc pècèk a mpra ta marizhèlèhai a gèɗ, a mbazl ta kumba a sam ta.

²⁶ A to do a sam bi Assyrie, ta gaɗa na: Ndohi man ka helka ta auda te kokwar ta, a ka pe ta a kokwar Samarie, ta sun ntsi ri a Zhiklè kokwar haha ɓai. A mpra ta marizhèlè a gèɗ, a ta bazl ta, a gèɗ man ta sun ntsi ri a Zhiklè kokwar haha ɓai.

²⁷ A bi Assyrie a njè ta ma a gèɗ, a ngaɗa: Va-zlinda ndo mvi skwi a Zhiklè a deɓa te va tengaʼa man i helka ta auda, do do da nza a pa, da slebda ta ntsi ri a Zhiklè kokwar haha.

²⁸ A ndo mvi skwi a Zhiklè te va ndohi man a nhelka ta auda te Samarie, a mshkè a nzi a Béthel, a nslebda ta ntsi ri a Ndo nzi pèc pècèk.

²⁹ Aman verzi ndohi staɗ staɗ tèlèba ta gu Zhiklè ta, a ta feda sam mʼmbèh skwai a géɗ za, a sam man ndohi Samarie ta mboh skwi a pa. Verzi ndohi staɗ staɗ tèlèba ta cko skwi ta a rai te kokwar ta.

³⁰ Ndohi Babylone ta gau Succoth-Benoth; ndohi Cuth ta gau Nergal; ndohi Hamath ta gau Ashima;

³¹ ndohi Avva ta gau Nibchaz a Tharthak; ndohi Sepharvaim ta ndar wudahi tengaʼa, a ta slubordo Adrammélec a Anammélec, zhiklè mʼmbèh skwi Sepharvaim a vna.

³² Ta tsu ri a Ndo nzi pèc pècèk; aman ta parka ta ndohi mvi skwi a Zhiklè te va ndohi te verzi ta a vaʼa, a ta mboh skwi a géɗ za.

³³ Ta tsu ri a Ndo nzi pèc pècèk; aman ta dzakaɓda a va mbèh skwi zhiklè ndohi herkeda, man ta shkè auda te ndev tengaʼa.

Israel a gi mèdègèɗ a ma ma

³⁴ Ha patsna ta gi ara tsuf tengaʼa zlèzlèa. Ta jèjèr Ndo nzi pèc pècèk ka bai, ta jèjèr ma kita Zhiklè ka ɓai, ma nkwèrè man Ndo nzi pèc pècèk a mfa ta a gèɗ a ndohi Jacob, man a mva na nzlembaɗ na Israel, aman sèi ta giaʼa; ta gshè va a kita ta, a ma nde ta ka ɓai.

³⁵ Ndo nzi pèc pècèk a nderzla ma a nda ta, a njè ta ma a gèɗ, a ngaɗa: Kin tsu ri a zhiklèhi ngiɗè ɓai, kin gurɓahi a sam tengaʼa ɓai, kin dzodzor tengaʼa ɓai, a kin va ta skwi ɓai!

³⁶ Sèi kin tsi ri a Ndo nzi pèc pècèk staɗ genè, nengaʼa man a nhelka kinè auda te kokwar Egypte a wuɗi mbiaʼa, a nzlatseda ri na. Vo-slubordo nengaʼa, va-gurɓahai a sam nengaʼa, va-va na skwi a nengaʼa!

³⁷ A ma man a njè kinè, a ma man a de kinè a vna, a ma kita a ma nkwèrè man a va kinè, va-dzodzora, va-gau a pats a vaɗ, kin-tsu ri a zhiklè ngiɗè ɓai!

³⁸ A ma man i derzla a nda kinè, da pca kinè a gèɗ ɓai, kin dzodzor zhiklè ngiɗè ɓai,

³⁹ sèi Ndo nzi pèc pècèk, Zhiklè kinè, man kin tsu ri a nengaʼa, a nengaʼa a da mbelka kinè auda te ri mayamhi kinè.

⁴⁰ Aman ta fa na gèɗ ɓai, a ta gu ara zlèzlèa genè:

⁴¹ Aranta ndohi herkeda ta slubordo Ndo nzi pèc pècèk, aman ta dzodzor zhiklè mʼmbèh skwi tengaʼa a vaʼa. A wudahi tengaʼa, a wud wudahi tengaʼa ba, ta gu lèmèlèmè ara babhi ta, ha patsna.