II Rois 15 - Ma Zhiklè

Azaria a gi bi a géɗ Juda

¹ Aman Jéroboam a ngu bi te Israel te mvi 27, ta feda Azaria, kra Amatsia, a bi te Juda.

² Mvi nengaʼa 16, aman ta feda a bai, a ngu bi te Jérusalem mvi 52. Nzlembaɗ mam na Jecolia, dem Jérusalem.

³ Azaria a ngau skwi nzuraʼa a sam di Ndo nzi pèc pècèk, lèmèlèmè ara man Amatsia, bab na, a ngau.

⁴ Aman sam mvi skwi a Zhiklè a géɗ za, nzeda ɓai. Ndohi ta zloho skwi a Zhiklè, a ta ndara na ɓurdi a Zhiklè a géɗ za genè.

⁵ A Ndo nzi pèc pècèk a nfaha hutsoɗ a bai, a hutsoɗ a ndala a va ɓai, ha a mʼmets na. Ta va na gi ngiɗè a géɗ na, a Jotham, kra nengaʼa, a mɓer ntamagi bai, a bèzlè kita ndohai.

⁶ Ma ngiɗè a géɗ mizlinè Azaria, a géɗ skwi tèlèba man a gau, ta windeda ɗèlèwèr ma bihi Juda.

⁷ Te deɓaʼa Azaria a mʼmets na a va babhi na, a ta rda a sam babhi na te kokwar David. Jotham, kra nengaʼa, a ngu bi te di man a nengaʼa.

Zacharie a gi bi a géɗ Israel

⁸ Aman Azaria a ngu bi te Juda, te mvi 38, ta feda Zacharie, kra Jéroboam, a bi a géɗ Israel te Samarie, a ngu bi ki 6.

⁹ Nengaʼa a nʼnga skwi man ambaha Ndo nzi pèc pècèk ɓai, lèmèlèmè ara babhi nengaʼa ta gau. A njèkeda mali Jéroboam, kra Nebath, ɓai, man a mpe ta ndohi Israel a wi a vna.

¹⁰ Shallum, kra Jabesh, a nhüno a vhè ma a géɗ nengaʼa. A nkeɗaʼa te Jibleam, a mʼmets na. A nengaʼa a ngau bi te di man a nengaʼa.

¹¹ Ma ngiɗè a géɗ mizlinè Zacharie, ta windeda ɗèlèwèr ma bihi Israel.

¹² Ma man Ndo nzi pèc pècèk a nhodko na Jéhu, man a ngaɗa: Ndo nte verzi ngaya, te verzi wud wud wud fad, a da nzi a géɗ sam nʼnzi bi Israel, a ngu arsa.

Shallum a gi bi a géɗ Israel

¹³ Shallum, kra Jabesh, a ngu bai, aman Ozias, bi Juda, te mvi 39. A ngu bi te Samarie ki stadgenè.

¹⁴ A Menahem, kra Gadi, a mshkè te Thirtsa, aman a ngi var, a mdo Samarie, a nkeda Shallum, kra Jabesh, te Samarie, a mʼmets na. A nengaʼa a ngau bai te di man a nengaʼa.

¹⁵ Ma ngiɗè a géɗ mizlinè Shallum, a géɗ mvhè ma nengaʼa, ta windeda ɗèlèwèr ma bihi Israel.

Menahem a gi bi a géɗ Israel

¹⁶ Te deɓaʼa Menahem a ngedassa Thiphsach, a mbazla skwi tèlèba te pa, ko tʼhwaɗ kokwar a ngedassa tèlèba, a hinè te Thirtsa. A mbazl ta, a géɗ man ta woy a ta va na civèɗ a kokwar ɓai, a ntserɗko wuda auda tʼhwaɗ mam ta, te kokwar sa.

¹⁷ Aman Azaria a ngu bi te Juda, te mvi 39, ta feda Menahem, kra Gadi, a bai a géɗ Israel, a ngu bi te Samarie mvi 10.

¹⁸ A nengaʼa a nʼnga skwi man ambaha Ndo nzi pèc pècèk ɓai. Mali Jéroboam, kra Nebath, tèlèba, man a mpe ta ndohi Israel a wi a vna, a njèkeda ɓai.

¹⁹ Te ndev nasa, Pul, bi Assyrie, a shkè a ngu var a kokwar. Menahem a mva na Suli 1.000, 1.000, 1.000 a Pul, da takaha aman a ngècè wuɗi bai.

²⁰ Menahem a ntsakala Suli a sam ndohi Israel, a sam ndohi mèshèlè tèlèba, a mva na bi Assyrie: ndo staɗ staɗ tèlèba 15.000. Te deɓaʼa bi Assyrie a ndo a deɓa a ngwai, a nʼnza a pa asaɓai.

²¹ Ma ngiɗè a géɗ mizlinè Menahem, a géɗ skwi tèlèba man a gau, ta windeda ɗèlèwèr ma bihi Israel.

²² Te deɓaʼa Menahem a mʼmets na a va babhi na, a Pekachia, kra na, a ngau bi te di man a nengaʼa.

Pekachia a gi bi a géɗ Israel

²³ Aman Azaria a ngu bi te Juda, te mvi 50, ta feda Pekachia, kra Menahem, a bai te Israel, te Samarie, a ngu bi mvi 2.

²⁴ A nengaʼa a nʼnga skwi man ambaha Ndo nzi pèc pècèk ɓai. Mali Jéroboam, kra Nebath, man a mpe ta ndohi Israel a wi a vna, a njèkeda ɓai.

²⁵ A Pékach, kra Remalia, slaslam na, a mvhè ma a géɗ nengaʼa, a nkeda te gi mʼmènè bai, te Samarie. Ndohi Galaad 50 ta zhè a sam na. A nkeɗaʼa, a nco biaʼa te di man a na.

²⁶ Ma ngiɗè a géɗ mizlinè Pekachia, a géɗ skwi tèlèba man a gau, ta windeda ɗèlèwèr ma bihi Israel.

Pékach a gi bi a géɗ Israel

²⁷ Aman Azaria a ngu bi te Juda, te mvi 52, ta feda Pékach, kra Remalia, a bai a géɗ Israel te Samarie, a ngu bi mvi 20.

²⁸ A nʼnga skwi man ambaha Ndo nzi pèc pècèk ɓai. A njèkeua mali man Jéro-boam, kra Nebath, a mpe ta ndohi Israel a wi a vna ɓai.

²⁹ A pats man Pékach a ngu bi te Israel, Tiglath-Piléser, bi Assyrie, a mshkè, a nceda Ijjon, Abel-Beth-Maaca, Janoach, Kédesh, Hatsor, Galaad a Galilée, herkeda Nephthali tèlèba, a ma, a nhel ta ndohi kokwar a ɓèlè a kokwar Assyrie.

³⁰ Osée, kra Ela, a mhüno a vhè ma a géɗ Pékach, kra Remalia. A nkeɗaʼa, a mʼmets na. A nengaʼa a ngu bai te di man a nengaʼa, aman Jotham, kra Ozias, bi te mvi 20.

³¹ Ma ngiɗè a géɗ mizlinè Pékach, a géɗ skwi tèlèba man a gau, ta windeda ɗèlèwèr ma bihi Israel.

Jotham a gi bi a géɗ Juda

³² Aman Pékach, kra Remalia, a ngu bi te Israel, te mvi macecèwaʼa, Jotham, kra Ozias, a ngu bi te Juda.

³³ Mvi nengaʼa 25, aman ta feda a bai, a ngu bi te Jé-rusalem, mvi 16. Nzlembaɗ mam na, Jerusha, dem Tsadok.

³⁴ Pékach a ngau skwi nzuraʼa a sam di Ndo nzi pèc pècèk, lèmèlèmè ara Ozias, bab na, a gau.

³⁵ Aman sam mvi skwi a Zhiklè a géɗ za, nzeda ɓai. Ndohi ta zloho skwi a Zhiklè, ta ndara na ɓurdi a Zhiklè, a géɗ za genè. Nengaʼa a nrom ntamagi te man a géɗèʼa, a sam gi Ndo nzi pèc pècèk.

³⁶ Ma ngiɗè a géɗ mizlinè Jotham, a géɗ skwi tèlèba man a gau, ta windeda ɗèlèwèr ma bihi Juda.

³⁷ Te ndev nasa, Ndo nzi pèc pècèk a mpoko ta gèɗ auda a Retsin, bi Syrie, a Pékach, kra Remalia, a ta gu var a Juda.

³⁸ A Jotham a mʼmets na a va babhi na, a ta rda a sam babhi na, te kokwar David, bab na. Achaz, kra nengaʼa, a ngu bi te di man a nengaʼa.