II Rois 10 - Ma Zhiklè

Jéhu a gedassa gi Achab

¹ Te Samarie, wudahi Achab ta zhè 70. A Jéhu a mwindo ɗèlèwèr, a nzlinda ta mbibihiaʼa a sam ndohi nhalaʼa, a sam ndohi man wudahi Achab ta gra a sam ta, a kokwar Samarie tèlèba, a ngaɗa:

² Aman kin ngècè ɗèlèwèr haha, kinè man wudahi bi kinè a kiki var a plèshi a skwi var tèlèba te ri kinè, te kokwar mbiaʼa nʼngala te pa,

³ va-woy kra bi kinè te vaʼa man a fena tengaʼa ngiɗè, man maya na zhè. Va-feda a géɗ sam nʼnzi bi kinè, va-gu var a géɗ ndohi gi bi kinè!

⁴ A ta gi zlau a vata, ta goɗ a va ta: Bihi cèw ta slaha nengaʼa ɓai, azɓa nga dè?

⁵ Ndo mɓer gèɗ bai, a ndo mɓer kokwar, a ndohi nhalaʼa a ndohi man wudahi bai ta gra a sam ta, ta zlinde ndo a sam Jéhu, a ta gada: Nga ɓèlèlihi ngaya, nga woy a nga gi skwi tèlèba ara man ka da ngra nga. Nga vi ndo a bi azɓai. Gau ara man ka woyaʼa!

⁶ A Jéhu a nzlinda ta ɗèlèwer macecè-waʼa a ngaɗa ta: Aman kin fi gèɗ a ma ga, angoslèm a sam aranta, va-ngulkoɗi gèɗ ndohi nte gi bi kinè, a kin hulkoɗa sam ga a kokwar Jizreel. Wudahi bai, ta 70, ta a sam mbibihiaʼa te kokwar, man ta gra a sam ta.

⁷ Aman ta ngots ɗèlèwèr, ta ngelama ta gèɗ a tengaʼa 70, a ta peda gèdhi a gadagar, a ta zuɓda a kokwar Jizreel.

⁸ Ndo sak a ndo a gai, a nʼngra na bai: Gèɗ wudahi bi a zhè ma! A nengaʼa a ngaɗa: Va-peda a ntamagi kokwar, ha ango-slèm, va-kezla ta te va cèw, rèta te civèɗ ngiɗè, rèta te civèɗ ngiɗè.

⁹ A prèk, Jéhu a mshkè auda, a nzlatsa a sam ndohi tèlèba, a ngaɗa ta: Mali kinè ka ɓai! Iyè i hüno mvhè ma a géɗ bi ga, a i keɗaʼa. Aman ndohi haha, mbozlko wa?

¹⁰ Va-suna, ma mèmè man Ndo nzi pèc pècèk a nhodkoɗai a gèɗ ndohi gi Achab, a ngau, ara man a goɗ te ma Elie, ɓèl na.

¹¹ A Jéhu a mbazl ta tèlèba, njèkèdi ndohi gi Achab tèlèba, te Jizreel, mbibihiaʼa tengaʼa tèlèba, a gwoli ta, a ndohi mvi skwi a Zhiklè ta, ko staɗ a mwuc na ɓai, a njèka ɓai.

¹² Jéhu a nslambaɗa, a ndo Samarie. A civèɗ Beth-Eked, kokwar ndohi mwèr skwai,

¹³ Jéhu a nʼngots kramamhi Achazia, bi Juda, a ngaɗa: Kinè wa? Ta gada na: Nga kramamhi Achazia, a nga dè aman nga ga ta mbalai a wudahi te verzi bai, a wudahi te verzi ngwoz bai.

¹⁴ A gada: Va-parka ta a di tʼuda! A ta parka ta a di tʼuda, a ta zlama ta daʼai, a ma thal iyam Beth-Eked, tèlèba ta 42. Ko staɗ njèka ɓai.

¹⁵ A ndo a ma, a nʼngots Jonadab, kra Récab, man a mshkè, a ta zli gèɗ a vna. A nʼnga na mbalai, a ngaɗa na: Ndav ngaya a woyè zuraʼa, ara man i woy ka ɗè? Jonadab a ngaɗa: Halau! Jéhu a ngaɗa: Aman a vava, nga gu mbalai nte nlolok nte nlolok, a nengaʼa a ngu mbalai nte nlolok. A ngaɗa na, aman a shkè a nzi a kiki na.

¹⁶ A ngaɗa: Washkè a verzi ga, a ka da rka mizlinè man i gi a srak a géɗ Ndo nzi pèc pècèk! A nʼnza a sam nengaʼa te kiki na.

¹⁷ A ndikè a kokwar Samarie, a mbazl ta njèkèɗi ndohi gi Achab te Samarie, ha a ngedas ta tèlèba, ara man Ndo nzi pèc pècèk a gaɗa na Elie.

Jéhu a bazl ta ndohi Baal

¹⁸ Te deɓaʼa Jéhu a mɓic ta ndohi tèlèba. A ngaɗa ta: Achab a ngu mizlinè Baal kètè, Jéhu a da gi a fenaʼa!

¹⁹ Anai va-bahka ta ndohi nhadka ma Baal tèlèba a sam ga, a ndohi man ta jèjèrèʼa tèlèba, a ndohi mvi skwi a nengaʼa tèlèba, ko staɗ da pca ɓai! Aman i woy a i gi ngolala mvi skwi a Baal mbiaʼa. Nengaʼa man a dè azɓai, sèi da mets na! Aman Jéhu a ngu arsa, a mʼmbeɗka ta, a woya a nzede ta ndohi njèjèr Baal tèlèba.

²⁰ Te deɓaʼa Jéhu a ngaɗa: Vo-boho a pats mɓicè-va ndohai a ngolala Baal mbiaʼa! A ta boho.

²¹ A Jéhu a nzlinde ndo, da ngra ta ndohi Israel tèlèba. A ndohi njèjèr Baal ta shkè tèlèba, ko staɗ mpca a deɓa ɓai. A to do a gi Zhiklè Baal; a gi Zhiklè Baal nʼndha te civèɗ ngiɗè paffaʼa.

²² Jéhu a ngaɗa na ndo mɓer gi maslaka: Hulko ta maslaka a ndohi njèjèr Baal tèlèba! A nengaʼa a mhulko maslaka tengaʼa.

²³ A Jéhu, a nda Jonadab, kra Récab, ta shkè a sam gi Baal, a ngaɗa ta ndohi njèjèr Baal: Va-war ndohi tèlèba, va-njunjoro, ndo ndzodzor Ndo nzi pèc pècèk a te va kinè ɓi ɗè, sèi ndohi ndzodzor Baal dè?

²⁴ A to do a gai, aman ta zli skwi a ta ndara na skwi a Baal. Jéhu a nzlatseda ta ndohi 80 tʼuda, a ngaɗa ta: Teva ndohi man i pa kinè a rai, ndo man a da wuc na te civèɗ na, a pilè a nshèffè na.

²⁵ Aman ta ndara na skwi a Baal klèng ma, Jéhu a ngaɗa ta golahi a bihi sojè: Vo-do, va-bazl ta, ko staɗ da shkè auda ɓai! A ta bazl ta a tsakwal, a ta wushede ta aussa, a to do a gi Baal, tʼhwadaʼa,

²⁶ a ta ckoɗi mblom auda, a ta fa na vogwa,

²⁷ a ta mbeɗa sam mvi skwi a Baal, a ta geda a gi zai. Ta zhè ha patsna.

²⁸ Aranta Jéhu a nzeda Baal te Israel.

²⁹ Aman Jéhu a njèkeda mali man Jéroboam, kra Nebath, a mpe ta ndohi Israel a wi a vna, ɓai, a ndzodzor mari guro te Béthel, a mari guro te Dan.

Zhiklè a gaɗa na Jéhu

³⁰ Ndo nzi pèc pècèk a ngaɗa na Jéhu: A gèɗ man ka gu mizlinè man ambahayè, a skwi nzuraʼa a sam di ga, a ka gu ara man i woyaʼa a sam ndohi gi Achab, ndohi nte verzi ngaya fad ta da nzi a géɗ sam nʼnzi bi Israel.

³¹ Aman Jéhu a nʼnga maya ɓai, a ndzadzara ma kita Ndo nzi pèc pècèk, Zhiklè Israel, a ndav tèlè ɓai, a njèkeda malai man Jéroboam a mpe ta ndohi Israel a wi a vna ɓai.

³² Te ndev nasa, Ndo nzi pèc pècèk a nhüno a ntsakaha kokwar Istrael kètè kètè. Hazael a mbazl ta ndohi Israel a ma kuma Israel tèlèba,

³³ a hinè te woyam Jourdain, te civèɗ mvèng pats, kokwar Galaad tèlèba, a Gad a Ruben a Manassé, a hinè te Aroer, a ma woyam te man a géɗèʼa, ha ndè Galaad a Basan.

³⁴ Ma ngiɗè a géɗ mizlinè Jéhu, a géɗ skwi man a ngau, a géɗ maya na, ta windeda ɗèlèwèr ma bihi Israel.

³⁵ A Jéhu a mʼmets na a va babhi na, a ta rda a Samarie. Joachaz, kra nengaʼa, a ngu bi te di man a nengaʼa.

³⁶ Jéhu a ngu bi te Samarie a géɗ Israel, mvi 28.