II Chroniques 9 - Ma Zhiklè

Bi Séba, ngwozaʼa, a shke a sam Salomon

¹ Bi te Séba, ngwozaʼa, a ntsena nʼnjèl Salomon, a mshkè aman a jkeda a ma njkedè. A shkè a ndohi a verzi kumba, a zlugumihai, man ta zuɓko ɓurdi a guro a vata a kwa mbelaʼa. Aman a mshkè a sam Salomon, a ndzhoɗo ma tèlèba man a hurkoɗi a dè jhèɗèʼa.

² Salomon a mʼmbeɗa na a pa tèlèba. Skwi man bi a sun ɓi ba, azɓai; a skwi man a slaha a mʼmbeɗa na a pa ɓi ba, azɓai.

³ Aman bi te Séba, ngwozaʼa, a nrka maya Salomon, a gi man a nroma,

⁴ a skwi nʼndi nengaʼa, a ndohi mizlinè nengaʼa, golahi nengaʼa man ta tila, a maslaka tengaʼa, ndohi ngsa na zom, a skwi man a ndara na Ndo nzi pèc pècèk te gi Zhiklè, a nrzl na a vata.

⁵ A ngaɗa na bai: Skwi man i tsena te kokwar ga a géɗ ngaya, a géɗ maya ngaya, narsa a vava.

⁶ I woya a i fi gèɗ a ma ndohi azɓai, ha i shkè a i rka a di ga. Aman a vava, ta ngray tèlè ɓai, ko rètaʼa ba ta ngray ɓai. Maya man ka ngotso a fena man ta gèɗè te labar ma ngaya man i tsenaʼa.

⁷ Mwuffe a sam ngwozi ngaya, mwuffè a sam golahi ngaya man ta zhè a sam ngaya pèc pècèk a ta tsena ma ngaya man maya te pa.

⁸ I shid gèɗ a Ndo nzi pèc pècèk, Zhiklè ngaya, man a va ka pombai, a nʼnzede ka a géɗ sam nʼnzi bi Israel, a fe ka a bai Ndo nzi pèc pècèk, Zhiklè ngaya. A géɗ man Zhiklè a woy Israel, a woya aman a nzi a ma ma, a nfe ka a bai a géɗ nengaʼa, a ka gi kita zuraʼa.

⁹ A mva na guro a bai te di go-zhèm gozhèm kumba, kilo 7.200. Ɓurdi kumba, a kwa mbelaʼa kumba, ara man bi te Séba, ngwozaʼa a mva na bi Salomon, ta rka te kokwar te deɓaʼa asaɓai.

¹⁰ Ɓèlèlihi Huram a Salomon, man ta hulkoɗi guro te Ophir, ta hulkoɗi wof wuzlèr a kwa mbelaʼa a vaʼa.

¹¹ A wof wuzlèr, bai a ngau skwi ntivè-ntivè te gi Zhiklè, te gi bai, a tèzlèzlèu a ganzavar ndohi nfi dimèsh, man ta ngots te kokwar Juda halaʼa asaɓai.

¹² Bi Salomon a mva na bi Séba, ngwozai, skwi tèlèba man a woyaʼa, man a jhèɗèʼa, a fena skwi man a mva na bai. Te deɓaʼa a mʼmen na a deɓa a kokwar na, a nda golahi na.

Maya Salomon a skwi mèshèlè nengaʼa

¹³ Guro man ta hulko na Salomon a mvi a mvai, gozhèm gozhèm kumba, kilo 39.600;

¹⁴ a va skwi man ndohi mprè skwai ta tsokolko na, a bihi Arabe, a bihi kokwar man ta hulko na guro a verzhègenè.

¹⁵ Bi Salomon a ngau gambar mbibihiaʼa 200, a guro; guro man ta gu a vna, te di kilo 10;

¹⁶ a gambarhi nkèshèhiaʼa 300, a guro, staɗ staɗ te di guro kilo 5. A bai a mpe ta a gi a sam nhaya wof te Liban.

¹⁷ Bai a ngau sam nʼnzi bi mbiaʼa a zlèʼèn fakawai, a guro ndaɓalaʼa.

¹⁸ Sam sak ntivè a sam nʼnzi bai a gi 6; sam ndingèɗè deɓa ngaʼa. A tsagi cèw, sam mpi lolok, a marizhèlèhi cèw a pa.

¹⁹ A sam sak ntivè, marizhèlèhi 12 a pa, 6 te civèɗ ngiɗè, 6 te civèɗ ngiɗè. Ta ga arsa a sam kokwar bi ngiɗè ɓai.

²⁰ Kokwi bi Salomon tèlèba guro, kolongwi gi a sam wof nhayaʼa te Liban, tèlèba guro ndaɓalaʼa. Verzhègenè ta fu a skwi man gani az a pa ɓai te va man Salomon a zhè.

²¹ Aman bai a nʼngots wuromhi man to do Tarsis a nda ɓèlèlihi Huram. Wuromhi ta shkè ngwi te Tarsis, sak staɗ tʼhwaɗ mvi makar, a ta hulkoɗi guro, verzhègenè, zlèʼèn fakawai, gelakai a pelaibelökwöm.

²² Aranta bi Salomon a nʼngots skwi mèshèlè a maya a fena bihi tèlèba a géɗ herkeda.

²³ Bihi tèlèba a géɗ herkeda ta woy a ta rka di Salomon, a ta tsena ma nengaʼa man maya te pa, man Zhiklè a va na.

²⁴ Staɗ staɗ tèlèba ta shkè a skwi mbalai: verzhègenè, guro, maslaka, skwi var a ɓurdi, plèsh, kdèh, a mvi a mvai.

²⁵ Plèshihi a kiki Salomon, 4.000. Plèshihi te kokwar man kiki var te pa, man bai te Jérusalem, 12.000.

²⁶ A nkwor bihi tèlèba, a hün a sam woyam Euphrate, ha ndè a ma kokwar ndohi Philistie, ha ndè a kuma Egypte.

²⁷ Bai a ngau a Suli te Jérusalem a zhè kumba ara kwa, a wof ɗawai a zhè kumba ara tèngètè te dak.

²⁸ Plèshihi Salomon a nsumka ta te Egypte, te kokwar ngiɗè tèlèba.

Ma ngiɗè a géɗ Salomon, bai

²⁹ Ma ngiɗè, a géɗ Salomon, nhin na, ha nʼndikèmaʼa, ta windeda ɗèlèwèr Nathan, ndo nhadka ma, a ɗèlèwèr nhadka ma Achija, te Silo, a ɗèlèwèr nhadka ma Iddo, ndo nsun skwai, man a mwindo a géɗ Jéroboam, kra Nebath.

³⁰ Salomon a ngu bai te Jérusalem, a géɗ Israel tèlèba, mvi 40.

³¹ Te deɓaʼa a mʼmets na a va babhi na, a ta rda a kokwar David, bab na. Roboam, kra na, a ngu bi te di man a na.