II Chroniques 8 - Ma Zhiklè

Salomon a til kokwar-bi na

¹ Man mvi 20 klèng, a Salomon a nrom gi Zhiklè, a gi na, klèng ma,

² a nʼngalda kokwar man Huram a mva na Salomon, a pa a zlazlar, a mpe ta ndohi Israel a pa.

³ A Salomon a mdo Hamath-Tsoba, a ndumaʼa.

⁴ A ntil Thadmor tʼhèshèkèɗ, a kokwarhi tèlèba man a hayda skwi nʼndi a pa, tʼherkeda Hamath tèlèba.

⁵ A ntilda Beth-Horon te géɗèʼa, a Beth-Horon te godok a pa zaʼa, kokwar nʼngala te pa, a zlazlar kokwar a ntamagi mɓaraʼa.

⁶ Baalath, a kokwar tèlèba man bi Salomon a hayda skwi nʼndi a pa, kokwar tèlèba man a hayda kiki var a pa, kokwar tèlèba man ndohi plèsh te pa, skwi tèlèba ma ba, man Salomon a woya a nrèmè te Jérusalem, te Liban, te kokwar-bi nengaʼa tèlèba.

⁷ Njèkèɗi ndohi te verzi Heth, Amor, Phérez, Hévi a Jé-bus, tengaʼa man verzi ndohi Israel ka ɓai,

⁸ wud wud tengaʼa man ta jèkaha te kokwar man ndohi Israel ta bazl ta ɓai, Salomon a mpar ta a ɓèlèlihi ha patsna.

⁹ Aman wudahi Israel, Salomon a nge ta a ɓèlè ɓai. Tengaʼa ndohi var bihi ndohi kiki var, tsuvom ndohi mizlinè na, a ndohi plèsh.

¹⁰ Tengaʼa man bihi kokwar, man Salomon a mpe ta a mizlinè, ta par ta a golahi bai: 250 man ta slaha ta gi bi a géɗ ndohai.

¹¹ Salomon a ncko dem Pharaon auda te kokwar David, a nda a gi man a rama na, a ngaɗa: Ko staɗ te va ngwozi ga da nza te gi David bi Israel ɓai, a géɗ sam nkezlaʼa man koti Ndo nzi pèc pècèk a pa.

Salomon a nrufa gi Zhiklè

¹² Te ndev nasa Salomon a nʼndara na skwi a Ndo nzi pèc pècèk, a géɗ sam mvi skwi a Zhiklè, man a rom a ma gala gai;

¹³ a nzla na skwi a Zhiklè, ara man Moise a goɗa a géɗ pats ngiɗè, pats ngiɗè; a pats nshèk va ba, a mvèng kia, a pats ngolala sak makar tʼhwaɗ mvai, ngolala movar man skwi nshégèrè a te di ɓai; a pats ngolala luma luma, a ngolala te godzovok.

¹⁴ A mpe ta ndohi mvi skwi a Zhiklè a mizlinè ta, a ndohi Lévi a skwi man ta giaʼa, a ta slébèrdè Zhiklè, a takaha ta ndohi mvi skwi a Zhiklè, ara man David, bab na, a tildahai, pats ngiɗè pats ngiɗè ara mizlinè ta, a ndohi mɓer ntamagai man ta veni a nvenai a ntamagi staɗ staɗ tèlèba. Aranta David, ndo Zhiklè, a ntildahai.

¹⁵ A ta ngwoda skwa ɓai, ko a géɗ gi skwi mèshèlè, man bi David a ntildahai, ko a géɗ ndohi mvi skwi a Zhiklè, ko a géɗ ndohi Lévi.

¹⁶ Aranta ta rufa mizlinè Salomon tèlèba, a hün te pats man ta pau verzi kwa gi Zhiklè, ha pats man Salomon a nrufa giaʼa.

¹⁷ Te ndev nasa, Salomon a mdo Etsjon-Guéber, a Eloth, a kokwar ndohi Edom, a ma woyam mbiaʼa.

¹⁸ Huram a nzlinde ta ɓèlèlihi na, a ta va na wuromhi a ndohi man ta sun mizlinè a géɗ iyam, a to do a nda ɓèlèlihi Salomon a kokwar Ophir, a ta hulkoɗi guro kilo 27.000 te di gozhèm gozhèm kumba, a ta va na bi Salomon.