II Chroniques 7 - Ma Zhiklè

Vogwa te zhiklè

¹ Aman Salomon a nʼndeva ntsi ri nengaʼa ma, vogwa a nkalkaɗahai te zhiklè, a nʼndeda skwi man ta ndara na Zhiklè a ta zlaha na Zhiklè a ma, a nʼnjèl Ndo nzi pèc pècèk a nʼndha gi Zhiklè.

² Ndohi mvi skwi a Zhiklè ta slaha ta dè a gi Zhiklè ɓai, te man nʼnjèl Ndo nzi pèc pècèk a nʼndha gi Zhiklè.

³ Aman ndohi Israel ta rka vogwa a shkè te zhiklè, ta gurɓahai a sam man ta papaya a kwa, a ta tsu rai a ta slubordo Ndo nzi pèc pècèk: Te man nengaʼa amba, pombi nengaʼa a nzi a mèdèp.

Ngolala mwine gi Zhikiè

⁴ Te deɓaʼa bi a ndohi tèlèba ta zla na skwi a Ndo nzi pèc pècèk:

⁵ zlèhi 22.000; tambakihi 120.000, man bi Salomon a zla na Zhiklè. Aranta bai a ndohi tèlèba ta gu ngolala mwinè gi Zhiklè.

⁶ Ndohi mvi skwi a Zhiklè ta zlatsa a sam mizlinè ta, a ndohi Lévi ba a skwi dimèsh Ndo nzi pèc pècèk man bi David a ngau, aman a nslubordo Zhiklè a vna, a ta slu dimèsh: Va-shüd gèɗ a Ndo nzi pèc pècèk, te man pombi nengaʼa a nzi a mèdèp. A ndohi ntsi tolom ta tsu tolom zuraʼa a ma ndohi mvi skwi a Zhiklè, a ndohi Israel tèlèba ta zlatsa a tsagi tengaʼa.

⁷ Salomon a mvu ndev gala, man a zhè a magi Ndo nzi pèc pècèk, a gèɗ mizlinè Zhiklè nkezlaʼa. A pa a nʼndara na skwi a Zhiklè, a mbeza skwi nshid gèɗ, a gèɗ sam mvi skwi a Zhiklè, man Salomon a ngau, a slra ɓai; skwi man ta ndara na, a movar a mbeza man ta va na, kumba.

⁸ Te ndev nasa, Salomon a ngau ngolala te godzovok mʼmèn 7, a nda ndohi Israel tèlèba, mɓicè-va mbiaʼa, a hinè te Hamath, ha ndè a ma woyam Egypte.

⁹ A pats matsamakaɗaʼa ta ɓüco va a ndikè-ma ngolala. Ngolala nhin mvi skwi a Zhiklè ta gu mʼmèn 7, a ngolala te godzovok mʼmèn 7.

¹⁰ A ki 7, mʼmèn 23, a mpre ta ndohai a to do ngwai, ta wuffè a ta gu langlangaʼa a gèɗ skwi man amba tèlèba man Ndo nzi pèc pècèk a ga na David a Salomon a ndohi Israel, ndohi nengaʼa.

Zhiklè a gudoko na va a di a Salomon zaʼa

¹¹ Aranta Salomon a nrufa gi Zhiklè, a gi bai, a nʼndeva mizlinè tèlèba man a hur a da giaʼa te gi Zhiklè, te gi bi na, amba amba.

¹² Te deɓaʼa Ndo nzi pèc pècèk a ngudoko na va a di a vaɗ, a ngaɗa na: I tsena ntsi ri ngaya, a i ngotsko sam haha auda a sam mvi skwi a iyè.

¹³ Aman i ɓara giɗfèk, a iyam a shkèhi azɓai, aman i bahka ta dzarai a ta ndeda skwi te kokwar a ma, man i pra ta gidiɓèr a va ndohai, a ndohi ga, man ta baha ta a nzlembaɗ ga,

¹⁴ a ta da manda gèɗ ta a hai, a ta tsi rai a ta hassyè, a ta ngwodko ndav ta, a ta jèkeda civèɗ tengaʼa man ambaɓai, i woya aman i tsena te zhiklè te géɗèʼa, a i pra ta mali ta, a i mbela kokwar ta zaʼa.

¹⁵ Gar haha i woya a i winè di ga a i poko di a hi a i winè zlembaɗ ga a i cinè ntsi ri a sam na haha.

¹⁶ I ngotsko gi haha auda a i gaʼa a sam ga nkezlaʼa, a nzlembaɗ ga da nza a pa pèc pècèk, a di ga a ndav ga a pa a mèdèp.

¹⁷ Aman ka dzadzarkayè ara David, bab ngaya, a ka gi skwi tèlèba ara man i njè ka a gèɗ, a ka jèjèr ma nkwèr ga a ma man i de kinè a vna,

¹⁸ i woya a i nzala sam nʼnzi bi ngaya, ara man i pasla na ri a hi a David, bab ngaya, man i gaɗa na: Verzi ngaya a da zhè pèc pècèk a gèɗ sam nʼnzi bi Israel.

¹⁹ Aman kin da ngwoday deɓa, a kin jèkeda ma nkwèr ga a ma kita ga, man i va kinè, a kin dè a kin jèjèr zhi-klèhi ngiɗè, a kin tsi ri a tengaʼa,

²⁰ i da zede kinè auda te kokwar ga man i va kinè, a gi haha man i baha na a nzlembaɗ ga, i kwolaʼa, a ndohi herkeda tèlèba ta livèʼa a ta ngala na gèɗ.

²¹ Ko wawa man a da bizhè a sam gi haha, man te va nasa ntila amba amba, a da rzl na. Aman ta da jhèɗèʼa: Ndo nzi pèc pècèk a gedassa kokwar haha, a gi haha aranta èhèmè?

²² Ta da mbeɗa na a ma: A gèɗ man ta jèkeda Ndo nzi pèc pècèk, Zhiklè tengaʼa, man a helka ta auda te kokwar Egypte, a ta dzodzor zhiklèhi ngiɗè tsaɗ, a ta tsu ri a tengaʼa, a ta gu mizlinè tengaʼa. A gèɗ nengaʼa a nkalde ta a matakwan haha tèlèba.