II Chroniques 4 - Ma Zhiklè

¹ A ngau sam mvi skwi a Zhiklè züdo a vaʼa: ngurèʼa a tsi ri 20; nguzlohaʼa a tsi ri 20, njüv na a tsi ri 10.

² A ngau skwi mpèn va, man ka tseda ri a ndevaʼa, a tsi ri 10, ndalalkaʼa, njüv na a tsi ri 5. Gogumi man a tsi ri 30 a slaha a nderzlaʼa.

³ Skwi mveɗkaɗna a pa a maʼa, nara waʼai, te civèɗ cèw, a tsi ri 30.

⁴ Sak skwi mpèn va nara zlèhi 12; 3 ta pu di a civèɗ man a géɗèʼa, 3 a civèɗ nkèl pats, 3 a tsagai, 3 a civèɗ mvèng pats. Skwi mpèn va a deɓ tengaʼa; zlèhi ta derzla verzai.

⁵ Nckè nengaʼa nara hwaɗ rai; a ta para na ma a deɓa ara nwurzhè bèmbèzl; iyam a dè a pa duzlakhi 2.000.

⁶ A ngau kreblom 10; a mpeda 5 te civèɗ ri mandai, 5 te civèɗ ri gula, a ta pèn skwi te pa. Sèi ta pèn kolongwi man ta ndara na skwi a Zhiklè a vna, te pa. Aman skwi mpèn va, ndohi mvi skwi a Zhiklè ta pèn va te pa.

⁷ Te deɓaʼa, a ngau skwi nfi vogwa 10, ara man Zhiklè a jhèɗèʼa, a mpeda a gi Zhiklè; 5 te civèɗ ri mandai, 5 te civèɗ ri gula.

⁸ A ngau table 10, a mpeda a gi Zhiklè; 5 te civèɗ ri mandai, 5 te civèɗ ri gula, a kokwi guro 100.

⁹ Te deɓaʼa a nʼngela ta dalmagi a ndohi mvi skwi a Zhiklè, a dalmagi mbiaʼa, a ntamagiaʼa. Ntamagi a mbè te pa a züdo.

¹⁰ Skwi mpèn va a mfeda a magi Zhiklè, te civèɗ mvèng pats, te man a tsagai.

¹¹ Te deɓaʼa Huram a ngau shiɗèf, a tassa, a kokwai. Aranta Huram a nrufa mizlinè man Salomon a mva na a rai te gi Zhiklè.

¹² Sak gi cèw, a züdo man a nüɓa na va sak gai. Zlèlè cèw a va züdo man a nüɓa na va sak gai.

¹³ Skwi ndèlèlk-ndèlèlkaʼa 400 marʼa nderzla na va zlèlè züdo cèw, 200 a sam zlèlè staɗ.

¹⁴ Kreblom 10, a tassa züdo 10 a gèɗ kreblom.

¹⁵ Skwi mpèn va a deɓ zlèhi 12.

¹⁶ Shidèf, a tassa, a kokwai, a kolongwi ngiɗè tèlèba, man Huram-Abi a ga na bi Salomon, a géɗ gi Zhiklè, nʼngaʼa a züdo nterkasla.

¹⁷ Bai a ngod aman ta viɗèʼa a ma woyam Jourdain, a kulkwèsl rɓasl, te ndev Succoth a Tsereda.

¹⁸ Salomon a ngau kolongwi haha tèlèba kumba. Züdo man ta gu mizlinè a vna, ndo a slaha a nlivèʼa azɓai.

¹⁹ Salomon a ngod aman ta gi kolongwi tèlèba man ta zhè te gi Zhiklè: sam mvi skwi a Zhiklè guro, a table man movar nkezlaʼa a pa,

²⁰ skwi nfi vogwa a skwi nhél sam tengaʼa, a ta fi vogwa a ma sam nkezli-nkezlaʼa, ara man Zhiklè a jhèɗèʼa, a guro ndaɓalaʼa,

²¹ a nwurzhè guro, a skwi nhél sam, a pidökihai, tèlèba nʼngaʼa a guro ndaɓalaʼa.

²² Gwèsh, a kokwai, a tassa a shiɗèf a guro ndaɓalaʼa. Skwi nderzlè ntamagi ba, a gi tʼhwaɗaʼa a sam nkezli-nkezlaʼa ba, a ntamagi gi Zhiklè ba, a gi mbiaʼa, tèlèba a guro.