II Chroniques 3 - Ma Zhiklè

Salomon a rèm gi Zhiklè

¹ Salomon a nhüno nrèm gi Zhiklè te Jérusalem, a géɗ za Morija, a sam man Ndo nzi pèc pècèk a gudoko na va a David, bab na, a sam man David a tildahai, a hedak Ornan, ndo Jébus.

² Aman a ngu bai te mvi mafadaʼa, a ki 2, a nhüno nrèm gai.

³ Gi Zhiklè man Salomon a roma, ngurè nengaʼa a tsi ri 60, ntsi ri halakai; nguzlohaʼa a tsi ri 20.

⁴ Hwaɗ gala gi Zhiklè, ngurè nengaʼa a tsi ri 20, a dalmagiaʼa. Njüv nengaʼa a tsi ri 20. Mʼmbèʼa tʼhwaɗaʼa a guro ndaɓalaʼa.

⁵ A nderzla na wof ɗawai a va gi Zhiklè, a mʼmbèda pa tʼhwaɗaʼa, a guro ndaɓalaʼa, a mvècèʼa ara wof gangar, ara nwurzhè skwi tsaɗ tsaɗ.

⁶ A ta dizla na kwa mbelaʼa a deɓa a gi Zhiklè, a ta jézlè a vna. Guro a shkè te Parvaim.

⁷ Ntatak gai, ntamagai, dergai, ntamagi tèlèba, a mbèda pa a guro, a ndawaraʼa Ché-rubimhai a dergai.

⁸ Te deɓaʼa a ngau sam nkezli-nkezlaʼa. Ngur nengaʼa lèmèlèmè ara nguzloh gi Zhiklè, a tsi ri 20. Nguzlohaʼa a tsi ri 20. A mbèda pa a guro ndaɓalaʼa, 36.000 kilo te di gozhèm gozhèm kumba.

⁹ Sulom te di guro sulai 300.000. Ko gi te géɗèʼa, a mbè te pa a guro.

¹⁰ A sam nkezli-nkezlaʼa a ngau ché-rubimhi cèw, a maya mizlinè man amba, a mbèda pa a guro.

¹¹ Kelpasl chérubim tèlèba a tsi ri 20. Kelpasl staɗ a tsi ri 5, a lama na dergai; kelpasl ngiɗè a tsi ri 5, a lama na kelpasl chérubim macecèwaʼa.

¹² Lèmèlèmè kelpasl chérubim macecèwaʼa, a tsi ri 5, a lama na dergi ngiɗè, a kelpasl ngiɗè a lama na kelpasl chérubim ngiɗè.

¹³ Kelpasl chérubimhi cèw, mwinèʼa, a tsi ri 20. Ta zlatsa a sak ta, ta peda di a civèɗ sam nkezlaʼa.

¹⁴ Maslaka a ntamagi a ngau a vèvèzh mʼmadzaʼa a nteva, bata maslaka, a nɗahda chérubim-hi a pa.

¹⁵ A magai a ngau sak gi cèw, ngurèa a tsi ri 35, züdo man ta nüɓa na va a tsi ri 5.

¹⁶ A ngau jèrɓi, a nkelawa a pa a sam sak gai, a skwi ndèlèlk-ndèlèlkaʼa 100, a nderzla a jèrɓai.

¹⁷ Sak gai a nzlatseda a magi Zhiklè ngiɗè te civèɗ ri mandai, a mbaha na Jakin; ngiɗè te civèɗ ri gula, a mbaha na Boaz.