II Chroniques 2 - Ma Zhiklè

Salomon a bi Huram

¹ Te deɓaʼa Salomon a woya a nrèm gi a nzlembaɗ Ndo nzi pèc pècèk, a gi man bi a da nzi a pa.

² A mpar ta ndohi nʼnderh skwai 70.000, a ndohi mbèzl kwa 80.000, te za, a ndohi mɓer mizlinè ta, 3.600.

³ Te deɓaʼa Salomon a nzlündo ndo a sam Huram, bi Tyr, da gaɗa na: Gau lèmèlèmè ara man ka gu a sam David, bab ga, man ka zlinda na wof ɗawai, aman a nrèm gi aman a nzi a pa.

⁴ Na haha i hur i da rèm gi a nzlembaɗ Ndo nzi pèc pècèk, Zhiklè ga, a i kezlaʼa a skwi na, a ta ndara na ɓurdi man a zhkèha te pa, man amba, a ta feda movar nkezlaʼa a pa pèc pècèk, a ta ndara na skwi a prèk, a dakwaɗ, a pats nshèk va, a mvangkaɗ kia, a pats ngolala Ndo nzi pèc pècèk, Zhiklè nga, ara man ndohi Israel ta gia pèc pècèk a mèdèp.

⁵ Gi man i woya a i rèmèʼa, sèi gi mbiaʼa. Zhiklè nga mbiaʼa, a fena zhiklèhi ngiɗè tèlèba.

⁶ Aman nslaha a nrèm gi a nengaʼa wa? Ko sam te giɗfèk, kala a géɗèʼa, a slra na ɓai. I wa, aman a i rèm gi nengaʼa? Sèi man i ndara na ɓurdi genè kla!

⁷ Gar haha zlündokoy ndo, man a sun mizlinè guro, verzhègenè, a züdo, maslaka a vèvèzh, a ntevaʼa a mʼmadzaʼa, man a sun mpètè wof, a nda ndohi nsun maya mizlinè, man ta da zhè a sam ga te Juda, te Jérusalem, man David, bab ga a mpe ta a mizlinè.

⁸ Zlündokoy wof ɗawai, a wof lakalak, a wof wuzlèr te Liban! Aman i suna, ndohi ngaya ta sun nʼngél wof te Liban. Ɓèlèlihi ga sèi ta takaha ta bèlèlihi ngaya,

⁹ a ta tilay wof a vata. Aman gi man i woya a i rèmèʼa, sèi gi mbiaʼa, ntilèʼa.

¹⁰ A bèlèlihi ngaya, ndohi nʼngél wof, man ta ngel wof, i va ta skwi nʼndi ta: gufa dau bho 80.000; marorai bho 80.000: barassa duzlak 40.000: mbar gongong 40.000.

¹¹ Huram, bi Tyr, a zlinda na ɗèlèwèr a deɓa a sam Salomon, a ngaɗa na: A géɗ man Ndo nzi pèc pècèk a woy ndohi na, a fe ka a bi a géɗ tengaʼa.

¹² Huram a gaɗa: I shid gèɗ a Ndo nzi pèc pècèk, Zhiklè Israel, man a ngu giɗfèk a herkeda, man a va na kra a David, man maya na zhè, a sun skwai, a hér aman a nrèm gi a Ndo nzi pèc pècèk, a gi aman bi a da nzi te pa.

¹³ Gar haha i zlinda ka ndo man maya na zhè, man a sun skwai: Huram-Abi.

¹⁴ Mam na te va gwoli Dan, bab na te Tyr. Nengaʼa a sun mizlinè guro, verzhègenè, züdo, kwa a wof a maslaka vèvèzh a ntevaʼa a mʼmadzaʼa, a bata maslaka, nwosla te mpètè skwi tsaɗ tsaɗ tèlèba, te nhér maya mizlinè mèmè tèlèba, man ta jhèɗè a sam na, a nda ndohi nsun maya mizlinè ngaya, a nda ndohi nsun maya mizlinè David, bab ngaya, bi ga.

¹⁵ Gar haha, bi ga da zlündo dau, marori, mbar a barassa a sam bèlèlihi na, ara man a goɗa.

¹⁶ Aman nga, nga woy a nga dè a nga ngél wof te Liban, tèlèba ara man ka woyaʼa, a nga zlinda ka a géɗ iyam mbiaʼa a kokwar Japho. Te pa ka helda a kokwar Jérusalem.

Salomon a nger ndohai

¹⁷ Salomon a ngér mbrokihi te kokwar Israel tèlèba, te deɓ man David, bab na, a nger ta. A nʼngots 153.600.

¹⁸ Te va tengaʼa a mpe ta 70.000 a ndohi nʼnderh skwai, 80.000 a ndohi mbèzl kwa te za Juda, a 3.600 a ndohi mɓer mizlinè ta, man ta ndzaraha ta ndohi mizlinè.