II Chroniques 1 - Ma Zhiklè

Salomon a jhèɗè maya

¹ Salomon, kra David, nʼnzala te bi ma, a Ndo nzi pèc pècèk, Zhiklè nengaʼa, a zhè a nda nengaʼa, a ngaʼa a mbiaʼa.

² Salomon a ngaɗa ta ndohi Israel tèlèba, a sam bihi a géɗ gozhèm gozhèm, a géɗ tèmère tèmère, a ndohi kita, a tsuvom ndohi Israel tèlèba, a babgi ndohai,

³ a to do a géɗ za Gabaon, Salomon a mpi ndohi tèlèba a nda nengaʼa. Gi mɓicè-va Zhiklè a zhè te pa, man Moise, ɓèl Ndo nzi pèc pècèk, a ngau tʼhèshèkèɗ.

⁴ David a nckoɗi koti ma kita Zhiklè te Kirjath-Jearim, a sam man David a tildahi a géɗ nengaʼa, a nʼnga na gi maslaka te kokwar Jérusalem.

⁵ A pa, a sam gi mɓicè-va Zhiklè, sam mvi skwi a Zhiklè züdo, man Betsaleel, kra Uri, kra Hur, a ngau. Salomon a mpi ndohi tèlèba ta shkè, aman ta jhèɗè Zhiklè a pa.

⁶ A pa Salomon a nzla na skwi a Ndo nzi pèc pècèk, a sam mvi skwi a Zhiklè züdo, a sam gi mɓicè-va Zhiklè, a nʼndara na skwi 1.000 a Zhiklè.

⁷ A vaɗ nasa, Zhiklè a ngudoko na va a di a Salomon, a ngaɗa na: Dzhoɗo skwi man ka woyaʼa a sam ga. I da va ka.

⁸ Salomon a ngaɗa na Zhiklè: Ka gu skwi man amba a vata a sam David, bab ga, a ka fiyè a bai te di man a nengaʼa.

⁹ Anai, Ndo nzi pèc pècèk, Zhiklè, gau ara man ka gaɗa na David, bab ga, te man ka, ka nfiyè a bai a géɗ ndohi man a vata ara wyak a ma woyam.

¹⁰ Anai vay maya, a i sun ncè ta ma ndohi haha. Man ɓai, nslaha a ngi kita ndohi ngaya mbiaʼa haha wa?

¹¹ Zhiklè a ngaɗa na Salomon: A géɗ man ka huro arsa, ka dzhaɗa skwi mèshèlè ka ɓai, ka dzhaɗa nshèffè man a nzi a ma ma ka ɓai, aman ka dzhaɗa maya, aman a ka shin ngi kita ndohi ga, man i fe ka a bi tengaʼa,

¹² i va ka maya, a ka sun skwai. A i va ka skwi mèshèlè, a nʼnjèlè, skwi kumba ara man bihi ngiɗè ta ngatsa ɓai, ko tengaʼa man ta zhè ga ka shkè, ko tengaʼa man ta da zhè a ma ma.

¹³ A Salomon a njèkeda Gabaon, a gi mɓicè-va Zhiklè, a géɗ za, a mshkè a deɓa a kokwar Jérusalem, a ngu bi a géɗ Israel.

Salomon a ndohi plèsh nengaʼa

¹⁴ Salomon a nsumko kiki var, a mɓic ta ndohi plèsh. A nʼngots kiki var 1.400, a ndohi plèsh 12.000. Matrhiaʼa a mpe ta a kokwar a sam kiki var, matrhiaʼa a tsagi na te kokwar Jérusalem.

¹⁵ A bai a ngau, a verzhègenè a guro te Jérusalem a zhè kumba ara kwa, a wof ɗawai a zhè kumba ara tèngètè te dak.

¹⁶ Plèshihi Salomon a sumka ta te Egypte; ndohi gani bai to do a ta sumkaɗa a ri a rai te Coa.

¹⁷ Gani kiki var staɗ, man a shkè te Egypte, a gi Suli gozhèm kumba, plèsh staɗ a gi Suli gurso 150. Kiki var a plèshi man bihi Heth a bihi Syrie ta sumaʼa, ta beza a ri a ndohi gani Salomon.