Hébreux 12 - Ma Zhiklè

Bi Zhiklè a ngez nga dai

¹ Gar haha nga ba, aman ndohi malwuɗihi kumba aranta ta tèuda nga a pa, ara dzarai, ngo-jokokoy skwi tèlèba man a nzala nga, a mali man a gse nga hi pèc pècèk. Ngo-monokoy ndav, ngo-hokoy a ma!

² Ngo-pokoy di a Yèsu, ndo nhinè a ndo nrufa ncè-a-ndav; nengaʼa man a géɗ mwuffe man a zhè a ma nengaʼa, a nco wof ngézlèl na, nʼnga hori ɓai, te deɓaʼa a nʼnzahai a civèɗ ri mandi sam nʼnzi bi Zhiklè.

³ Va-hur nengaʼa man a nco ndèvèɗ ma a sam ndohi malihai a gèɗ na, ntulè da keɗ kinè ɓai, kin ngez ɓai!

⁴ Kin ga var a géɗ mali kinè, a Pombaz a nshkè auda teva kinè di ɓai.

⁵ A ma man a bid kinè ara wudahi na a vna, mpca kinè a gèɗ, man a gaɗa: Kra ga, aman Bi Zhiklè a ngez ka dai, ka kwola ɓai; aman nengaʼa a ndah ka, ntulè da keɗ ka ɓai.

⁶ Aman ndo man ambaha Bi Zhiklè, Zhiklè a ngézhè dai. A ngatsa na maya a ndzoan, a ndo staɗ staɗ tèlèba man a fu a kra na.

⁷ Zhiklè a gre kinè ara wudahi nengaʼa; aman sèi kin si matakwan. Kra man bab na a ndèhaʼa azɓai, ngiɗè a zhi ɗè?

⁸ Aman agassa a ngez kinè azɓai, ara ndohi ngiɗè tèlè, ar kinè ndohi mbrokihai, wudahi ngwi ka ɓai.

⁹ Ara man nga ngots bab nyeka nga, man a ndah nga, a nga gu zlau nengaʼa, nga mèndè gèɗ a hai holholaʼa a sam Bab Zhiklè azɓi ɗè, a nga nzi a nshèffè?

¹⁰ Tengahi ta ngez nga mʼmèn kètè, ara man ta hur amba. Aman nengaʼa haha a géɗ skwi man ambaha nga zuraʼa, aman nga ngècè nshèffe nkezlaʼa ara nengaʼa ba.

¹¹ A pats man ta ngez nga, a wuffède nga azɓai, nga kuɗai. Aman te deɓaʼa, ndohi man ta slebau, a ta shkè auda te pa ma, ta nzi a, nshèffè a gumai te ngi-zuraʼa.

Kin kwola pombi Zhiklè ɓai!

¹² Gar haha va-zlatseda rihi kinè man ta ngeza, va-sala gurmbèzhi kinè man ntulè a keɗ ta.

¹³ Vo-do a civèɗ saraʼa, aman ko ndo vedal a kèlèhi azɓai, aman a mbel na.

¹⁴ Va-woy gumi a nda ndohi tèlèba, va-woy nshèffe nkezlaʼa. Ndo man nshèffe na nkezle ɓai, a slaha a nrka Bi Zhiklè ɓai.

¹⁵ Va-gu maya a géɗ kinè, ko ndo staɗ da jèkeda pombi Zhiklè ɓai, da gu ara zluzlor wof nɗuzlekzlekaʼa, man a fcè, man a gedèshè gumai, a dzakaɓ kinè, a nlizhè mpi ndohi Zhiklè ɓai.

¹⁶ Ndo da gu ara Esau ɓai, ndo mʼmen na a deɓa, ndo mphömè, man a géɗ skwi nʼndi sak staɗgenè a mpreda nʼndi gi tsuvom nengaʼa a ma, a nkwola skwi nkezlaʼa.

¹⁷ Kin suna, te deɓaʼa a woya a ngècè mpshè ma bab na, aman a nʼngatsa asaɓai, a slaha a mʼmindè a deɓa ɓai, ko a woyaʼa a kuɗa a dai.

¹⁸ Aman kin da ɓai a sam za man ndo a slaha a nlama na a rai, man vogwa te pa, a sam vani a ruva a ndombozlor,

¹⁹ a sam ntsi tolom, a sam nhèzlèwè, man ndohi ncinèʼa a fen ta a wuɗai.

²⁰ Ta slaha a ta cinè ɓai, a ndèma ta zlembaɗ. Ko skwi dak man a lama na za, sèi ta keɗaʼa a kwa.

²¹ A skwi man a gudko va a dai, mwuɗitpa holholaʼa, ha Moise ba a ngaɗa: I gi zlau, a i gudzai.

²² Aman kin shkè a sam za Sion, a sam kokwar Bi-Zhiklè man a zhè a nshèffè, a sam Jérusalem te zhiklè te géɗèʼa, a sam golahi Zhiklè gozhèm gozhèm kumba,

²³ a sam mɓicè-va tsuvomhiaʼa, man ta winde ta te zhiklè te géɗèʼa, a sam Bi Zhiklè, man a gi kita a géɗ ndohi tèlèba, a sam mèzhèɓhi ndohi nzuraʼa, nʼngaʼa jèlèlèʼa,

²⁴ a sam Yèsu, man ta bezda na nderzlè-ma mɓuaʼa a rai, a sam pombaz man nguca a pa, man a gèɗè amba holholaʼa, a fena pombaz Abel.

²⁵ Va-gu maya, kin kwola ma nengaʼa man a gèɗè ɓai! Aman tengaʼa man ta kwola nengaʼa, man a goɗ tʼherkeda, ta mbel ta ɓai, holholaʼa aman nga kwola nengaʼa man a gèɗè te zhiklè.

²⁶ A matsa daʼai nengaʼa a ngudzeda herkeda. Aman antanta a mpasla nga rai, a ngaɗa: I woy a i gidè zaʼa, herkeda genè ka ɓai, aman giɗfèk ba.

²⁷ Ma ‘zaʼa’ haha a ngreda nga, ara man skwi man a gidèʼa a di a ngwode na, te man a nʼngaʼa man a nzi kètè genè. Sèi skwi man a gidè va azɓai, a nzi dai.

²⁸ Gar haha, aman nga ngècè kokwar-bi man a gidè va azɓai, ngo-shüdokoy gèɗ, ngo-gokoy mizlinè Zhiklè, ara man ambaha, a nslébèrdèʼa a zlau.

²⁹ Aman Zhiklè nga, vogwa man a ndi skwi tèlèba.