Genèse 8 - Ma Zhiklè

Te deɓ iyam mbiaʼa

¹ A Bi Zhiklè a nhur Noé a skwi dak a skwi ndzham man a zhè te wurom tèlèba. A Bi Zhiklè a nzlündoko kozlar a géɗ herkeda, a iyam a nshèha va.

² A vèvèɗ man iyam a hakaɗauda te pa, a mpizl na, a nvakavar giɗfèk ba. A iyam te zhiklè a ndè na pa.

³ A iyam a nshe na a gèd herkeda, te deb mʼmèn 150.

⁴ Te ki matsaraɗaʼa, mʼmèn 17, wurom a nʼnzahai a géɗ za Ararat.

⁵ A iyam a nshèha va a vaʼa, a gi ki 10. A pats nshèlèkuraʼa, te ki makulaʼa, zahi ta tsoko gèɗ auda.

⁶ Te deb mʼmèn 40, Noé a mwinè nvakavar man a geda a wurom.

⁷ A Noé a mproko ngwak – a hi auda a hakaɗa deɓa, a hi auda a hakaɗa deɓa, ha iyam a ngwora ma.

⁸ A Noé a nzhor mʼmèn 7, a mproko nkuɗhom, da workoɗai, iyam ngwora ma ɗè?

⁹ A nkuɗhom a nʼngots sam man a zlècè a pa ɓai, a mʼmenkaɗa deɓa a wurom; iyam a zhè a gèɗ herkeda dai. A Noé a ntor rai, a ncko nkuɗhom a deɓa a wurom.

¹⁰ Te deɓaʼa a nzhor mʼmen 7 a za vaʼa, a mproko nkuɗhom auda te wurom zaʼa.

¹¹ A dakwaɗ, a mʼmenkaɗa deɓa a sam na zaʼa, na haha, a vah tsna te ma. A Noé a suna, iyam tʼherkeda asaɓai.

¹² A nzhor mʼmèn 7, a mproko nkuɗhom zaʼa, a nengaʼa a mʼmenkaɗa a sam na asaɓai.

¹³ Mvi Noé 601, pats nshèlèkuraʼa, ki nshèlèkuraʼa, iyam a géɗ herkeda nshe na. A Noé a mwinè géɗ wurom, a nrka, herkeda ngwora ma.

¹⁴ Te ki macecèwaʼa, mʼmèn 27, herkeda ngwora ma.

¹⁵ A Bi Zhiklè a ngaɗa na Noé:

¹⁶ Do auda te wurom, kinè a ngwoz ngaya, a wudahi ngaya, a ngwozi wudahi ngaya,

¹⁷ a skwi dak tèlèba, a skwi man a nshèffè tèlèba a sam ngaya: ɗiakihai, skwi ndzham, skwi man a hi a géɗ herkeda, pre ta auda, aman ta dè a ta yi wuda a géɗ herkeda, a ta mènè a vata.

¹⁸ A Noé a ndo auda a nda wudahi na, a ngwoz na, a ngwozi wudahi na.

¹⁹ A skwi dak a skwi ndzham tèlèba, a ɗiakihai tèlèba, a skwi tèlèba man a hi a géɗ herkeda, a mpre ta auda te wurom, ara ngakaɗ ta.

²⁰ A Noé a nrom sam mvi skwi a Ndo nzi pèc pècèk. A nco te va skwi man Zhiklè a sla na mpanaʼa, te va ɗiakihai man Zhiklè a sla ta mpanaʼa, a ndarda a vogwa a sam mvi skwi a Zhiklè.

²¹ A skwi nʼndaraʼa matsa a mzhkèha Zhiklè, ambaha, a ngod te ndav na: Anai i woy a i phomde herkeda a géɗ ndohai asaɓai. Skwi man ndav ndo a hérèʼa, ambaɓai, daga nyakaɗ na. Anai i woy a i keɗe skwi man a zhè a nshèffè asaɓai, ara man i gu matsa.

²² Aman herkeda a zhè dai, nzleki skwai, mɓicè skwai, mtasl a vazaza, via a ngwar, pats a vad, da ndev asaɓai!