Genèse 7 - Ma Zhiklè

Iyam nchè-nchè

¹ A Ndo nzi pèc pècèk a ngaɗa na Noé: Do a wurom, kinè a ndohi gi ngaya, aman i ngats ka ndo nzuraʼa a sam ga, te va ndohi herkeda haha tèlèba.

² Te va skwi dak man Zhiklè a sla na mpanaʼa, co nguraʼa a ngwozaʼa, nguraʼa a ngwozai, a gi 7. Te va skwi dak man Zhiklè a sla na nlizhèa, co nguraʼa a ngwozaʼa, nguraʼa a ngwozaʼa, staɗ staɗ.

³ Te va ɗiakihai tʼhwaɗ giɗfèk, nguraʼa a ngwozai, nguraʼa a ngwozaʼa, tsaraɗ tsaraɗ, aman tser ta a nzi a géɗ herkeda tèlèba, a nshèffè a zi azɓai.

⁴ Te deb mʼmèn tsaraɗ i woy a i zlindè iyam a géɗ herkeda, mʼmen 40, a i gedassa skwi man i gau a nshèffè te pa tèlèba.

⁵ A Noé a ngu tèlèba, ara man Ndo nzi pèc pècèk a gada na.

⁶ Mvi Noé 600, aman Zhiklè a nchko iyam mbiaʼa a herkeda.

⁷ Ga iyam mbiaʼa a mshkè, Noé a wudahi na, a ngwoz na, a ngwozi wudahi na, to do a wurom.

⁸ Te va skwi dak man Zhiklè a sla na mpanaʼa, te va skwi dak man Zhiklè a sla na nlizhèa, te va ɗiakihai, te va skwi tèlèba man a hi a géɗ herkeɗa,

⁹ nguraʼa a ngwozaʼa nguraʼa a ngwozaʼa, staɗ staɗ to do a wurom a nda Noé, ara man Bi Zhiklè a gaɗa na Noé.

¹⁰ Te deɓ mʼmen tsaraɗ, iyam mbiaʼa a mshkè a géɗ herkeda.

¹¹ Mvi Noé 600, a ki staɗ, a mʼmèn 17; a pats nasa iyam a ntsoko gèɗ auda te vèvèɗ te herkeda, a nvakavar te giɗfêk a mwin na,

¹² a iyam a ndzurvkaɗahai a géɗ herkeda, mʼmèn 40.

¹³ A pats nasa Noé a ndo a wurom a nda wudahi na: Sem, Cham, a Japhet, a nda ngwoz na, a nda ngwozi wudahi na makar,

¹⁴ tengaʼa a skwi dakhai tsaɗ tsaɗ tèlèba, a skwi ndzhamhai, a skwi man a hi a géɗ herkeda tèlèba, a ɗiakihi ba, a skwi man kelpasl a va staɗ staɗ tèlèba,

¹⁵ to do a wurom a sam Noé, te va skwi a nshèffè tèlèba, cèw cèw.

¹⁶ Skwihi man to do a pa, nguraʼa a ngwozaʼa, nguraʼa a ngwozaʼa, staɗ staɗ, ara man Bi Zhiklè a njo. A Ndo nzi pèc pècèk a mpizlè ta ma a pa.

¹⁷ A iyam mbiaʼa a ngu a géɗ herkeda, mʼmèn 40. A iyam a grè a grè, a wurom a ndè a géɗèʼa.

¹⁸ A iyam a wuzheda va a géɗ herkeda a vata, a wurom a nʼnza a géɗ iyam.

¹⁹ A iyam a grè a ma ma a vata a géɗ herkeda, a zahi mbibihiaʼa tʼhwaɗ giɗfèk tèlèba, iyam a nzede ta.

²⁰ A nzede ta zahi mbibihiaʼa ta tʼhwaɗ iyam a tsi ri 15.

²¹ A skwi a nshèffè a géɗ herkeɗa tèlèba, a ɗiakihai, a skwi ndzhamhai, a skwi dak a skwi tèlèba man a zhè a nshèffè a géɗ herkeda, a ndohi ba, ta bazl ta.

²² A skwi man a shèffè tèlèba, man a géɗ herkeda, ta bazl ta.

²³ Gar haha Bi Zhiklè a ngedassa skwi man a nshèffè a géɗ herkeda tèlèba aussa. Njèkè Noé staɗ, a skwi man a zhé a sam na te wurom.

²⁴ A iyam a nʼnza a géɗ herkeda, mʼmen 150.