Genèse 33 - Ma Zhiklè

Nzli gèɗ a Esau

¹ Aman Jacob a ncede gèɗ a zhiklè, a rka Esau a shkè a nda ndohi 400. A Jacob a nkezle ta wudahi man a Léa, man a Rachel, man a ɓèlèlihi na,

² ɓèlèlihi a wudahi ta a ma, Léa a wudahi na a verzi ta, Rachel a Joseph te deɓa.

³ A nengaʼa a mdo a ma ta, a nkalahi a deɓ sak na, a gi sak 7, ha a ndikè a sam kramam na.

⁴ Aman Esau a nhaka na ma, a ta humbètè va, a ta kelawda ri a daʼai, a ta gi mbalai, a ta kuɗai.

⁵ Aman Esau a mpu dai, a nrka ngwozi a wudahi a ngaɗa: Ngwozi a wudahi a sam ngaya haha wa? A mʼmbeɗa na a ma: Wudahi man Bi Zhiklè a mva na ɓèl ngaya te pombi na.

⁶ A ɓèlèlihi ta shkè a wudahi ta, a ta gurɓahai.

⁷ Te deɓaʼa Léa a nshkè a wudahi na, a ta gurɓahai. Te deɓaʼa Joseph a Rachel ta shkè, a ta gurɓahai.

⁸ A Esau a ngaɗa: Skwi mɓicaʼa tèlèba man nga zlüko gèɗ a vna, ka gia kè? Jacob a mʼmbeɗa na a ma: Nengaʼa, aman i da ngècè pombai a sam ngaya, bi ga.

⁹ A Esau a ngaɗa: Skwi ga a zhè kumba, kramam ga. I woy skwi ngaya bai.

¹⁰ A Jacob a mʼmbeɗa na a ma: Aʼai! Aman i ngots pombai a sam ngaya, co skwi man i va ka. Aman i rka di ngaya, ara man i rka di Zhiklè, a ka ciyè a gumai.

¹¹ Co skwi man i ga ka mbali a vna! Bi Zhiklè a mvayè te pombai, a skwi a zhè a vata. A ntetika na a gèɗ, ha a mco.

Esau a Jacob ta kezli gèɗ

¹² Esau a ngaɗa: Ngo-dokoya, i dè a ma ngaya!

¹³ A nengaʼa a ngaɗa na: Bi ga, wudahi ga ta nkèsh-nkèshèa dai, a wud tambakihi a zlugumihi ta zhè, a i war ta. A nga lè ta a pats staɗ, ta bèzl ta.

¹⁴ Bi ga do do a ma ɓèl na, a i dè a verzi ngaya te deɓa zhèhèɗ zhèhèɗ, ara man skwi ga a wuɗi ga ta slaha ta dè, ha i ndikè a kokwar Séir, a sam bi ga.

¹⁵ A Esau a ngaɗa: Aman aranta, i jèkeda ndohi ga kètè a sam ngaya. Jacob a mʼmbeɗa na a ma: Ehèmè? I woy a i ngècè pombi genè a sam bi ga.

¹⁶ A Esau a ndo a civèɗ Séir a pats nasa.

¹⁷ Aman Jacob a ndo Succoth, a ngu gi te pa, a kuɗom skwi na. A mbaha na samaʼa Succoth.

¹⁸ Te deɓaʼa Jacob a ndikè amba amba a kokwar Sichem, kokwar Canaan, te deɓ mshkè nauda te Paddan-Aram ma, a nʼnza a dal kokwar.

¹⁹ A nsumda dak man a geda gi na a pa, te ri ndohi Hamor, bab Sichem, te di Suli 100.

²⁰ A pa a nzlatseda kwa a nshinè a te pa, a nrom sam mvi skwi a Zhiklè, a mbaha na El-Elphé-Israel.